1Lee kadugo na a nɛ mɛlɛkɛ watii nidigiŋɛ ɲa na yìri fugba we ni. Sefɛɛrɛ nigbɔɔrɔ wa wu mu, wu nɔɔrɔ wʼa kpɛɛngɛ yeege ɲiŋɛ ki kabaya yi bɛɛri na.
2A wu jo ni mujuugbɔɔ ni na: «Babilɔni kugbɔɔ lʼa ja! Lʼa ja! Lʼa bye jinaa tatɛɛngɛ, ni munaakuuŋɔɔ bɛɛri taŋmɔhɔŋɔ, ni tɔnbɛn-shazhinɔrɔyɔ ye bɛɛri taŋmɔhɔŋɔ.
3Bani shi wu bɛɛri ya dɔdɔɔrɔ pye ni li ni, fo na ɲawɔhɔ wɔ puyɛ na kanna duvɛn pʼa gba. Ɲiŋɛ ki saannaa ya dɔdɔɔrɔ pye ni li ni, ɲiŋɛ ki jagipyii pʼa pye kabyaa fɛɛ li yaŋmuzaaya niɲɛhɛyɛ yi wuu na.»
4Lee kadugo na a nɛ jomɔ pa bɛ logo na yìri fugba we ni na: «Na sipyii, yi foro Babilɔni ni, kɔnhɔ yi ganha bu da bye wu wɔɲii wu jurumu wu ni, wu kanhama nigbɔ pa di ba nɔ yi na wɛ.
5Bani wu jurumu wʼa pinnɛ wuyɛ ɲuŋɔ ni, fo wu toŋɔ kʼa nɔ fugba we ni. A Kilɛ di wu funŋɔ yaha nidogo Babilɔni tiibaara ti na.
6Wʼa pusamaa saraa saraagana lemu na ge, yi wuyɛ pyaa ki saraa lee saraagana li na. Wu jurumu wʼa bɛ ni kanhama pemu ni ge, yi pee tɛhɛɛ shuun kan wu mu. Wʼa bi cɛɛgbuu li funŋɔ yagbaga kemu kaan pusamaa mu pu na gbuu ge, yi kee ɲɔhɔ shuun kan wu mu, kemu fanha kʼa ɲɛhɛ xuuni ge.
7Wʼa wuyɛ pɛlɛ ni yaŋmuzaaya yemu da ni ge, yi yee ɲɔhɔ kanhama ni mɛsuu nɔ wu na. Bani wʼa yi jo wuyɛ funŋɔ ni na: ‹Nɛ ɲɛ saanzhɔ, nɛ nidɛɛngɛ ki wa naha. Nɛ ɲɛ naxhugoshɔ wɛ. Yamɛɛ da ga nɔ nɛ na bada wɛ.›
8Lee wuu na li kanhama na ba do li ɲuŋɔ ni caŋa nigin: xu ni yamɛhɛɛ ni xuugbɔhɔ. Na bɛ na ba li sòrogo fɛɛfɛɛ, bani Kilɛ we wʼa da ba kiiri kɔn li na ge, wee ɲɛ sefɛɛrɛ fɔɔ.
9«Ɲiŋɛ ki saannaa piimu ni lʼa bye kariɲɛɛgɛ ki ni, dɔdɔɔrɔ ni naafuugbɔ wu wo fɛrɛmɛ pu ni ge, pee ba li nizogoŋɔ wurege ɲa tuun wemu ni, pee na da mɛhɛɛ suu na sipyaa waa li wuu na.
10Pee na ba yere taliige ni li kanhama pu ɲìi fyaara wuu na, na yu: ‹Bɔɔngɔ! Bɔɔngɔ! Babilɔni kugbɔɔ, kulo fanha wuu! Ma kiiri wʼa to ma ɲuŋɔ ni taapile nigin funŋɔ ni.›
11«Ɲiŋɛ ki jagipyii pu bɛ ɲɛ na mɛhɛɛ suu, na sipyaa waa ɲatanhaŋa keŋɛ ni li wuu na; bani wa shishiin ya pu jagi yaŋmuyɔ shuu nige wɛ.
12Yee ɲɛ: Sanni, warifyɛn, pɛɛwa kagereye, ni pɛɛwa kuun, ni pɛɛwa fapilɛpilɛgɛɛ, ni saannaa fàya: Ya na ɲaaŋa, ya dʼa ɲaaŋa gbanhaa; ni pɛɛwa fàya ya yemu yʼa peŋi peŋi ge, ni nudanga tiye, ni yaŋmuyɔ ye yʼa yàa ni suu ganhaa ni, kelee ni pɛɛwa tiye ni ge, ni daɲaa tɔɔrɔ, ni tɔɔrɔ yaŋmuyɔ, ni yaŋmuyɔ ye pʼa tɛ yʼi ɲɛ pɛɛwa faaya ge,
13ni shiga yaŋmuyɔ nudanga woyo yemu mɛgɛ ki ɲɛ kanɛli ge, ni lasikoli, ni nudanga Izopu, ni nudanga yawurire, ni duvɛn, ni sìnmɛ, ni farini myɛ nizaama, ni shinma, ni niiyɛ, ni dubyaa, ni shɔnyɔ, ni wotoriyo, ni buloo, ali ni sipyii bɛ.
14Pu na ba yu: ‹Yaŋmuyɔ ye mʼa sha ge, yee ya foro ma keye ni. Naafuugbɔ we, ni ɲafɛ yaŋmuyɔ ye, mʼa buun yi bɛɛri ni. Ma da já yee ta nige wɛ.›
15Yee yaŋmuyɔ yi wo jagipyii piimu pʼa pye kabyaa fɛɛ lee kugbɔɔ li gbɔɔrɔ ni ge; kanhama pe pu da ba nɔ li na ge, pee na ba yere taliige ni pee kanhama pu wo fyaara wuu na, na mɛhɛɛ suu na sipyaa waa ɲatanhaŋa keŋɛ ni.
16na yu: ‹Bɔɔngɔ! Bɔɔngɔ ki ɲɛ kugbɔɔ li wogo! Lee lemu lʼa bi faɲɛɛyɛ ni faɲɛɛyɛ gbanhaa, ni pɛɛwa fapilɛpilɛgɛɛ leni, na liyɛ puu ni sanni ni pɛɛwa fàya, ni pɛɛwa kuun ni ge, li kabyaa kʼa kyɛɛgi taapile nigin funŋɔ ni!›
17«Suumɔ lɔhɔ kɔrɔyɔ yi ɲuŋɔfɛɛ pu bɛɛri ni piimu pʼa ɲaagaa pyi ki na ge, ni kɔrɔyɔ yi kapyeŋɛɛ pyevɛɛ ni jagipyii piimu pʼa pu ɲɔlige taa suumɔ lɔhɔ ki na ge, a pee di yere taliige ni.
18Pʼa lee kulo li sòrogo sòrogo wurege ɲa ge, a pʼi ganha na mujoŋɔɔ waa na yu: ‹Kulo lekɛ lʼa le kugbɔɔ le xɔ wɛ?›
19A pʼi gbazhɛnhɛ wo pu ɲuyɔ ni na mɛhɛɛ su na sipyaa wa ɲatanhaŋa keŋɛ ni na: ‹Bɔɔngɔ! Bɔɔngɔ ki wa le kugbɔɔ le wogo! Suumɔ lɔhɔ kɔrɔyɔ yi fɛɛ bɛɛri ya pye kabyaa fɛɛ li baraga ni. A lee di buun li funŋɔ yaŋmuyɔ yi ni taapile nigin yɛ funŋɔ ni!
20Fugba wu fundanga ta! Tudunmɔɔ, ni Kilɛ tudunmɔɔ, ni Kilɛ ya piimu bɛ pye fɛɛfɛɛ ge, yee bɛ pu fundanga ta! Bani Kilɛ ya kiiri kɔn li na li kakuuyo yi footɔnɔ, yemu lʼa pye yee na ge.›»
21Wee tuun wu ni a mɛlɛkɛ baraga wo wa di faakagereŋɛ ka lɔ ba tira ɲɛ wɛ, na ki wá suumɔ lɔhɔ ki ni, na jo: «Mu Babilɔni kugbɔɔ li da ba ja fɛɛfɛɛ taapile ni, li da ɲa nige wɛ.
22Konɔyɔ, ni ciire, ni sibeŋɛɛ, ni maya, kee ka shishiin mɛɛ da ga ba foro nige Babilɔni ni wɛ. Kapyebye wa shishiin da ba da mu ni nige wɛ. Tira tunmɔ pa shishiin bɛ da ba logo ma funŋɔ ni wɛ.
23Sokinna kpɛɛngɛ ka shishiin bɛ da ga bye mu funŋɔ ni nige wɛ. Cenabun poo ni cenabun mujuu da ga foro nige mu funŋɔ ni wɛ. Bani mu jagipyii pʼa pye ɲiŋɛ ki sipyigbɔɔ. Mu siganma pʼa bi shi wu bɛɛri ɲaha wɔ.
24Kilɛ tudunmɔɔ, ni Kilɛ ya sipyii piimu bɛ pye fɛɛfɛɛ ge, ni sipyiire temu bɛɛri tʼa gbo ɲiŋɛ ki na ge, pee bɛɛri shishan ya ɲa le kulo le funŋɔ ni.»
