Ŋicwofuŋ I 10

1

2

3

4

5

6

7

8

9

10

11

12

13

14

15

16

17

18

19

20

21

22

¹Eme Seba mâreŋte ŋokac wofuŋ eki Salomore ʒâŋe biŋe manarâ dâŋ herâricnao esâickeocte fisiwec.

²E kikefuŋfâc‐ticne guru sâko jâmbâŋ jaŋehec Jerusalem haeo fisimbiŋ. Ehame kamelefâc‐ticne jaŋe nânâ ba bâziziwec eere wiac mecne, gol bocjaha mecne â qânâ wiac furi sâko i mâmâc âsickembiŋ. Eme e Salomorao fisirâ ehec dâŋezore maŋkewec i âzâcne‐fârewec.

³Erâ dâŋ wiocnewec sâc irec okacne Salomozi sâcne bâtikiecnewec. Ŋicwofuŋ e wiwio irec me irec okacne bârisieocte moc mi bititiewec hâcne.

⁴Eme Seba mâreŋte ŋokac wofuŋ e Salomo maŋɋârâŋ‐ticne â fic bawec

⁵â tebo‐ticnao nânâ wiac fowec, â kâcɋenefâc‐ticne e orâŋkehuc ŋembiŋ â kiŋaŋ qaqafâc‐ticne jaŋe ŋaqi biaŋne rojuhuc kiŋaŋ qacnembiŋ â waiŋ soŋaŋfâc‐ticne gie‐jeŋic bambiŋ erâ Wofuŋte ufuŋko qowi bâzi rikehuc juwec, wiac i sasawa hone‐fârerâ maŋne omaewec.

⁶Eme ŋicwofuŋ ʒiŋuc âzâcnewec: “No mâreŋ‐naneo juhuc eebapagere â maŋɋârâŋgere biŋe bâroŋ manapo i fârine ʒine hâcne bâfuakopac.

⁷No biŋege sawa manahuc manape fârine mi ewec. Miŋecgac no nahac fisirâ ʒâŋe fâri‐nanezi qame honehuc ʒiŋuc manakopac: Jaŋe dâŋ binaŋ huŋtuc sawa enarembiŋ ʒi ine maŋɋârâŋge â jujuhâmoge izi biŋege siricke‐fârekac.

⁸Ŋicfâcge â kâcɋenefâcge dameŋ sâc gore maio domahuc maŋɋârâŋgere dâŋ mana sakac eeŋgopieŋ jaŋere manape ʒerine ekac.

⁹Wofuŋ Anutuge e mumbiaŋkezo! Eki hâcne Israe kikefuŋ maŋjauŋ fofo sanaŋ ejarehuc gore maname sâckewecte ŋic eebapa biaŋne â fâretiŋkoa jowac‐jopahuc jucmurâ Israere eri ŋeŋeo râecguhuc ŋicwofuŋ âkendâŋguwec.”

¹⁰Iŋuc murâ ŋicwofuŋ gol ŋemâc‐ticne 120 erâ nânâ ba bâziziwec eere wiac bocjaha jâmbâŋ â qânâ wiac furi sâko râcne tahac ewec. Seba mâreŋte ŋokac wofuŋ e ŋicwofuŋ Salomo nânâ ba bâziziwec eere wiac râcnewec i hâhâwicne jâmbâŋ. Iŋucne sâko i ʒâhec moczi mocwâc mi bafisiwec.

¹¹Erâ wiac i sawa mâcne, Hiramte wokefâc jaŋe Ofiri mâreŋkonec gol baware jumbieŋ jaŋe kioŋjâc bocjaha â qânâ wiac furi sâko Ofiri mâreŋkonec bafisi jumbieŋ wâc.

¹²Eme Salomozi mume jâc biaŋne i rohuc Wofuŋte fic â e jahacne fic irec wâtuŋ gâcne barâ gae hehe ŋic jaŋere gita kulele wiac bajarembiŋ wâc. Jâc biaŋne iŋucne mârâc jaha mi bafisikicne â mi honekicne â ʒâhec wâc iŋuc jaha mocwâc mi honembiŋ.

¹³Eme ŋicwofuŋ Salomozi Seba mâreŋte ŋokac wofuŋ e wiac aŋac manarâ mufuawec sâc i tahackehuc wiac gâcne e jahac râcnezo manasuwec i ʒuhuckecnewec. Eme e â kikefuŋfâc‐ticne jaŋe faharerâ mâreŋ‐jeŋicko risie rambiŋ.

¹⁴Eme jara sâc gol wiac Salomorao fisi jujec irec ŋemâc i 660.

¹⁵Erâ i âbârâ gie bapa ŋic nareŋ gareŋ ejumbieŋ jaŋere sahac taha erâ Arabia mâreŋte ŋicwofuŋ jaŋere sahac taha â mâreŋ soŋaŋ jaŋere sahac taha moneŋ bafisimbiŋ i ira ʒuhuckewec.

¹⁶Eme ŋicwofuŋ Salomozi mume gol ematauckekicnezi maro kâcɋene 200 bambiŋ. Maro mocte gol râembiŋ irec ŋemâc 600.

¹⁷Erâ maro piticne 300 i gol ematauckekicnezia bambiŋ wâc. Maro mocte gol râembiŋ i ŋemâc‐ticne 3 paoŋ irec sâc. Eme ŋicwofuŋzi mume maro wiac i Lebanoŋ Kâtefic ira râembiŋ.

¹⁸Eme ŋicwofuŋzi mume elefaŋte ʒuŋenezi eri ŋeŋe sâko moc barâ gol ematauckekicnezi foŋkembiŋ.

¹⁹Eme ŋeŋe e riri‐ticnehec, ririre feŋgaŋne 6 fowec. Erâ ŋeŋe irec râpenao ira bulimakao qizec metâ bakicne. Ŋeŋere qaŋeŋnao ŋifec â ŋifec ine me hehesiŋ ba akic ekicne, â irec qaŋeŋnao laioŋ hawari jajahec metâ bakicne.

²⁰Eme laioŋ hawari 12 i riri feŋgaŋne 6 ira ŋifec â ŋifec râec‐jopakicne. Uucmaŋ ira me ira wiac iŋucne moc mi bambiŋ, aric kereŋne.

²¹Ŋicwofuŋ Salomore waiŋ â opâ râqâc wiac sasawa i golzi bafârekicne, erâ Lebanoŋ Kâteficko râqâc wiac fowec i gol ɋaɋacnezi bakicne. Salomozi juwec dameŋ ira siliware manapie wiac omane ewec.

²²Ŋicwofuŋ e Tarasisi haeonec woke sâko jucnembiŋ, jaŋe ŋicwofuŋ Hiram ere wokefâc jaŋehec mâmâc hâwecko jujumbieŋ. Erâ Tarasisi haeonec woke jaŋe jara 3 tarame sâc fisihuc gol, siliwa, elefaŋte ʒuŋe, moŋki â wipe hawari biaŋ bafisicne jumbieŋ.

²³Eme ŋicwofuŋ Salomo e moneŋ mafa sâko â mâŋɋârâŋhec juhuc mâreŋ sâc ŋicwofuŋ jurambiŋ jaŋe siric‐jopa‐fârewec.

²⁴Ehame Anutuzi maŋɋârâŋ tahackewecte ŋicne ŋicne jaŋe Salomo honehuc maŋɋârâŋ‐ticnere dâŋ mananiŋte ejarewec.

²⁵Eme jarane jarane fisimbiŋ sâc jaŋe buc buc taha wiac‐jeŋic bafisihuc râqâc wiac siliwa â golzi bakicne, erâ ŋaqi qoruc â wiac âsu biaŋ, â nânâ ba bâziziwec eere wiac erâ becâsic doŋgi wiac râcne jumbieŋ.

²⁶Salomo e keretac â becâsicko rara ŋic hetumaŋ‐jopawec. E keretac 1 tauseŋ 400 â becâsicko rara ŋic 12 tauseŋ jucnembiŋ, eme i jaŋe rocjoparâ keretac jujure sâc hae iŋucnao râec‐jopawec â gâcne ine ŋicwofuŋ e jahacnehec Jerusalem haeo jumbiŋ.

²⁷Eme ŋicwofuŋ e siliwa â gol i Jerusalem haeo qânâ iŋucne kosa râeme forawec â jâmâzâc jâc bocjaha jâmbâŋ rome fisirâ Sefela mâreŋko kakikic jâc forawec irec sâc forawec.

²⁸Erâ Salomo becâsic bafisicnembiŋ i Aigita â Kue mâreŋkonec. Ŋicwofuŋte furi bapa ŋic jaŋe Kue mâreŋ ira hâcne furine bambiŋ.

²⁹Ehuc Aigita mâreŋkonec keretac moc i siliwa moneŋ 600‐zi furine bambiŋ, â becâsic moc irec furi ine siliwa moneŋ 150 râembiŋ. Eme Hiti â Siria ŋicwofuŋ jarepie jaŋe wâc jaŋere meonec furine bambiŋ.