Ʒekaria 8

1

2

3

4

5

6

7

8

9

10

11

12

13

14

¹Eme Anutu Tâpiri Ɋuŋɋasaŋ Wofuŋ ere dâŋ i norao ʒuhuckerâ ʒiŋuc fuawec:

²“Wofuŋ e kecʒiŋuc mukac: No Zioŋ haere erâ ʒoɋac sâko ekopac, â ere erâ jaha aaric sâko manakopac.

³Erâ Wofuŋzi ʒuhuckerâ ʒiŋuc mukac: No Zioŋ haeo mocwâc risierâ Jerusalemko ŋeŋe juju epemu. Ehame Jerusalemte ʒâŋe i ‘Hae fâri biaŋ’ muniŋmu, â Anutu Tâpiri Ɋuŋɋasaŋ Wofuŋte tiki irec ʒâŋe i ‘Tiri tiki’ muniŋmu.

⁴Anutu Tâpiri Ɋuŋɋasaŋ Wofuŋ e ʒiŋuc mukac: Jerusalemte hae ʒoŋao ŋic ŋokac qizecnezi mocwâc ŋec domac eniŋmu, ehuc jara bocjaha bazumbiŋte gunuhec juniŋmu.

⁵Ehame naru motec jaŋe hae ʒoŋao fusucmarâ juhuc mamasiri eniŋmu.

⁶Anutu Tâpiri Ɋuŋɋasaŋ Wofuŋ eki ʒiŋuc mukac: Wiac i dameŋ ira ŋicguru ʒi ʒanʒaŋnefâc‐jeŋic jaŋere maio bipinehec eocmu, nore maio ine bipinehec moc mi eocmu. Anutu Tâpiri Ɋuŋɋasaŋ Wofuŋ ere dâŋ iŋuc.

⁷Anutu Tâpiri Ɋuŋɋasaŋ Wofuŋ eki ʒiŋuc mukac: Manakic, no ŋicfâc‐nane ʒoaŋ wewefunaonec â huhunaonec batarac‐jopapemu.

⁸Erâ mocwâc bârisiec‐jopape Jerusalem haeo ŋeŋe juju enʒepieŋ. Ehame jaŋe ŋicfâc‐nane juhapie no Anutu‐jeŋic tiŋne â fârine erâ juzepac.”

⁹Anutu Tâpiri Ɋuŋɋasaŋ Wofuŋzi ʒiŋuc mukac: “Wofuŋ ufuŋ‐ticnere hobeteŋ râembiŋ dameŋ ira porofete jaŋere mickonec dâŋ keci wahame manambiŋ ŋoŋe sanaŋkeniŋ.

¹⁰Dameŋ irec juwicnao ŋic mecne qowi mecne gie furi mi rojumbieŋ, erâ ra ju ware ju embiŋzi râsire hâhâwic ejumbieŋ, i ŋic jaŋaczia rârâsi efâreniŋte qafeŋ‐jopapore iŋuc embiŋ.

¹¹No mârâc jaha ejarepo irec sâc ŋic ʒanʒaŋne ʒi mocwâc mi ejarepemu, Anutu Tâpiri Ɋuŋɋasaŋ Wofuŋ nore dâŋ iŋuc.

¹²Irec no mupe jaŋerao wama fuarâ fozejec; waiŋzi fâri rarauhec eha gieo wiac gâcne fua biaŋ ezejec, erâ sambâŋte titikuc wahahuc foha no ŋic ʒanʒaŋne ʒi ejarepe jaŋe wiac i rauckerâ baju‐fârenʒepieŋ.

¹³O Israe â Juda kikefuŋ, ŋicne ŋicne jaŋe ŋoŋere ʒâŋeo qâqiŋ qahuc sâwec dâŋ mujumbieŋ, ʒi ine bafic‐ŋopape ŋoŋerao qâqiŋ qahuc jambuŋdâŋ munʒepieŋ. Irec hâhâwic tâmiric juhuc sanaŋkenʒepieŋ.”

¹⁴Anutu Tâpiri Ɋuŋɋasaŋ Wofuŋ e ʒiŋuc mukac: “No mamacfâc‐ŋeŋic jaŋe maŋnane bârâŋgeŋkepie sisipiric wiac bâfua‐ŋarepemurâ maŋnanezi mupaŋkerâ busâqoc moc mi mana‐ŋarepo, Anutu Tâpiri Ɋuŋɋasaŋ Wofuŋ nore dâŋ iŋuc.

¹⁵Mâc dameŋ ʒiŋuczia herisierâ Jerusalem â Juda kikefuŋ ŋoŋe ehâmo‐ŋarepemurâ mupaŋkepo irec mi hâwic‐ŋopazejec.

¹⁶Ŋoŋe ine dâŋ kecʒiŋuc mana rereŋ enʒepieŋ: Ŋaŋackoaŋ dâŋ fâri qizecne muc manac ehuc haere motâc‐ŋeŋicte maŋfuŋko ŋehuc mumutara dâŋ tiŋne mupie wama fuarâ fozejec.

¹⁷Ŋaŋackoaŋ dâŋ sâqocne manasu biric ine mi enʒepieŋ, erâ mumupaŋ dâŋ burecne irec wâc mi aŋac‐ŋopazejec, no wiac i sasawa bâsue‐fârekopac hâcne.” Wofuŋte dâŋ iŋuc.

¹⁸Eme Anutu Tâpiri Ɋuŋɋasaŋ Wofuŋ ere dâŋ i norao kecʒiŋuc fuawec:

¹⁹“Anutu Tâpiri Ɋuŋɋasaŋ Wofuŋ e ʒiŋuc mukac: Mosa namba 4, 5, 7 â 10 ira sowa juju dameŋ fuaekac irec Juda kikefuŋ ŋoŋe manapie bubiaŋ â aŋac ʒeri hombaŋ dameŋ ezejec. Irec ŋoŋe dâŋ fâri qizecne â wamare eŋarezejec.”

²⁰Anutu Tâpiri Ɋuŋɋasaŋ Wofuŋ e ʒiŋuc mukac: “Ŋic gurune gurune â hae bocjaha irec ŋecjucfâc jaŋe juku fisiniŋmu wâc.

²¹Ehame hae moc jaŋe hae moc jaŋerao rarâ ʒiŋuc jazaniŋmu: ‘Ajoc, warepie Wofuŋ wira wâwâsic ecnenaŋte ranaŋ, ehuc Anutu Tâpiri Ɋuŋɋasaŋ Wofuŋ e wira basac ecnenaŋ me! No nahacne ine mâmâc razo ekopac!’

²²Ŋic gurune gurune â ŋicne ŋicne tâpirihec jaŋe Anutu Tâpiri Ɋuŋɋasaŋ Wofuŋ wira basac ecnehuc mu wâwâsic ecneniŋte Jerusalem haeo fisiniŋmu hâcne.

²³Anutu Tâpiri Ɋuŋɋasaŋ Wofuŋ e ʒiŋuc mukac: Dameŋ ira ŋicne ŋicne dâŋmarac‐jeŋic fuŋne fuŋne jaŋeraonec ŋic 10 jaŋe Judaŋic moc ŋaqi‐ticnao rorâ basanaŋkehuc ʒiŋuc âzâcneniŋmu: ‘Anutuzi ŋoŋehec jukac, nâŋe iŋuc manambeŋte mana‐nâretec ŋoŋehec mâmâc ranʒepeneŋ.’”