1Sötiepa de inu, nequejtac ocsente öngel que temuya de elfecac ca meyac checöhualestle. Hua otlaniexte noche tlöltecpactle ca itlaniexteles.
2Hua otzajtzec ca tlajtule checöhuac. Ejqueu oquejto: Ye obetz, ye onxexetu inu ciudad bieye de Babilonia. Oxö sa demunios chajchönte ompa; ica quieme cörsel para espíritus de moxicoöneme, hua quiename xöola para noche tutume petzoteque hua tietlajyelteque.
3Noche inu opasöre ipampa inu ciudad oyeya quiename sente sohuatl tli quenpiepiehualtiöya gientes de noche naciones, hua quentlöhuantiöya. Hua reyes de tlöltecpactle ocalajque ca yaja, hua comersiöntes de noche tlöltecpactle omochijque ricos ipampa yaja quecualejtaya quepeas meyac sösantle tli pateyo.
4Entunses onejcac ocsente tlajtule desde elfecac. Oquejto: Xequisacö, giente de nopuieblo, de inu ciudad, para majcamo xetlajtlacucö ca giente de inu ciudad, hua para majcamo nemiechtocöro de inu plögas tli betzesque ipa inu ciudad.
5Pues inu ciudad quepea meyac tlajtlacule; tlö öque quesentlölis itlajtlacul, iyes quieme sente montu tli ases hasta elfecac. Hua öxö Deus quecastecörusque, pos yejuatzi quematihua lo que tli amo cuale oquechi.
6Xecmacacö inu ciudad lo que tli quenmacac ocseque giente, hua xectlaxtlöbicö ujpa por lo que tli amo cuale oquechi, hua xecnelulticö sente tlaile ijtec icupa ujpajpa checöhuac que lo que tli yaja oquenelulte para ocseque.
7Ejqueu quiene mochamöhuaya hua quepeaya de noche sösantle para inemeles, ejqueu mismo xecmacacö tiecoco hua yulcocolestle. Pos yaja quejtoöya ipa iyulo: “Naja nereina neca; amo sa nosielneca hua ayec noyulcocus”.
8Por inu ipa sie tunale mosietelesque meyactie plögas hua ipa huölösque: huölösque mequelestle hua yulcocolestle hua öpestle, hua quexutlaltisque, ipampa Tlöcatzintle Deus iloac öque quepealo checöhualestle, hua yejuatzi quecuntenörojque.
9Entunses chojchucasque lalebes reyes de tlöltecpactle, tli calaqueya ca yaja hua mopöctiöya. Chojchucasque ipampa quejtasque puctle de inu tletzintle cuöc yaja xutlatas.
10De bejca quetztasque ipampa momajtisque por inu tiecoco tli yaja quepeas, hua quejtusque: Ay, porube de taja, ciudad bieye, Babilonia, ciudad checöhuac, porque sa sie repiente aseco mocastigo.
11Hua innochtie comersiöntes de tlöltecpactle chojchucasque hua moyulcocusque por inu ciudad, ipampa ayecmo oyes öque quecoas lo que tli yejua quenajnamaca:
12sösantle de oro hua plöta hua teme cualtzetzi hua perlas, hua tzotzomajtle de lino hua de seda, de colur morörojtec hua chichiltec, de noche cuabetl tli ajfeyoc, hua sösantle de marfil hua de bepalte cualtzetzi, hua de bronce, hua de tepostle hua mármol,
13hua canela hua tli ajfeyoc, hua copale hua mirra hua perfumes, hua vino hua asiete hua harina cuale hua trigo, hua yulcöme hua calnielojte hua caböyojte hua carretotu hua hasta giente tli cate esclavo; noche inu sösantle quenajnamacaya inu comersiöntes.
14Hua yejua quelfisque inu ciudad: Noche inu sösantle tli lalebes tecnequeya tecpeas, ye uya; hua ye tecpolo noche tli rico quepea, hua ayecmo quiema öque queniextis.
15Noche inu niecate comersiöntes tli quenajnamacaya noche inu sösantle hua moricojtejque ca itomi de inu ciudad, yejua mocöhuasque de bejca ipampa momajtisque por inu tiecoco que yaja quepeas. Chojchucatasque hua moyulcocusque.
16Quejtusque: Ay, porube de inu ciudad bieye tli oyeya motlaquentiöya ca tzojtzomajme cuajcuale hua cualtzetzi hua moyecchejchihuaya ca oro hua ca teme cualtzetzi hua ca perlas.
17Pos sa sie repiente otla noche inu ricojyutl. Hua noche capetönte de börcos ihua pasajieros hua tli tejtequete ijtec börco, noche tli tejtequete ipa lamör, mocöjque de bejca,
18hua tzajtzeque cuöc quejtaque inu puctle de inu ciudad. Quejtojque: ―¿Tli ocsente ciudad oyeya quieme nönca ciudad bieye?
19Hua motlöltienque ipa intzonteco; chojchucataya hua moyulcocojque hua tzajtzeque. Quejtojque: Ay, porube de yaja, ciudad bieye. Ca iricojyu toricojtejque tonochtie tli tecpejpea börcos ipa lamör, hua sa sie repiente ye onxexetu.
20Pero xepajpöquecö nemonochtie tli nencate ompa elfecac. Xepajpöquecö por lo que tli ipa omochi inu ciudad. Xepajpöquecö nemejua tli nenyecteque, tli nentlateotitlanme, tli nentlayulepantejque. Pos cuöc quexexetunque inu ciudad, Deus nemiechchibelejque justicia.
21Entunses nequejtac sente öngel checactec ocajcoc sente tietebiebentzi quiename de molino hua quetitla ijtec lamör. Hua oquejto: Ejqueu quetitlanesque checöhuac inu ciudad bieye de Babilonia hua ayecmo quiema nieses.
22Hua inu música de tli quetzötzöna örpas, hua de tli quepitza tlapitzale hua flauta, hua de noche morsicojte ayecmo quiema caquestes ompa. Hua ayecmo quiema oyes ompa nion sente trabajadur de cualquier tequetl que quemate quechihuas. Hua ayecmo quiema isolocas molino ompa
23hua ayecmo quiema tlaniextis tlöbile ompa, hua ayecmo quiema caquestes yelfetl de nesohuajtiluyo ompa. Noche inu pasörebes ipampa icomersiöntes de inu ciudad quepejpeaya checöhualestle ipan tlöltecpactle, hua inu ciudad quencajcayö noche naciones ca ichichyutl.
24Hua inu ciudad icaca tlajtlacultec por inmequeles de noche yecteque hua de noche tlayulepantejque hua de innochtie ocseque tli quenmejmectejque ipan tlöltecpactle.
