1Eme dameŋ ira Jeroboamte ŋokâ Abia e huc bawec.
2Eme Jeroboamzi ŋonâŋ‐ticne âzâcnerâ muwec, “Ajoc, go hawarige hetikietec ŋic jaŋe honecgurâ, e Jeroboamte ŋonâŋ iŋuc mi mana taranʒepieŋ; ehame Silo haeo razemec. Manakic, noni ŋic ŋokac ʒi qaŋeŋ‐jopapemurâ muwec, porofete Ahia e hae ira hâcne jukac.
3Irec go poroŋ 10 aŋacne gâcne, erâ baŋac ʒopo moc iŋuc rorâ erao razemec. Eme eki motec ʒi erao wemo wiac fuaocmu i gazazejec.”
4Eme Jeroboamte ŋonâŋ e iŋuc erâ fahare Silo haeo rarâ Ahiare ficko fisiwec. Ahia e ŋicqizec jâmbâŋ ewec, irec ʒâŋe‐ticne mâteŋkeme sâcne mi fiwec.
5Eme Wofuŋzi Ahia ʒiŋuc âzâcnewec: “Manakic, Jeroboam ŋonâŋ‐ticne e ŋokâ‐ticnere erâ go mu wioc egareocte fisikac. Ŋokâ‐ticne e huc bame fokac; irec go dâŋ iŋuc â iŋuc bâtikiecnezemec.” Eme ŋokac e fisirâ hawari‐ticne hetikieme ŋokac moc tinac ewec.
6Ehuc motâcko fisime Ahiazi kike fânâŋ‐ticne manarâ muwec, “Jeroboam ŋonâŋ‐ticne go wefuc. Go wemocte eeatucnukomec? No gore biŋedâŋ ŋemâcne narekicne bajukopac.
7Go rarâ Jeroboam âzâcnec, ‘Israere Wofuŋ Anutu e ʒiŋuc mukac: “Noni hâcne ŋic jaŋeraonec bafaharecguhuc Israe ŋicfâc‐nane jaŋere micne bapa jucmurâ âkendâŋgupo.
8Ehuc uucmaŋ i Dawidire garikiŋfâc jowac rorâ go garepo. Go ine kiŋaŋŋic‐nane Dawidizi sâcmutâc dâŋnane reŋkerâ maŋticnezi bâjâpecnuhuc ʒâŋe mai‐naneo wiac fâretiŋ jaha ebac ewec irec sâc mi eekic.
9Ehuc qâsorierâ gore juwicnao juwarembiŋ jaŋe siric‐jopahuc hehesic repicne erâ nemu gâcne bâfuac‐jopahuc ɋâŋ qâqâtâc barâ râpecnuhuc kimbeŋ bâfua‐nareekic.
10Irec go ʒiŋuc manac: No kikefuŋgao wiac repicne bâfuahuc ŋic moczi jawa wiac ʒocko râeme ʒaku ʒâtâmireekac irec sâc Israe kikefuŋkonec garikiŋfâcge ŋic sasawa rambaŋ â niŋgiŋko fuakicne jaŋe omaec‐jopa‐fârepemu.
11Wofuŋzi muwecte kikefuŋgaonec haeo hâmoniŋmu jaŋe qâto jaŋe nâcjopaniŋmu, â gieo hâmoniŋmu jaŋe ine wipe jaŋe nâcjopaniŋmu.” ’
12Irec go faharerâ ficgao rac. Eme haeo fisitec izia motec e hâmoocmu.
13Ehame Israe ŋic jaŋe ki mamakuc ehuc duckeniŋmu. Israere Wofuŋ Anutuzi Jeroboamte kikefuŋko e honeme sâckekacte eki sawa ʒâŋeruŋko foocmu.
14Erâ Wofuŋ e ʒiŋuczia Israe ŋic jaŋere ŋicwofuŋ moc âkendâŋneme eki Jeroboamte kikefuŋ omaec‐jopaocmu. Erâ dameŋ ʒi fuŋkerâ
15mâŋâŋzi saparac rome qiriŋ qaekac irec sâc Wofuŋzi Israe ŋic jopaocmu. Ehuc apa ŋosafâc‐jeŋic mâreŋ jarewec, mâreŋ biaŋ ʒirecnec Israe ŋic unuc‐jopaocmu. Jaŋe Asera nemuɋâŋ bahuc Wofuŋ kimbeŋ bâfuacnembiŋte bâtâtiec‐jopame Eufrata opâ ocniŋucnao siŋsaŋ qarâ juniŋmu.
16Jeroboam e hehesic bâfuahuc Israe ŋic ejareme hehesic jaha bâfuambiŋte Wofuŋzi Israe ŋic râpec‐jopa sanaŋkeocmu.”
17Eme Jeroboam ŋonâŋ‐ticne e faharerâ raku Tiriza haeo fisiwec. Erâ ficmotâcko fisihame izia motec e hâmowec.
18Hâmome Israe ŋic jaŋe Wofuŋzi kiŋaŋŋic‐ticne porofete Ahiarao dâŋ muwec irec sâcko e duckehuc ki mamakuc embiŋ.
19Eme Jeroboamzi wiac sasawa ebac ewec â ʒika qawec erâ ŋicwofuŋ juwec irec binaŋ i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.
20Erâ Jeroboam e jara 22 ŋicwofuŋ juwec. Eme e apa ŋosafâcne jaŋerao ʒuhuckehuc hâmome ŋokâ‐ticne Nadabazi tucticne qarâ ŋicwofuŋ juwec.
21Ehame Salomo ŋokâ‐ticne Rehoboam e Juda mâreŋko ŋicwofuŋ juwec. E jara 41 bazurâ fuŋkerâ ŋicwofuŋ ehuc Jerusalem haeo jara 17 juwec. Hae i Wofuŋ e jahac ʒâŋe‐ticne ira foocte Israe guru sasawa jaŋeraonec rowosâewec. Eme Rehoboam neŋgoc‐ticne i Amoŋ ŋokac, ʒâŋene Nama.
22Eme Juda kikefuŋ jaŋe Wofuŋte ʒâŋe faio wiac repicne ehuc hehesic embiŋ i apa ŋosafâc‐jeŋic jaŋe embiŋ irec sâc sirickerâ ehuc Wofuŋ maŋbâiŋ ecnepie kimbeŋ‐ticnere ʒoɋac faharewec.
23Jaŋe wâc iŋuc jaha furu mâreŋ â ɋâŋwâtuŋ â Asera nemuɋâŋ barâ furu mâreŋko â jâcsâkore fuŋnao herambiŋ.
24Erâ mâreŋ ira sasec ŋic wâc juhuc boe sau gie bambiŋ. Jaŋe wiac mamakâcne ebac embiŋ i Israe ŋic jaŋe mâreŋ ira raʒiniŋte Wofuŋzi ŋic gurune gurune jopa jâpec ejarewec jaŋere eebapa hâcne.
25Eme Rehoboam e ŋicwofuŋ jume jara memoc eha Aigita ŋicwofuŋ Sisakazi Jerusalem hae râsi rocnehuc fisiwec.
26Ehuc Wofuŋ ufuŋ‐ticnere ʒeŋaŋ â ŋicwofuŋ ficticnere ʒeŋaŋ erâ wâcwiac gâcne sasawa i mâmâc bawise‐fârewec. Erâ Salomo e golzi maro bawec i wâc iŋuc jaha bawisewec.
27Ehame ŋicwofuŋ Rehoboam e irec okacne aeŋ bâbâroŋzi maro barâ momori fuŋfuŋfâc‐ticne jaŋere micnefâc ŋicwofuŋ ficticnere motâc soŋaŋkehuc domambiŋ jaŋe jarewec.
28Eme ŋicwofuŋ e Wofuŋte ufuŋko raʒi jujec sâc momori fuŋfuŋfâc‐ticne jaŋe maro i rorâ bâjâpe jumbieŋ. Ehuc bârisierâ momori fuŋfuŋfâcne jaŋacne ficko râepie ŋejujec.
29Eme Rehoboamzi wiac sasawa ebac ewec irec binaŋ i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne.
30Eme Rehoboam â Jeroboam jaherao ʒikazi sueme sue fo wefuwec.
31Juku Rehoboam e apa ŋosafâcne jaŋerao ʒuhuckehuc hâmome jaŋe fombiŋkoa Dawidire hae qizecko duckembiŋ. E neŋgoc‐ticne i Amoŋ ŋokac, ʒâŋene Nama. Ehame ŋokâ‐ticne Abiamzi tucticne qarâ ŋicwofuŋ juwec.
