Text copied!
CopyCompare
Paipel - Än Salomon Afalafal

Än Salomon Afalafal 4

Help us?
Click on verse(s) to share them!
1Iwe, üa nenengenisefäli o küna ekewe riaföü ra fis won fanüfan. Chokewe mi küna riaföü ra kechü, nge esap wor eman a alisiir. Iwe, ekewe chon ariaföüür a wor ar pöchökül, iei mine esap wor eman a alisi ekewe chon riaföü.
2Iwe, üa ekieki pwe chokewe ra fen mäla ra feiöch seni chokewe mi chüen manau.
3Nge chokewe resamwo uputiu o küna ekewe föföringau mi fis won fanüfan ra feiöch seniir meinisin.
4Mürin üa pwal küna popun än aramas angang weires me ar kütta met repwe fefeitä ren, pun ra lolowo ngeni chon arur. Iwe, pwal ei pön chök, a usun chök turufi asepwäl.
5Eman aramas esap mirit a afiti pöün o püsin afeiengaua.
6A öch än eman epwe kisikis pisekin, nge a kinamwe, lap seni än eman epwe watte pisekin ren an angang weires fän ruofoch pöün, nge a turufi asepwäl chök.
7Iwe, üa pwal küna och mi pön won fanüfan:
8Eman aramas mi alemanüla, esap wor nöün ika pwiin, nge esap müchüla an angang weires. Iwe, esap menemenöch ren wöün. Esap ais, “Fän iten iö üa angang weires o epeti pwapwa seni manauei?” Pwal ei pön chök o angang solap.
9Ruoman ra feiöch seni eman chök, pun ar angangfengen a fisiöch.
10Pun lupwen eman a turula, chienan epwe apwätäi. Nge feiengauen eman mi alemanüla, pun esap wor eman epwe apwätäi, lupwen a turula.
11Lupwen ruoman ra möürfengen, ra pwichikar. Nge met eman mi alemanüla epwe pwichikar ren?
12Lupwen eman a fiu ngeni eman mi alemanüla, ewe eman mi alemanüla a tongeni kuf, nge ruoman repwe wesewesen akufu ewe mi fiu ngeniir. Iwe, ülüfoch lül mi olafengen resap müttir mwü.
13Eman alüal mi wöüngau, nge a mirit, a mürina seni eman king mi chinlap, nge a umwes, esap chüen mochen rongorong kapasen fön.
14A tongeni fis, pwe ewe alüal a towu seni imwen fötek pwe epwe king, ika a uputiu lon wöüngau lon ewe mwü a nemeni me mürin.
15Üa küna ekewe aramas meinisin mi manau won fanüfan pwe ra päi ngeni ewe alüal mi siwili ewe king.
16Esap wor eman a tongeni aleani ekewe aramas mi nonom fän an nemenem. Nge chokewe mi manau mürin resap chüen pwapwaiti. Ellet pwal ei pön chök, a usun chök turufi asepwäl.