1Eme no aŋelo moc sambâŋkonec wahame honepo. E tâpiri kâcɋene focnewec â tatamac‐ticnezi mâreŋ batamae‐fârewec.
2E wira owa ehuc ʒiŋuc muwec: “Babe hae sâko iŋuc jaha tutuŋke sanaŋ tuŋkezo, Ehuc demoŋ jaŋere hae gie ekac, demoŋ mamakâcne jaŋe tuhu‐ticnao soŋkeniŋmu, homa â bioc bioc mamakâcne jaŋere fic hae ekac.
3Mâreŋ sâc ŋic jaŋe sasec‐ticnere waiŋ opâ nâhuc jumbiŋ, mâreŋ sâc ŋicwofuŋ jaŋe warerâ sasec gie bahuc jumbiŋ, hae sâc siricfâc‐ticne fisi mazuc mâriri‐ticnere erâ moneŋ mafa sâko hurembiŋ, irec hâcne tâtiekac.”
4Eme sambâŋkonec dâŋ wiwira moc ʒiŋuc wahame manapo: “Ŋicfâc‐nane ŋoŋe hae i beherâ wiseniŋ, ira juhuc sâqocnere bafickenʒipiŋte â wiac micne ʒâicne ŋoŋerao fotâcnezacte.
5Hae izi sâqocne fainezi faine hefekume sambâŋ heuakac. Eme ʒi Anutuzi kiŋticnere mukac.
6Irec fisicnerâ eŋarewec sâc ecnenʒepieŋ, ehuc sâc bafehuc okacne bazucnenʒepieŋ, katucne oto gomba ijaha bafehuc râcnenʒepieŋ.
7Sahac bapa ehuc nâ aŋac â gae woŋgâŋ bajuwec irec sâc ʒâic serereŋ â ki busâqoc bâfuacnenʒepieŋ. E maŋticnezi muekac, ‘No ʒi ŋokac bomboŋ sâko, no hozec aricne, bubiaŋ faioa jurahuc jupemu.’
8Iŋuc muekacte ʒoaŋ gie bapa ijaha erao wiac micne ʒârâne fuaocmu, huc hâmoc, ki mamakuc â roroc, erâ wâc ʒocte temane eocmu. Wofuŋ Anutu e tâpiri runezi kiŋticne batarakac hâcne.”
9Eme mâreŋ sâc ŋicwofuŋ ehec sasec â tiwâ ʒepec gae wowo ehuc jumbiŋ, jaŋe ʒoc hosâc‐ticne feme honerâ ki mamakuc â hobu heheric eniŋmu.
10Ehuc ima‐ticne honerâ bipic tatara ejareme taicko domahuc wâsickerâ muniŋmu: “Jei, jei, hae sâko! Babe hae sanaŋ go, okacne ɋeŋfâfâc jaha fisi‐garekac ine.”
11Â haene haene siricfâc‐ticne jaŋe mozi mafa‐nâŋec furine baocmu muhuc iŋuc jaha ki busâqoc eniŋmu.
12Mafa ine kecʒiŋuc nareŋ gareŋ embiŋ: Gol â siliwa â kubu furi sâko â qoruc erinehec sasawa, qaŋqaŋ â bâbâroŋ, hameŋne â ɋâfoŋne, erâ mondaŋjâczi wiac bakicne â elefante ʒuŋenezi wiac bakicne, erâ bonezi â aeŋzi â wapazi â qânâzi wiac bakicne,
13erâ musijâc sahacne â tokic â kâŋâ â opâ âsu â hosâc âsu biaŋ, erâ waiŋ opâ â saŋ fâric â hâmu gai, erâ lama bulimakao â becâsic keretac wiac, â kiŋaŋ qaqa motec.
14“Ʒi ine mâririge honeriŋ qâriŋ ehuc juekic i arictac efârewec. Erâ ʒâmbâŋ titikucge qaʒuewec, â eri qaraweŋge somarewec, wemocko mocwâc fua‐gareocmu!”
15Eme siricfâc‐ticne wiac iŋucne ehec nareŋ gareŋ ehuc moneŋ mafa sâkohec embiŋ, jaŋe ima‐ticne honerâ wiwicko domahuc ki mamakuc erâ wâsickehuc ʒiŋuc muniŋmu:
16“Jei, jei, hae sâko, go ŋaqi qoruc qâreŋzia kirâ qârikuakicne roju jumec â eri fuŋne fuŋne furi sâko irec maŋko jujumec!
17Ʒi mafa mâririge ɋeŋnea imacke‐fârekicne ine.” Erâ wâc woke rune â wokeo gie bapa ŋic hâwecko rac warec eeŋgopieŋ, jaŋe iŋuc jaha ʒoc hosâc‐ticne feme honerâ taicko ŋehuc
18ki oowa erâ ʒiŋuc mumbiŋ: “Busâqoc, hae sâko iŋucne moc wena ŋekac?”
19Iŋuc murâ mâsic ruarâ ki busâqoc â mu mamakuc erâ ʒiŋuc mumbiŋ: “Jei, jei, hae sâko, gore erâ woke rune moneŋ mafahec embiŋ. Eme ʒi ututuŋ jaha hae sesuc fuawec.
20Sambâŋ â tiriŋic â aposolo â porofete ŋoŋe ine ʒeri bubiaŋ enʒepieŋ; hae sâkore kiŋ ŋoŋerao fowec i Anutuzi batarakac hâcne.”
21Dâŋ iŋuc fuame aŋelo sanaŋne moczi buse sâko ro bafaharerâ hâwecko sârockeme huwec. Hume kecʒiŋuc muwec: “Babe hae sâko iŋuc jaha tutuŋke sanaŋtuŋkezo, eme omae‐jâmbâŋkezejec.
22Eme musi bapa gita qaqa guru jaŋere marac fânâŋ i gorao mocwâc mi fuazejec, â metâ qâreŋ wiac bâbâfua i gorao arictac ezejec. Eme gie wiac fânâŋ tâmiric nac gumororo barâ fozejec.
23Lambe ʒoc tatamacne gorao moc mi fuazejec, â ŋic ŋokac jaŋere dâŋ gâgâwi iŋuc jaha moc mi fuazejec. Siricfâcge jaŋe mâreŋ sâc ŋicbomboŋ sâko erâ jurambiŋ, â gore qaŋgeczi mâreŋ sâc ŋic maŋjeŋic bâsifuckewec.
24Erâ porofete â tiriŋic â mâreŋ sâc ŋic jopakicne jaŋere socte kiŋ i gorao fokacte iŋuc egarezo.”
