Josua 21:26-44

²⁶Iwe, ekewe lusun familien lon ewe eterekesin Kohat ra angei ükükün engol telinimw, pwal ekewe fanü ünükür fän iten nöür man.

²⁷Nge chon ewe eterekesin Kerson, ir seni ewe ainangen Lefi, ra angei seni esopun ewe ainangen Manasa ewe telinimw Kolan lon Pasan ewe telinimwen op, pwal Pestera me ekewe fanü ünükür fän iten nöür man, ükükün ruu telinimw.

²⁸Iwe, seni ewe ainangen Isakar ra angei Kision me Taperat,

²⁹Jarmut me En-kanim pwal ekewe fanü ünükür fän iten nöür man, ükükün rüanü telinimw.

³⁰Nge seni ewe ainangen Aser ra pwal angei ekewe telinimw Misal me Apton,

³¹Helkat me Rehop, pwal ekewe fanü ünükür fän iten nöür man, ükükün rüanü telinimw.

³²Iwe, seni ewe ainangen Naftali ra angei ekewe telinimw Kates lon Kaliläa, ewe telinimwen op, Hamot-tor me Kartan, pwal ekewe fanü ünükür fän iten nöür man, ükükün ülüngat telinimw.

³³Iwe, ekewe familien lon ewe eterekesin Kerson ra angei ükükün engol me ülüngat telinimw, pwal ekewe fanü ünükür fän iten nöür man.

³⁴Iwe, ekewe lusun chon ewe ainangen Lefi, ir familien lon ewe eterekesin Merari ra angei seni ewe ainangen Sepulon ekewe telinimw Jokneam me Karta,

³⁵Timna me Nahalal, pwal ekewe fanü ünükür fän iten nöür man, ükükün rüanü telinimw.

³⁶Iwe, seni ewe ainangen Rupen ra angei ekewe telinimw Peser me Jahas,

³⁷Ketemot me Mefaat, pwal ekewe fanü ünükür fän iten nöür man, ükükün rüanü telinimw.

³⁸Nge seni ewe ainangen Kat ra angei ekewe telinimw Ramot lon Kiliat ewe telinimwen op, pwal Mahanaim,

³⁹Hespon me Jaser, pwal ekewe fanü ünükür fän iten nöür man, ükükün rüanü telinimw.

⁴⁰Iwe, ekewe familien lon ewe eterekesin Merari, ir lusun chon ewe ainangen Lefi, ra angei ren üttüt ükükün engol me ruu telinimw.

⁴¹Iwe, chon ewe ainangen Lefi ra angei seni lein fanüen ekewe aramasen Israel ükükün faik me walu telinimw, pwal ekewe fanü ünükür fän iten nöür man.

⁴²Iwe, eu me eu ekei telinimw a wor fanü pwelin ünükün fän iten nöür man. Iei usun lapalapen ekei telinimw meinisin.

⁴³Iei usun ewe Samol mi Lapalap a ngeni chon Israel unusen ewe fanü a fen pwon fän akapel ngeni ar kewe lewo. Iwe, ra angei fanüer o nonom lon.

⁴⁴Iwe, ewe Samol mi Lapalap a fang ngeniir kinamwe ekis meinisin, usun a fen pwon ngeni ar kewe lewo. Esap wor eman chon oputeer a tongeni ü ngeniir, pun ewe Samol mi Lapalap a awinner, pwe ra akufu chon oputeer meinisin.