Apostel 22:15-30

¹⁵Ngangau jidni tinkari ngankanietja nganala nganai nunkangu, kanani warupotuni, nunkangundru, mina jundru najina warai ja ngarana warai.

¹⁶Ja karari, minandru jundru ngujawakai? Terkala tarau, ja nlultibanila madlentjandru kulirkala maniau, ja Kaparaia tala karkau!

¹⁷Jendranguta ngani Jerusalemia matja tikana, ja ngani Godaia pungani ngatjinani, ngani ngaramarlarina wonti.

¹⁸Ja ngato ninaia najina wonti, Nauja ngakangu jatanani: Mindriau, ja nurujeli Jerusalemingundru puntiau, ngangau tanali jinkani tinkari ngankani ngakangundru wata patala nganai.

¹⁹Ja ngani jatana wonti: Kaparajai, tana munta milkila, ngato tanana, jinkangu morlalu ngundrana, jaura pungani wirrieli mandrana wonti, ja kanjangari pungani widmana wonti.

²⁰Ja jendranguta Stephanani jinkanaia tinkari ngankanietjaia kumari matja ngakana, bakana ngani munta naka terkana wonti, ja nunkani nari ngantjana wonti, ja tanani kati ngamalkiribamalina wonti, tanali nina nari ngankana wonti.

²¹Ja Nauja jatana wonti ngakangu: Wapau, ngangau ngato jidna kana koni jinpala nganai.”

²²Tanali nina ngarana wonti nunkangupini jauranilu, ja tana ngaiala tanani miririna wonti ja jatana wonti: “Ninapjni mitandru teribanau, ngangau jenia wata talku nganai, nauja tepi ngamananto!”

²³Tana maritjinani, ja tanani kati woraranani, ja puturu miri teribanani,

²⁴Jendranguta juljaia kaparali jirijiribana wonti, tanali nina juljaia pirini wapalkananto, ja jatana wonti, tanali nina wirrieli nandranali jakalkananto, ngangau nulu ngujamananto, minandru tana nunkangundru jenia miritja ngankai.

²⁵Tanali nina ngutana ngurakatibinani wirria, Paulus nunkangu juljaia kapakaparani, nau karakara terkanani jatana wonti: “Jenia jurangu manuni kurala wapaia, kana kulno, nau Romala nganai, kalala kurani panini nandrala?”

²⁶Juljaia kapakaparali jenia matja ngarana, nau juljaia kaparani wapana wonti ja nunkangu kaukaubana wonti ja jatana wonti: “Mina jundru ngundrai ngankala? Naupini kana Romala nganai.”

²⁷Juljaia kapara karakararina wonti ja nunkangu jatana wonti: “Jatau ngakangu, jidni Romala?” Nau jatana wonti: “Kau.”

²⁸Juljaia kaparali kalabana wonti: “Ngato kalala pirnali ninata nguraia burungankanala. Paulus jatana wonti: “Ngani bakana Romala dankana wonti.”

²⁹Nurujeli tanali nina worarana wonti, tanali nina jakalkananto; ja juljaia kapara japali pantjina wonti, nulu matja ngarana, nau Romala nganai, ja ngangau nulu nina dupupu ngankana wonti.

³⁰Ditji kulnuni nulu ngantjana wonti morlalu ngujamala, minandru Juda kanali nunkangu ngulkuterkala wiri, ja nulu nina dukarana wonti ja jirijiribana wonti, Priesta pirna ja kapara pratjana jurborinanto; ja nulu Paulus ngarilkana wonti, ja nina tanangu terkibana wonti.