Yosuwe 21:26-44

²⁶Yi taa fu nun e fiilie naxa findi Kehati xa die xabilɛe gbe ra naxee mu nu na Haruna xa die ya ma.

²⁷Gerison xabilɛe naxa taae sɔtɔ Manasi bɔnsɔɛ sɛɛti singe ya ma. E xili Golan, mixi ratanga taa nde naxan na Basan bɔxi ma, Bɛsɛtɛra, nun e fiilie. Na birin nalanxi taa firin.

²⁸E naxee sɔtɔ Isakari bɔnsɔɛ xa bɔxi kui, nee nan ya: Kisiyon, Daberati,

²⁹Yaramuti, Ganimi, nun e fiilie. Na birin nalanxi taa naani.

³⁰E naxee sɔtɔ Aseri bɔnsɔɛ xa bɔxi kui, nee nan ya: Misala, Abadon,

³¹Xɛlɛkati, Rexobo, nun e fiilie. Na birin nalanxi taa naani.

³²E naxee sɔtɔ Nafatali bɔnsɔɛ xa bɔxi kui, nee nan ya: Kedesi, mixi ratanga taa nde naxan na Galile bɔxi kui nun a fiilie, Xamɔti Dɔrɔ nun a fiilie, Karatan nun a fiilie. Na birin nalanxi taa saxan.

³³Gerison xabilɛe naxa taa fu nun saxan sɔtɔ nun e fiilie.

³⁴Lewikae naxee luxi, Merari xabilɛe ra, e naxee sɔtɔ Sabulon bɔnsɔɛ ya ma, nee nan ya: Yokanayimi, Karata,

³⁵Dimina, Nahalali, nun e fiilie. Na birin nalanxi taa naani.

³⁶E naxee sɔtɔ Ruben bɔnsɔɛ xa bɔxi kui, nee nan ya: Beteseri, Yahasi,

³⁷Kedemoti, Mefaati, nun e fiilie. Na birin nalanxi taa naani.

³⁸E naxee sɔtɔ Gadi bɔnsɔɛ xa bɔxi kui, nee nan ya: Ramoti, mixi ratanga taa nde naxan na Galadi bɔxi kui, Maxanayimi,

³⁹Xɛsibɔn, Yaasɛri, nun e fiilie. Na birin nalanxi taa naani.

⁴⁰Taa naxee birin fixi Merari xabilɛe ma, e ralanxi taa fu nun firin.

⁴¹Taa naxee birin fixi Lewi bɔnsɔɛ ma Isirayilakae xa bɔxi kui, e ralanxi taa tongo naani nun solomasaxan, nun e rabilinyie.

⁴²Fiilie nu na taae birin nabilinxi.

⁴³Alatala naxa na bɔxi birin fi Isirayilakae ma alɔ a a laayidi e benbae bɛ ki naxɛ. Na bɔxi birin naxa findi e gbe ra, e naxa sabati naa.

⁴⁴Alatala naxa bɔɲɛsa fi e ma e naaninyi birin na, alɔ a a laayidi e benbae bɛ ki naxɛ. E yaxui yo mu nɔ xunnakeli sɔtɔde e xun, barima Alatala e yaxui birin sa nɛ e sagoe.