Ŋicwofuŋ I 16

1

2

3

4

5

6

7

8

9

10

11

12

13

14

15

16

17

18

19

20

21

22

¹Eme irec Basare erâ Wofuŋte dâŋzi Hananire ŋokâ Jehurao ʒiŋuc fuawec:

²“No rufemaŋkonec bafaharecgurâ Israe ŋicfâc‐nane jaŋere micne bapa jucmurâ âkendâŋgupo. Goki ine Jeroboamte hatao rahuc Israe ŋicfâc‐nane jaŋe hehesic bâfuapie hehesic‐jeŋic izi no kimbeŋ bâfua‐nareocte qafeŋ‐jopameŋ.

³Manakic, no Nebate ŋokâ‐ticne Jeroboam ere kikefuŋ ejarepo irec sâc jaha gore kikefuŋ hetâtjepemu.

⁴Eme Basa gore kikefuŋkonec ŋic e me e haeo hâmoocmu ere qâŋɋâŋ i qâto jaŋe nânʒepieŋ â gore kikefuŋkonec jaha ŋic moc kâteo me ira me ira hâmoocmu ere qâŋɋâŋ i wipe jaŋe nânʒepieŋ.”

⁵Eme Basazi wiac sasawa ebac ewec â tâpiri‐ticnere fuŋne i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.

⁶Eme Basa e apa ŋosafâc‐ticne jaŋerao ʒuhuckehuc hâmome Tiriza haeo duckembiŋ. Ehame ŋokâ‐ticne Elazi tucticne qarâ ŋicwofuŋ juwec.

⁷Eme Basa e Jeroboamte kikefuŋ jaŋere sâc jaha ehuc meticnezi wiac bâfuawec ira qohotahuc Wofuŋte ʒâŋe faio wiac repicne ewec, ehuc kimbeŋ bâfuacnewec â Jeroboamte kikefuŋfâc jopa miziewec, irec erâ e jahacne â garikiŋfâcne jaŋere dâŋ i Wofuŋzi Hananire ŋokâ porofete Jehu ere micko mocwâc râewec.

⁸Asa e Juda ŋicwofuŋ jume jara 26 eha Basa ŋokâ‐ticne Elazi fuŋkerâ Israe ŋic jaŋere ŋicwofuŋ ehuc Tiriza haeo juwec. E ŋicwofuŋ juhame jara jajahec tarawec.

⁹Ehame keretacfâcne gâcne irec micne kiŋaŋ qaqa‐ticne Ʒimirizi doc bahuc râsi rocnewec. Eme Ela e Tiriza haeo ficte micne Arazare ficko opâ sanaŋ nâku maŋne bibiriwawec.

¹⁰Ehame Ʒimirizi fisirâ qâhâmorâ ere okacne ŋicwofuŋ ewec. Wiac i Asazi Juda ŋicwofuŋ jume jara 27 eha iŋuc fuawec.

¹¹Ʒimiri e ŋicwofuŋ eri ŋeŋeo fuŋkerâ ŋehuc izia Basare kikefuŋ jopa‐fârewec. E Basare soctofafâc me âgofâc‐ticne jaŋeraonec ŋic moc mi akickewec.

¹²Ʒimiri e iŋuc ehuc Wofuŋzi Basare dâŋ porofete Jehure micko râeme muwec irec sâcko jopa miziewec hâcne.

¹³Erâ i Basa â ŋokâ‐ticne Ela jahe hehesic ehuc Israe ŋic ejarepire hehesic jaha bâfuahuc ɋâŋ qâqâtâc barâ Israere Wofuŋ Anutu kimbeŋ bâfuacnembiŋ irec erâ iŋuc fuawec.

¹⁴Eme Elazi wiac sasawa ebac ewec irec binaŋ i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.

¹⁵Asa e Juda ŋicwofuŋ jume jara 27 eha Ʒimirizi Tiriza haeo ʒoaŋ gie bapa 7 ŋicwofuŋ juwec. Ehame momori guru jaŋe Filisa ŋic jaŋere hae moc ʒâŋene Gibetoŋ i somâckehuc teuŋ âtembiŋ.

¹⁶Eme teuŋko momori guru jumbiŋ jaŋe dâŋ ʒiŋuc mupie manambiŋ: “Ʒimiri e ŋicwofuŋ doc bahuc qâhâmojec.” Dâŋ iŋuc manarâ Israe ŋic jaŋe dameŋ ijaha teuŋkoa momori jumbiŋ jaŋere micne ʒâŋene Omiri e Israe ŋicwofuŋ âkendâŋnembiŋ.

¹⁷Eme Omiri â Israe ŋic jaŋe Gibetoŋ haeonec ferâ Tiriza hae somâckembiŋ.

¹⁸Ehame Ʒimiri e hae rombiŋ i honerâ ŋicwofuŋte ficsanaŋko raʒirâ fic i ʒoczi turuŋkeme ʒahuc e jahacne mâmâc ʒâhâmowec.

¹⁹E hehesic‐ticne ebac ehuc Wofuŋte ʒâŋe faio wiac mamakâcne erâ Jeroboamte hatao rawec, ehuc Israe ŋic ejareme hehesic bâfuambiŋ irec erâ iŋuc fuacnewec.

²⁰Eme Ʒimirizi wiac sasawa ebac ewec â Ela doc bawec irec binaŋ i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.

²¹Ehame Israe ŋic jaŋe fâuckerâ guru jajahec embiŋ: Ŋic ŋokac dâkâne jaŋe Ginatire ŋokâ Tibani ŋicwofuŋ âkendâŋneniŋte e bâjâpembiŋ â dâkâne moc jaŋe ine Omiri bâjâpembiŋ.

²²Eme Omiri bâjâpembiŋ jaŋe Ginatire ŋokâ Tibani bâjâpembiŋ jaŋe sanaŋkerâ bawahac‐jopambiŋ. Eme Tibanizi hâmome Omirizi ŋicwofuŋ ewec.

²³Eme Asa e Juda ŋicwofuŋ jume jara 31 ehame Omirizi fuŋkerâ Israe ŋic jaŋere ŋicwofuŋ ewec. Erâ ŋicwofuŋ gie bahuc juhame jara 12 tarawec. Eme jara 6 i Tiriza haeo ŋicwofuŋ juwec.

²⁴Ehuc Samaria tiki i Semeriraonec siliwa moneŋ ŋemâc‐ticne 200 izi furine bawec. Erâ tiki ira hae sacsanaŋ‐ticnehec bawec irec ʒâŋe i tiki rune Semeri ere wase bahuc Samaria muwec.

²⁵Omiri e juwicnao ŋicwofuŋ juwarembiŋ jaŋe siric‐jopahuc Wofuŋte ʒâŋe faio wiac mamakâcne ewec.

²⁶E Nebatere ŋokâ Jeroboamzi hata hehesicne âtehuc Israe ŋic ejareme hehesic jaha bâfuahuc ɋâŋ qâqâtâc‐jeŋiczi Israere Wofuŋ Anutu kimbeŋ bâfuacnembiŋ hehesic ijaha bâjâpewec.

²⁷Eme Omirizi wiac sasawa ebac ewec â tâpiri‐ticnere fuŋne jowatuwec irec binaŋ i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.

²⁸Eme Omiri e apa ŋosafâc‐ticne jaŋerao ʒuhuckehuc hâmome Samaria haeo duckembiŋ. Ehame ŋokâ‐ticne Ahabazi tucticne qarâ ŋicwofuŋ juwec.

²⁹Asa e Juda ŋicwofuŋ jume jara 38 ehame Omiri ŋokâ‐ticne Ahabazi fuŋkerâ Israe ŋic jaŋere ŋicwofuŋ ewec. Omiri ŋokâ‐ticne Ahaba e iŋuc ehuc jara 22 Samaria haeo juhuc Israe ŋic ŋicwofuŋ ejarewec.

³⁰E juwicnao ŋicwofuŋ juwarembiŋ jaŋe siric‐jopahuc Wofuŋte ʒâŋe faio wiac mamakâcne ewec.

³¹Ehuc maname afeckeme Nebate ŋokâ‐ticne Jeroboamte hehesic hatao rawec. Ehuc Sidoŋ ŋicwofuŋ Etebali ere otâ, ʒâŋene Isebe, e ŋonâŋ‐ticne rowec. Ehuc rarâ Baali nemu dapecnehuc kiŋaŋ qacnewec.

³²Erâ Samaria haeo e jahac Baali nemure ufuŋ bawec irec maŋnao alata moc bawec.

³³E sueme sue wiac iŋuc ehuc ere juwicnao Israe ŋicwofuŋ juwefumbiŋ jaŋere sâc jâuruwec, ehuc Israere Wofuŋ Anutu kimbeŋ bâfuacnewec.

³⁴E juhame Bete haeonec ŋic moc ʒâŋene Hiele eki Jeriko hae bawec. Ehuc haesacte hobeteŋ râehame mârâc ŋokâ‐ticne Abiramzi hâmowec, â sac batarahuc motâc âkendâŋneme ʒâhec ŋokâ‐ticne Segubuzi hâmowec. Wiac i Nuŋte ŋokâ Josuazi Wofuŋte micdâŋ muwec irec sâcko fuawec.