Yosuwe 13:22-32

²²Aka Yisrayel ŋanadifɛ afum alɔma sakma səŋan. Wəgbal kəsəŋc Balam wan ka Beyɔr ɛnayi ŋa dacɔ.

²³Kələŋcər ka antɔf ŋa aka Ruben ntende dec dɛŋkale mɔ kənayɔnɛ kəŋgbɔkɔ ka Yurdɛn. Kɛ ka aka Ruben kənayi kaŋkɔ dəcor cor: Sədare səpɔŋ kɔ sədare səfɛt sa si.

²⁴Musa ɛnasɔŋ antɔf aka kusuŋka ka Kadu dəcor cor.

²⁵Ŋa ŋanasɔtɔ dare da Yaser, sədare sa Kaladu, kɔ antɔf ŋa aka Amɔŋ dacɔ haŋ dare da Arower ndɛ dɛntɛfərnɛ dare da Raba mɔ,

²⁶kɔ kəyɛfɛ ka Hesbon haŋ dare da Ramat-Mispe, kɔ Betonim, kəbəp ka dare da Mahanayim haŋ nde kələŋcər ka antɔf ŋa Debir.

²⁷Kɛ kəŋan kəlɛkɛnɛ sədare sa Bɛt-Haram nde daranta, Bɛt-Nimra, Sukɔt kɔ Cafɔŋ, kɔ pɛlpəs pa dɛbɛ da Sihɔŋ wəbɛ wəka Hesbon, kəlɛkɛnɛ antɔf ŋa Yurdɛn kəsək ntende dec dɛmpɛ mɔ haŋ dəkələpsər da kəba ka Kinarot.

²⁸Kɛ ka aka Kadu kənayi kaŋkɔ dəcor cor: Sədare səpɔŋ kɔ sədare səfɛt sa si.

²⁹Musa ɛnasɔŋ kusuŋka dacɔ ka aka Manase ntɔf dəcor dəcor.

³⁰Ŋa ŋanasɔtɔ ntɔf nyɛ yɛnayɔnɛ kəyɛfɛ Mahanayim, Basan məlməl, dɛbɛ da Oku wəbɛ wəka Basan fəp kəlɛkɛnɛ ka sədare wəco camət-tin sa cəbal ca antɔf ŋa Yahir nde Basan,

³¹antɔf dacɔ ŋa Kaladu, dare da Astarot, kɔ dare da Edereyi, sədare sa Oku wəbɛ wəka Basan. Anasɔŋ afum dacɔ a Makir wan ka Manase antɔf ŋaŋɔkɔ dəcor cor.

³²Ntɔf yayɔkɔ yɔ Musa ɛnasɔŋəs nde aranta ŋa Mohab, Yurdɛn kəsək ntende dec dɛmpɛ mɔ, pəntɛfərɛnɛ kɔ Yeriko.