Zekariah 11

1

2

3

4

5

6

7

8

9

10

11

12

13

14

¹Lebanon, mu bing e pi mab rom, ya nge longuy e nifiy e pi gek’iy rom ni cedar!

²Gimed e gek’iy ni cypress mu yorgad nib ga’ lammed, ya ke aw fapi gek’iy ni cedar nga but’, fapi gek’iy ni immoy nrib fel’ ya’an e ke yim’! Mu yor gad mi gimed dololoy’ e gek’iy ni oak u Bashan, ya fare loway nib chuwo’ i gek’iy e kan th’ab nga but’!

³Pi tayugang’ e yad be yor u fithik’ gafgowan’; ya ke chuw fel’ngirad! Mmotoyilgad nga laman e pi gamanman ni layon ni yad be tolul, ya ke mogoth e loway ni taferad u charen e lul ni Jordan!

⁴Me ga’ar SOMOL ni Got rog ngog, “Mman u ya’an ni gur ba tagafaliy e saf rok fare ulung i saf ni ngan li’rad.

⁵Pi’in fak fapi saf e rli’ed fapi saf ma dan gechig nagrad; miyad pi’ e ufin riy nchuway’ me lungurad, ‘Ke sorok SOMOL! Ya kefel’ rogdad!’ Mus ko pi’in ntagafaliy fapi saf ma darir rungyed yad.” (

⁶I SOMOL e ga’ar, “Bay dab kug runguy be’ u daken e fayleng. I gag e bay gu tay gubin e girdi’ nga tan gelngin e pi’in yad ma gagiyeg nagrad. Pi tagagiyeg ney e bay ra kireb niged e fayleng, ma dab gu ayweg e fayleng u pa’rad.”)

⁷Pi’in yad ma chuw’iy ma yad be pi’ e saf nchuway’ e ra fekedgag ni ngug maruwel, ma aram mu gu mang ba tagafaliy e saf ko fa ran’ i saf ni ngan li’rad ngarm’ad. Mug fek l’agruw ler i lek’: ni balay e gu tunguy fithingan “Fel’uwun’uy” ma balay e “Dachug.” Ma aram mu’ug chothowliy fa ran’ i saf.

⁸Dakiyag ni gu k’adan’ug rok dalip i tagafal saf, ni dubrad dakenag, mug chuwegrad ni yad gubin u lan ta’ab pul.

⁹Ma aram me lungug ko fare ran’ i saf, “Arme dab kug gafaliymed bingyal’. Tin nge yim’ e ngan pag nge yim’. Tin nge kireb e ngan pag nge kireb. Ma tin ni magach nib fos e bay ra chelgad ngorad ngu’ur li’edrad.”

¹⁰Ma aram mug fek fare ler i lek’ ni “Fel’uwun’uy” fithingan nggu t’ar, ni aram e kug thang fare m’ag ni ngongliy SOMOL ngak gubin e nam.

¹¹Ere fare m’ag e math’ e rofen nem. Pi’in nra chuw’iyed miyad falchuway’ ko saf e ur yaliyed gag, miyad nang ni SOMOL e be non u daken e ngongol rog.

¹²Mug ga’ar ngorad, “Fa’anra m’ag u wun’med, migmed pi’ puluwog. Machane fa’anra dubmed, migmed tay romed.” Ma aram miyad pi’ guyey yang e silber ni puluwog.

¹³Me ga’ar SOMOL ngog, “Mu tay ko chubgil u Tempel.” Ma aram mug fek fa guyey yang i silber, ni aram puluwog ni yad be leamnag, nggu tay ngalan e chubgil u Tempel.

¹⁴Ma aram mug t’ar fa ler ni l’agruw e lek’ ni “Dachug,” fithingan ni aram e dachug rok yu Judah ngu Israel nike wagey.

¹⁵Aram me ga’ar SOMOL ngog, “Ngam man u ya’an bayay fare tagafal saf, ni yaney e ya’an be’ ni dariy ban’en ni bfel’ ngay.

¹⁶Kug tay ba tagafal saf ni nge matanagiy fare ran’ i saf rog, machane der ma ayuweg e saf nike yib e riya’ ngorad; fe gaweg e tin kar maloggad, ara golnag e tin ke maad’ad, ara durwi’iy e tin ke magach nib fos. Me cheal ngi i kay ufin e tin nib sugsug e saf mi i popof bugli’ayrad.

¹⁷Re tagafal saf nem ndariy rogon ngabang e ke riya’! Ken’ag fa ran’ i saf rok. Mael e bayi thirif gelngin u but’. Bayi yaf pa’ me ma’ew e ba’ ni mat’aw i lanmit.”