Hechos 22:15-30

¹⁵Miara iki kaai, ja min oinna itan min ninkatabo, jatíbi jonibo jaakiriakin jato yoiai.

¹⁶Jaskara iken, moa basiyamai, wenitax bautizameexon, ja non Ibo yokáwe, min ochabo mia soaxonon’, akin.

¹⁷Jatian iiti, Jerusalénhain joríbaax, Dios rabiti xobonko ea kaa iki orani. Jainxonra en westíora namá keska meran oinna iki.

¹⁸Enra non Ibo oinna iki, janra ea neskáakin yoia iki: ‘Ishton Jerusalénhainoax pikówe, nenonxonra mia ikonhayamai bokanai, ekiriakin min jato yoiaitian’, akin ea akai.

¹⁹Ea jaskáaketian en yoia iki: ‘Ibó, jabaonra onanke, jain tsinkiti xobotiibi kaxon, ja mia ikonhaibo cárcel meran axon en jato rishkipachoaibo.

²⁰Jatian ja miikiriti iká joibo yoiai min joni Esteban retekanontianra, earibi jaskáatin keena ikax, ja akanaitian oinnira ea jain iká iki, jainxonribi jan reteaibaon choparibi en jato koiranxona iki’, akin.

²¹Ikaxbi non Ibon ea yoia iki: ‘Katanwe ja ochokea jemamea joniboibara en mia raanai’ ”, akin.

²²Jaskáaketian, jain senenres Pablo ninkáxonkana iki. Jainoaxa neskati saa iki peokookana iki: “¡Nato jonira moa jati yamake! ¡Moara nato neten yamati jake!” iki.

²³Jatian jaton chopabo jopexon perenhayananbi, mai potobo bochiki potai saa iki jenéyamakanaitian,

²⁴ja comandanten jato yoia iki, *cuartel meran ja Pablo jikimakanti. Jainxon jato yoia iki, jawekopíkayaki, jaki jakonmaati saa ikanai ixon, onannoxon rishkianan yokáti.

²⁵Jatian moa jayá, rishkinoxon nexakankebi, jain itina jaton *capitán, Pablon yokata iki: —¿Akiai esekan yoikin, ja westíora romamea joni, koshibaon keshamaamabi rishkiti? —akin.

²⁶Jaskáketian ninkatax kaxon ja *capitánman comandante keshana iki: —¿Minki jaweakai? Natora romamea joni iki —akin.

²⁷Jaskaketian ja comandanten joxon, Pablo yokata iki: —¿Ikonrin mia romamea joni? —akin. Jatian Pablon yoia iki: —Ikon riki —akin.

²⁸Jatian comandanten yoia iki: —Enra icha koríkinin kopíaka, iki romamea joni inoxon —akin. Jatian Pablon neskaa iki: —Eara ikonkon romamea jonishaman iki —akin.

²⁹Jaskati yoyo iketian, ja Pablo rishkiti iwanabo moa jaibakeax ochókana iki. Jatian ja comandanteribi raketa iki, romamea joni ikenbi jato cadenaninbo nexamaax.

³⁰Jatian nete xabáketian, jakopíshaman judíobaon Pablo jakonmaakin yoikanai, kikinshamanhakin onankaskin, comandanten choroa iki. Jainxonra ja *sacerdotebaon koshiboyabi judíobaon koshibo jato tsinkia iki. Jaskáaxonra pikobainkin boxon, ja tsinkíkanabo bebon Pablo akana iki.