APOSETOLO EDIA KARA 22:15-30

¹⁵Badina be, ia dainai, oi itaia bona oi kamonai gaudia do oi gwauraia hedinarai, taunimanima ibounai edia vairanai.

¹⁶Vadaeni, dahaka oi naria? Oi toreisi, bapatiso oi abia, oiemu kara dika ia huria totona, iena ladana dekenai oi boiboi dainai.’

¹⁷“Ierusalema dekenai lau giroa lou, bona Dubu Helaga lalonai lau guriguri noho neganai lau mata hanai.

¹⁸Lohiabada lau itaia. Lau dekenai ia hereva, ia gwau, ‘Kara haraga, Ierusalema oi rakatania haraga, badina be lauegu sivarai oi gwauraia neganai do idia abia dae lasi.’

¹⁹Lau gwau, ‘Lohiabada e, idia diba lau be guna lau lao dubu ibounai, oi dekenai abidadama taudia dibura ruma lalonai lau koua bona lau dadabaia.

²⁰Oiemu hereva gwauraia tauna Stefano idia alaia neganai, lau danu idia dekenai lau gini, inai ala-ala taudia edia kara lau hanamoa, bona edia dabua lau naria.’

²¹To Iesu ese lau dekenai ia hereva, ia gwau, ‘Vadaeni, oi lao. Oi do lau siaia lao, gabu daudau dekenai, idau bese taudia dekenai.’ ”

²²Idia ese Paulo dekenai idia kamonai ela bona inai hereva, vadaeni, idia boiboi, idia gwau, “Abia lao, alaia mase! Inai bamona tauna ia noho tanobada be namo lasi.”

²³Idia boiboi, bona edia kouti dabua idia negea, bona kahu danu idia negea daekau.

²⁴Unai dainai tuari biaguna ese iena tuari taudia dekenai oda ia gwauraia, tuari rumana lalonai Paulo idia hakaua vareai. Ia gwau Paulo do idia dadabaia, bona do idia henanadaia, Iuda taudia edia dagedage badina be dahaka.

²⁵To idia ese Paulo idia kwatua hegaegae dadabaia totona neganai, Paulo ese iena badinai ia gini kapena dekenai ia nanadaia, ia gwau, “Taravatu be ia gwau dahaka? Bema ia be kota lasi guna, Roma tauna umui dadabaia diba, o lasi?”

²⁶Kapena ese inai hereva ia kamonai neganai, ia lao, tuari biaguna dekenai ia hamaoroa, ia gwau, “Dahaka oi karaia noho? Badina be inai tau be Roma tauna.”

²⁷Tuari biaguna ia lao, Paulo dekenai ia gwau, “Oi hamaoroa lau, oi be Roma tauna, a?” Paulo ia gwau, “Oibe.”

²⁸Tuari biaguna ia gwau, “Roma tauna ena dagi be lau hoia moni badana dekenai.” Paulo ia gwau, “To lau be inai dagi lalonai lau vara.”

²⁹Vadaeni nega tamona Paulo idia dadabaia gwauraia taudia be idia rakatania. Tuari biaguna danu ia gari, badina be hari ia diba vadaeni Paulo be Roma tauna, bona ia ese ia kwatua kava dainai.

³⁰Kerukeru dina, tuari biaguna ia ura diba momokani dahaka badina Iuda taudia ese Paulo idia samania. Unai dainai ia ese kwatua auri ia kokia, bona dubu biagudia bona Kaunsolo ibounai dekenai ia boiboi, do idia hebou. Vadaeni, ia ese Paulo ia hakaua diho, bona idia edia vairana dekenai ia haginia.