Yesu Tɔ̃rɛ̀ 22:15-30

¹⁵Fɔ̃́ɔ̃̀ yóó nɑ́kɛ́ o kpɛ́í bɛnìtìbɛ̀ bɛmɔu ɑ kèè tì nɛ̀ ɑ yɑ̀ dɛ̀.

¹⁶A tɛ̃́nkɛ bɑɑ bɑ? Ítɛ́ kɛ̀ bɛ̀ dɑ ɑ̃nnɛ́ bɑ̀tɛ́mmù kɑ̀ɑ duɔ́ nhɑmɑ́ɑ̀ ti Yiɛ̀, nkòò dɑ ɔ́útɛ́ ɑ yɛi.

¹⁷Kɛ̀ n wɛ̃tɛní Sedisɑdɛmmu, kɛ́mbɑ́ɑ́ nKuyie nku cĩ́ɛ̃̀tɛ̀ miɛkɛ.

¹⁸Kɛ̀ ti Yiɛ̀ nni mbɛnkɛ omɑ́ɑ̀ kɛ́ n nɑ́kɛ́ kɛ dɔ̀: Ítɛ́ kɛ́yɛ̀ Sedisɑdɛmmu mɛcɑ̃ɑ̃ nkɛ yɛ̃́ bɛ̀ í yóó yiemmɛ̀ ɑ bɛ̀ nɑ̀ɑ́ ntì n kpɛ́í.

¹⁹Kɛ̀ n dɔ̀: N Yiɛ̀, mbɛ̀ yɛ̃́mu bɛ mɔ́mmɔmbɛ míì do kɔrìmɛ̀ titííntouti kɛ pĩĩ nhɑ kɔbɛ kɛ bɛ̀ puotì, kɛ bɛ̀ kpetì.

²⁰Bɛ̀ do kɔù ɑ kóo tɔ̃ntì Etiɛnni kɛ̀ m bomu kɛ wɛ̃nnɛ̀ bɛ̀ɛ̀ ò kɔ̀ù, kɛ bɑɑ bɛ yɑ̀ɑ̀tì.

²¹Kɛ̀ ti Yiɛ̀ nni nnɑ́kɛ́ kɛ dɔ̀: N yóó dɑ tɔ̃ ndɛdɛ́tirɛ̀ ndɛ bɛ̀ɛ̀ í tú Sifubɛ bɛ borɛ̀.

²²Pɔɔri do nɑ́ɑ́ kɛ̀ bɛ̀ kèḿmúmu, bɛ̀ nɛ́ kèè dìì mɔ̀nnì bɛ̀ɛ̀ í tú Sifubɛ bɛ kpɛti kɛ́wekíí kɛ dɔ̀: Kuɔnɛ̀ onìtì yie, nwè í dò nkɛ́nfòù.

²³Kɛ̀ bɛ̀ nwékíí kɛ buɔǹkoo bɛ yɑ̀ɑ̀tì kɛ dɛ́i mutɑ̃́ɑ̃́.

²⁴Kɛ̀ bɛhɑ̃ɑ̃pɔ̀mbɛ̀ kóo kótìi duɔ́ nkɛ̀ bɛ̀ɛ tɑnnɛ́ Pɔɔri tɛhɑ̃ɑ̃pɔ̀ncĩ́ɛ̃̀tɛ̀, kɛ bo ò puotí yɛdɑ́, kòo nɑ́kɛ́ mùù te kɛ̀ bɛnìtìbɛ̀ miɛkɛ ò cɔ̀ú.

²⁵Kóò tɑ̀ú nkɛ bo ò puotí, kòo bekɛ kuhɑ̃ɑ̃pɔ̀nkù kùù do bɛ̀ bɑ̀ɑ dɛ kó diyiè kɛ dɔ̀: Di mɔkɛ kucɛ kɛ bo puotí Odommu kou kɛ í ò bekɛ́nɑ̀ɑ̀?

²⁶Kɛ̀ kùu cokɛ́ kɛ́nɑ́kɛ́ bɛ kóo kótì kɛ dɔ̀: A bo yĩ́mɛ onìtì yie? Ò tu Odommu kou nwe.

²⁷Kòo ɑ̃ɑ̃pɔ̀nkótìi kɔtɛní kɛ́bekɛ Pɔɔri kɛ dɔ̀: A mɛ̀nkɛ tú Odommu kou nweɑ̀? Kòò dɔ̀: Ɛ̃ɛ̃, n we ntú.

²⁸Kòo ɑ̃ɑ̃pɔ̀nkótì dɔ̀: Mí n yietí idíítí nyi mɛdiɛ̀ nkɛ nɑɑ́ nhOdommu kou. Kɛ̀ Pɔɔri dɔ̀: Mí nhò tu nɛ̀ bɛ̀ m pɛitɛ́mɛ̀ mmɛ.

²⁹Bɛ̀ɛ̀ do dɔ́ kóò puotí kɛ̀ bɛ̀ɛ ítɛ́, kɛ̀ kufɔ̃wɑɑ́ mpĩ́ nhohɑ̃ɑ̃pɔ̀nkótì ò duɔ́mmɛ̀ kɛ̀ bɛ̀ boú mɛfĩmmɛ Odommu kou.

³⁰Kɛ̀ dɛ̀ɛ wentɛ́ kòo ɑ̃ɑ̃pɔ̀nkótì ndɔ́ kɛ́yɑ̀ mùù te kɛ̀ bɛ̀ pĩ mPɔɔri, kɛ tíí nyikuɔ́ nìùbɛ̀ kó bɛkótíbɛ̀ nɛ̀ bɛbeémbɛ̀ kɛ́boutɛ́ Pɔɔri mɛfĩmmɛ kɛ́cṹũnní kɛ́cónnɛ́ bɛ cuokɛ̀.