1Abaho nimona msenga iyagwe kohumuluka kuulanga. Kakala na udahi mkulu na isi imwemweselwa kwa mng'alo wake.
2Kalonga kwa sauti ng'hulu, “Kugwa! buga kulu da Babeli kugwa! Sambi kawa kae ya vinyamkela na loho zihile, kawa kae ya ndege wehile na wanyama wogevuza.
3Kwavija wanhu wa isi wakoligwa kwa divai kali ya kuwatenda wasulukile ugoni wake, na wandewa wakulu wa mwiisi watenda nayo ugoni. Na wachuuza vinhu wa mwiisi wapata ugoli kwa kusulukila kwake vinhu vihile.”
4Abaho mhulika sauti iyagwe kulawa kuulanga ilonga, “Wanhu zangu, segeleni kudibuga da Babeli, muladi sekemuilumbe nayo mzinzambi zake, sekemupate nhaguso yake.
5Kwavija nzambi zake nyingi ng'hani ziilundiza mbaka kuulanga, nayo Mulungu kazikumbuka nzambi zake.
6Mtendeleni kamba viyawatendele mweye, mlipeni miyanza mibili ya vija viyatendile. Mhanganyileni mkikasi chake kinhu kikali cha kung'wa miyanza mibili ya vija viyawagwelele mweye.
7Mgweeni usungu na magayo makulu, kamba viyakalile kwa ugima wa kubwihila ng'hani na kuitapa. Kwavija kalonga muumoyo wake, ‘Niye nokala kamba malikia! Niye sili mgane, na niye sikujuwile bule kuiyalala!’
8Mbuli ya gago mikubulo impata kwa siku dimoja, mitamu na kunyunyuwala na lufilili lwa nzala. Kosomigwa moto, kwavija Mndewa Mulungu yomtagusa kana udahi.”
9Wandewa wa mwiisi watendile nayo ugoni na kukala nayo ugima wa kubwihila woiyalala na kulila vonda wone yosi da kubanangigwa kwake.
10Wokwima kutali kwa kudumba magayo gake na wolonga, “Kogaya! Kogaya gweye Babeli buga kulu dili na udahi! Kwavija kutagusigwa kwa saa dimoja diiyeka!”
11Vivija wachuuza vinhu wa mwiisi wolila na kumuyalalila, kwavija kuduhu munhu kabili yogula vinhu vao.
12Kuduhu munhu kabili yogula zahabu hebu sente hebu mabwe ga bei ng'hulu na lulu hebu kitani na viwalo va langi ya zambalau hebu nzabi zinogile hebu viwalo vidung'hu, mibiki inung'hila goya, via va mhembe za nhembo, via va mibiki ya bei ng'hulu ng'hani, via va shaba na zuma na malumalu,
13mdalasini na vinhu va kugela mwiimboga na ubani na manemane na udi na divai na mavuta na usage na ngano na ng'ombe na ng'hondolo, falasi na mituka ya kubulula, watumwa na ugima wa wanhu.
14Wao wachuuza vinhu womulongela, “Vinhu vose vinogile viubetele visegela, na ugoli na ukulu ukuhonyoka, na hudaha kuvipata kabili!”
15Wanhu wochuuza vinhu wapatile ugoli mbuli ya buga dijo, wokwima kutali mbuli ya bwembwe da magayo gake, woiyalala na kulila,
16wolonga, “Kugaya! Kugaya buga kulu! Kuzoela kuvala viwalo va kitani na langi ya zambalau na udung'hu, na kuihamba kwa vinhu va zahabu na mabwe ga bei ng'hulu na lulu!
17Kwa saa dimoja diiyeka ugoli wako upotela!” Abaho walosaji wose na wanhu wokwela meli, na wanhu wosang'hana mwiimeli na wanhu wose wosang'hana mbahali, wema kutali,
18viwajone yosi da moto ukalile udilukuza walila kwa sauti, “Hadina lawilila buga diyagwe kamba buga dino kulu!”
19Wagoga mmapala gao, walila na kuiyalala, “Kugaya! Kugaya buga kulu! Kwavija wanhu wose weli na meli zigenda mbahali wapata ugoli kubitila ugoli wako. Na kwa saa dimoja diiyeka kwagiza kila kinhu!”
20Ulanga, deng'helela mbuli ya kunangika kwake. Wanhu wa Mulungu na watumigwa na watula ndagu, deng'heleleni! Kwavija Mulungu kaditagusa mbuli ya gaja gayasang'hane kumwenu.
21Abaho, msenga imoja wa kuulanga yeli na udahi kenula dibwe diigalile na dibwe kulu da kudugila, kajasa mbahali kuno kolonga, “Vino vivo vonda jasigwe kwa nguvu, buga kulu da Babeli na honda joneke kabili.
22Sauti za bango na sauti za vilonge longe na mhalati, honda zihulikigwe kabili mgati mwako! Kuduhu munhu yoyose yosang'hana yonda yahulikigwe kabili mgati mmwako, hebu sauti za dibwe da kudugila honda zihulikigwe kabili mgati mmwako.
23Mulenge wa taa honda woneke kabili mgati mmwako, na sauti ya munhu yosola na mtwanzi yosoligwa honda zihulikigwe kabili mgati mmwako. Wachuuza vinhu wako wakala wakulu mwiisi na kwa uhawi wako kuwagiza wanhu wose wa mwiisi!”
24Buga dijo da Babeli ditagusigwa kwavija mgati mmwake yoneka damu ya watula ndagu wa Mulungu na damu ya wanhu wa Mulungu na damu ya wanhu wose wakomigwe mwiisi.
