1Israe ŋic jaŋe Aigita mâreŋkonec waharâ juwefukupie jara 480 eha Salomozi Israe ŋic jaŋerao ŋicwofuŋ gie bahuc juhame jara 3 â mosa 2 ewec, mosa ʒâŋene Ʒiwi, dameŋ ira hâcne Salomozi fuŋkerâ Wofuŋte ufuŋ bawec.
2Ŋicwofuŋ Salomozi Wofuŋte ufuŋ bawec irec sâc ʒiŋuc: Ʒoricne‐ticnere sâc kubi 60, otecne‐ticnere sâc kubi 20, hâŋ bafekicne ine kubi 30 irec sâc.
3Eme fic fârinao hae gâŋgâŋ moc bawec irec otecnere sâc kubi 20, â fic mainao ʒuhuckewec irec sâc kubi 10.
4Eme râreckehuc qâqâtâc kataŋ râewec, râpenao bâpitiwawec â maŋnao ine bâsokawec.
5Erâ fic fârine â furufic i orâŋkehuc fic ʒuhucne barâ maŋne maŋne âke tâcne rawec.
6Fic ʒuhucne i feŋgaŋne 3. Juwic otec‐ticnere sâc kubi 5, ʒâʒâŋiŋko 6 â feŋgaŋne faicpec irec otecnere sâc kubi 7. Fic sâpenao feŋgaŋne feŋgaŋne raʒi fowec ira jâc otecne mâc iticnehuc râe rakicne.
7Eme taha ufuŋ bambiŋko mâsi ʒiŋuc fuawec: Qânâ wiac i qanaŋ ba akic efârekicnere ufuŋ bahapie hama me râric me aeŋ wiacte fânâŋ moc mi fuawec.
8Ficʒuhuc juwicnere motâc i fic fâreopec domawec, eme irecnec riri oorâŋ râreckehuc bakicne i feŋgaŋne ʒâʒâŋiŋko fewec, eme irecnec riri moczi feŋgaŋne faicpec fewec.
9Salomo e iŋuc ehuc fic baku bafârerâ fic tapane ine jâmâzâc jâczi bawec.
10Erâ e fic orâŋkehuc ʒuʒuhucne bafârewec wâc, feŋgaŋne moc i hâŋne‐ticne kubi 5, erâ fic i jâmâzâc â wetejâczi basanaŋkewec.
11Eme Wofuŋte dâŋ Salomorao kecʒiŋuc fuawec:
12“Ŋoŋe dâŋsanaŋ‐nane bâninipehuc mumutâc â sâcmutâc dâŋnane mana rereŋ erâ hata mutâcne‐ŋarepo sâc wiac ebac efâreniŋmuo ine no go â mamacge Dawidi findaŋdâŋ ŋasapo i mupe fârio qaocmu.
13Ehame no Israe ŋicfâc‐nane ŋoŋere ŋondeŋko juhuc moc mi behec‐ŋopapemu.”
14Eme Salomo e Wofuŋte fic baku bâzickewec.
15Eme ɋâriŋkonec fuŋkerâ feku faic tapanao fisiwec fic sâpene i jâmâzâc paraŋzi foŋke‐fârerâ ɋâriŋne i wete paraŋzi bârârâŋnewec.
16Eme ficmaŋne râpenaopec ira jâmâzâc paraŋzi ficmaŋne moc âke tâcnewec, i sâcticne kubi 20. Paraŋ‐ticne i ɋâriŋkonec feku fic tapanao iticnewec. Ficmaŋne izi furu dindiŋ hâcne.
17Eme ficmaŋne irecnec ficmaŋne fârine ʒuhuckerâ rawec i sâcticne kubi 40.
18Ficmaŋne i jâmâzâc paraŋzi foŋke‐fârekicnere qânâ hohonene moc mi ewec. Eme jâczi hândâŋ qarâ fâuckeme âri fuaekac irec sâc hawari paraŋko metâ barakicne.
19Eme Wofuŋte ʒâʒâfic katapa irec ŋeŋe hae fuaocte ficmaŋne râpenaopec furu dindiŋ irec maŋne âke tâcnewec hâcne.
20Ficmaŋne irec ʒoricne â otecne kubi 20, â hâŋnere kubi 20 jaha. Eme irec paraŋ i gol findowakicnezi foŋke‐fârewec erâ ficmaŋne irec motâc fuŋnao ira jâmâzâc jâczi alata moc barâ râewec.
21Erâ Salomo e ficmaŋne i gol findowakicnezi foŋke‐fârerâ furu dindiŋ irec mainao kâpâcwâru moc golzi bakicne i fârewec.
22Ine hâcne ficmaŋne sasawa i golzi foŋkeku foŋke‐fârewec. Erâ alata furu dindiŋte motâc fuŋnao ŋewec i golzia wâc foŋkewec.
23Eme furu dindiŋte biŋe kerubim jajahec jahere hawari i oliwa jâczi bacjofawec. Ʒoricne‐jekicte sâc i kubi 10.
24Eme kerubim mocte fakec ŋifec â ŋifec i kubi 5. Irec fakec jajahec jahere sâc i kubi 10 ewec.
25Eme kerubim moc ere sâc i kubi 10 jaha. Kerubim jajahec jahere sâc â hawari mocjaha.
26Â ʒoricne‐jekicte sâc i wâc mocjaha, kubi 10.
27Kerubim jajahec i furu dindiŋ ʒâʒâŋiŋnao râec‐jofame domapic. Eme kerubim jahere fakec qaratierâ domapic irec mocte fakec ŋifeczi ficsâpe ŋifecne âke uawec â mocte fakec ŋifeczi sâpe ŋifecne âke uawec wâc. Â fafakec jahec‐jekiczi ʒâʒâŋiŋko bâbâfuac epic.
28Eme kerubim jahec i golzi foŋjofawec wâc.
29Eme Salomozi mume metâ bapa jaŋe fic sâpene sasawa i kerubim â hâmujâc erâ âri wiac irec hawari bapie sâcke‐fârewec, i furu dindiŋ ira mecne â furufic ira wâc mâmâc.
30Erâ mume furu dindiŋ â furufic irec ɋâriŋ i golzi foŋke‐fârembiŋ.
31Furu dindiŋte motâc i mume oliwa jâczi bambiŋ. Kataŋ‐ticne jajahec â wâtuŋ wiac‐ticne i ba akic epie tikine 5 ewec.
32Ine hâcne, motâc kataŋ jajahec i oliwa jâczi bakicne, eme jahere faio ine kerubim â hâmujâc erâ âri wiac irec hawari metâ barâ golzi foŋke‐fârembiŋ.
33Eme mume tiri ufuŋte motâc irec wâtuŋ i oliwa jâczia bambiŋ wâc, wâtuŋ irec tikine 4.
34Â motâc kataŋ jahec‐ticne i mume wete paraŋzi bambiŋ, eme kataŋ moc e ki otec‐ticne jajahec â kataŋ moc e iŋuc jaha bambiŋ.
35Erâ mume kerubim â hâmujâc erâ âri wiac irec hawari metâ bapie hawarine fuawec sâc golzi foŋke‐fârembiŋ.
36Eme ufuŋ râreckerâ hae ʒoŋa piticne fowec i qânâ he akic ekicne feŋgaŋne 3 â jâmâzâc jâc feŋgaŋne wâŋ iŋuc râerâ bambiŋ.
37Salomozi ŋicwofuŋ jume jara 4 irec mosa ʒâŋene Ʒiwi ira Wofuŋte ufuŋ fuŋkerâ bambiŋ.
38Eme juhame jara 11 irec mosa 8 ʒâŋene Bulu wahaha ufuŋ â wiac‐ticne sâcmutâc fowec irec sâc râe tara‐fârerâ bâzickembiŋ. Jara 7 baku batarambiŋ hâcne.
