1Worek, ada heri, anadii ejel por rii heven heechiya sakar. Riiti siitii kowu tawa boboy eeta harapa tar. Riiti okoree tar haba diita eyey nosapek buya tar.
2Rii sakachi harapa ayak uwachi eecha wor: “Sii eeta sakar. Harapa Bebilon akama sakar. Nokwapa nokwapa kapasek spirit ye, Sekiyawas ye eeka yichu. Nokwapa nokwapa kapasek keha tawa yuyawa tawa apo ye iibak yichu.
3Sii otiichirek, eyey ma yechaka eecha siiti nobo anemesheroko tar wain ukun yechaka eecha atar. Diita nosapen aka tabo yi ma ye siina nobo anemesherokobatar. Sii harapa nobo anemesheroko weyitari, bisnis ma ye harapa yan yatar.”
4Worek, ada meejir anadii aya hevenek uwar: “Eeji ma mima kwo na eeta akaman heechi geenyek ya saya! Opoche kwopa siitaka kapasek boboy eech otiitanakech. Eeta kapasek boboyen siitak yaneyn, kwona opoche siitaka eecha yatanakech.
5Siiti kapasek boboy diika mowutu. Neereka hayeto. Siita kapasek otii tawa boboyen God riita eena abosuchekasakech.
6Siita kwona eecha otiitari, kwo napa awasen siina eechaba otii. Siita harapa kapasek otiitari, kwo napa siina awasen eechaba harapa upurus na otii. Siita kwona uku atawa boboyen otiichi hatari, kwo napa awasen siina eechaba upurus ha.
7Siita mayama diita nosapek tawa boboy kepin hatari, siiti hin mayama yesokwa tari, kwo napa siina eechaba awasen harapa kapa meeji tawa boboyen ha ta. ‘Ada yichawey, eeta aka tabo yi mimaga eecha tawa. Ada mibiya mima takasakech. Kapa meeji tawa boboy adak yakasakech!”
8Eecha tawak, nokwapa nokwapa kapasek boboy siina podat yadiibak ya hamakiita. Hak otii tawa boboy, kapa meeji tawa boboy, eechi hatawa boboyen siitabak yakiita. Siina hik uwukiita. Wowak, siina anasak tawa Harapa God rii eeta harapa wey hapaga tawa.”
9Diita nosapek aka tabo yima ye siitaka nobo anemesheroko tarek, harapa akama Bebilon hi uwu tanak, yecha siiti hirikan henyak, harapa keya takiita.
10Wonyak, ye siiti kapa meeji tawa boboyen akiitanak, ye eena yapak siitii takiita. Siitii tanak, ye eecha wokiita: “Dii eeta kapasek wey. Awiyo. Awiyo. Siiti eeta hapaga tarek, harapa tar. Awa podat siirek, kapasek boboyek siitak yarek, kapasek siir.”
11Wonyak, diita nosapek tawa bisnis yo otii tawa ma ye eena henyak, yepa inyakapwa hiki tanak keya takiita. Ma ye yechi boboy sagan kawka tokokasakech. Eena keyatar.
12Yechi gol, silva, kwoya hechawa papa, gayetiik, siivatabi kepin, sileka, siivatabi nayim siik, kwowa ya tawa me, elepan riiti pun yeechi otii tawa boboy, mek diigii tawa boboyen harapa yak toko tawey, bras, ain, hapaga papan otii tawa boboy, diita boboy ye kawka tokokasakech.
13Sinamon, kwasaga tawa boboy, kwowa ya tawa boboy, kwowa yatawa boboy kepi; wain uku, akar uku, atawa hikishebu, bulmakau, hos, ka, wakasa man, ma yechi inyaka wopu, diita boboyen yecha kawka tokokasakech.
14Bisnis yo otii tawa ma ye siina eecha wocho: “Eyey boboy nija yak otii tari, ii ninya heechi i hamawa. Niji ya niji ruku sii tawa boboy kepi eeta ninya heechi i hama seechir. Hama seechirek, ni eena kawka hekasakech!”
15Wonyak, eeta bisnis yo otii tawa ma ye eeta akamak eeka bisnis yon otiitarek, harapa yan eeka ya tarek, ye siiti kapa meeji tawa boboyen harapa akiichi yapak siitiichi keya takiita.
16Keya tanak, eecha wochakiita: “Awiyo. Awiyo. Dii eeta kapasek wey siito! Eeta harapa akama sii kapasek wey tawa. Mashi sii siivatabi kepin, nayim siik tawa siivatabin ruwuniga, gol, gayetiik, kwoya hechawa papan wakiiretar.
17Apa awa podat eeta eyey biish woy biish siir.” Wonyak, jabiir yechi kepten, akar nosapek jabiirek ichawa ma, jabiir yon otii tawa ma, eyey akar ma ye somwakwotii tawa pak ya yon otii tawey, ye yapak siitii tarek, siiti hirikan her.
18Hechi ye uwachi eecha wor: “Akar siitak tawa harapa akama diita akamaga eecha tawa?”
19Worek, ye nosapen teenyechi neerek rabo poworek, awasen yechi masekiik sakar. Ye keyaniga eecha wor: “Awiyo. Eeta kapasek wey siito. Kapasek boboy harapa akama siitak yar. Eyey ma ye somakwotii tawa pak jabiirek ta ye i tari, harapa yan eeta akamak eeka yatari, awa podat eeta eyey kapasek wey siir!”
20“God riiti ma mima, hevenek tawa ma mima, aposel ma, piirapet ma kwo napa kwoya woy hiki ta! Eeta harapa akama siin God riita pi hama seechir. Siita kwona kapasek otii tarek, eena God riita siina awasen anaseechiniga kapasek otiir!”
21Worek, harapa hapaga tar ejel por rii harapa papan yeechi somakwotii tawa pak rabochirek, ir. Irek, rii eecha wor: “Ada diita papan robochirek, irega, harapa akama Bebilon siina harapa ow ana pichi rabo poyikiita. Wonyak, siin kawka hekasakech.
22Wonyak, sagey piita tawa boboy, gita, mupugu, hokwa yapo ya tawa boboy, eyey eecha otii yey tawa boboyen kawka meejikasakech. Yo otii tawa ma ye nin sakapa kawka hekiitawak. Wit hikishebo otiitawa masin aya kawka nijak meejikasakech.
23Niji haba buyakasakech. Ma mima reeviisii tawa maji kawka nijaka meejikasakech. Niji bisnis yo otii tar ma ye hapaga siitar. Niji neeki yesokwa tar boboy kapasek eeta diita nosapek tar eyey ma miman woshepii tar!”
24Diita akama sii piirapet yenya God riiti ma mima yenya pi sowakwotarek, yechi pi nosapek sakarek, eyey diita nosapek pi sowakwor ma mima yechi pi eeka sakarek, God riita eena heri kwotayechi eeta akaman pi hama seechir.
