1Que llapanta ricarirnam, juc anjeltana ricarerqä sielupita urecamoqta. Tse anjel allapa puedeq queninwan que patsaman shamuptinmi, patsapis limpu chipapäcorqan.
2Y allapa fuertipam queno qayarïcorqan: “Ushacärin, ushacärin jatun Babilonia marca. Tse marcaqa diablucunapa y supëcunapa wayinmi, y melanepaq pishqucunapa macheninmi ticrarin.
3Tse marcachoqa llapan nunacunam machashqa cuenta munayashqanta ruracurlla cacuyashqa. Tseta ricarmi, jinantin munducho reycunapis peno lluta ruracoq ticracuriyashqa. Negosianticunapis jinantin mundupita ewecurmi, mana combieneq negosiucunata rurar ricuyäcuyashqa” nir.
4Tsepitanam wiyecorqä sielupita queno nimoqta: “Noqata cäsumaq caqcunaqa tse marcacho nunacuna jutsa rurayashqanta mana rurayänequipaq tse marcapita yarqucuriyë; porqui manam munätsu tse nunacuna sufriyashqanno, sufriyänequita.
5Tse nunacunam jutsancunawan limpu munduta poquratsiyashqa, y Diosqa manam tse jutsancunata qonqarishqatsu.
6Imanollam waquin nunacunata sufritserqon, tsenolla pecunapis tse rurenincunapita ishque cuti mas sufriyätsun. Tse nunacunam waquin nunacunata allapa sufritsiyarqon. Tserecur ishque cuti mas castiguta chasquiyätsun.
7Imanollam galacur cushiquillacho cacorqan. Tsenolla feyupa waqachacur sufritsun. Porqui shonqunchomi queno nishqa ‘Noqaqa llapan marcacunatam dominä, y imepis manam japallallatsu quecashaq ni llaquishaqtsu ni waqashaqtsu’ nir.
8Tsemi juc junaqllacho tuqui sufrimientuta pasanqa, llaquiquita, mallaqeta, y wanita. Tsepitanam sendïcuyanqa; porqui tse marcata castigaq Diosqa, allapa poderyoqmi” nir.
9Babilonia marcapita qoye sharcoqta ricarmi, pewan lluta jutsacunata ruracoq reycuna llaquicur waqayanqa. Tse reycunaqa Diospa contranmi mana penqacushpa llutancunata ruracuyarqan.
10Castiguta mantsarninmi queno nishpa carullapita ricarëcayanqa: “¡Wawallanï, wawä! Tselaya jatun puedeq Babilonia marca ushacärillan. ¿Tseno juc ratu ushacärinanpaqtsuraq carillarqan!” nir.
11Tsenollam jina negosianticunapis maläyasta pesacur waqayanqa. Porqui mananam canqanatsu pipis negosiullancunata tse marcacho rantinanpaq.
12Tse negosianticunam tse marcacho ranticuyarqan oruta, qelleta, shumaq piñi rumicunata, perlascunata, linupita finu telacunata, seda telacunata, grosella y puca chipapaq satincunata, shumaq pucutaq qerucunata, marfilpita, bronsipita, fierupita, marmolpita y tablacunapita rurecushqa imecata equecatapis.
13Tsenollam ranticuyarqan canelacunata, shumaq pucutaq qoracunata, tuqui nicachaq perfumicunata, insiensiucunata, binucunata, micuna aseiticunata, norti jarinacunata, trigucunata, ashnucunata, üshacunata, cawallucunata, qarachepa pureq cärucunata. Y asta esclabu cayänanpaqmi animal cuentata nunacunatapis ranticuyarqan.
14Tse negosianticunam tse marcata llaquir queno niyanqa: “¡Ä marcallanï marca, cananqa mananataq cannatsu munapellapaq frutequicunapis ni riquesequicunapis! ¡Cananqa mananachi mas ricarinquinatsu tselaya cuyellapaq modanequicunata y riquesequicunata!” nir.
15Tse marcacho negosiacur ricuyäcushqa nunacunam tse marcata rupaquicaqta riquecur, carullapita mantsacashqa qaparillapa qayarillapa waqacur, queno nir qawarëcayanqa:
16“¡Wawallanï wawä! ¡Allau! Babilonia marca ushacärin. Qamqa allapa shumaq ropacunawan bistishqataq carqequi; orutaq, perlastaq y allapa shumaq piñi rumicunataq alajequicunapis carqan.
17Cananqa tselaya riquesequicunawan juc ratullataq ushacärillanqui” nir. Lamarllacho uryapucur, bidancunata pasacoq nunacunapis, barcucunapa capitannincunapis, pasajerucunapis carullapitam mantsacashqa qawarëcayanqa.
18Tse marca rupaptin qoyeta ricarninmi, “Cananqa mananachi taqe marcatano taririlläshuntsu” nir, qaparillapa qayarillapa waqayanqa.
19Tseno nirmi, pesacur waqacurnin, peqancunamanpis allpata maqtsiyanqa. Tseno rurarmi, qaparillapa qayarillapa queno waqayanqa: “¡Ä wawallane wawa, cuyellapaq jatun marca! Taqe marcachotaq barcuyoq nunacunapis negosiacur ricuyäcuyarqan. Canannataq juc rätulla limpu ushacärillan” nir.
20Tse öram sielupita queno nimoqta wiyarqä: “Sielucho caqcuna, que Babilonia marca ushacashqanpita cushicuyë; Diospa acrashqan wamrancunapis, Jesucristupa apostolnincunapis, Diospa profetancunapis, jina cushicuyë. Porqui tse marcacho sufritsiyäshonqequirecurmi, Dios pecunatapis castiguecun” nir.
21Tsepitanam juc puedeq anjel jatun mulinu rumi ricoqta lamarman jitarporqan. Tsepitanam queno nerqan: “Que rumita lamarman jitarpuptï, yacu illacäratseqnomi, qamtapis Dios jatun Babilonia marca illacäratsishunqui, y mananam mas ricayäshunquinatsu.
22Mananam calliquicunacho nunca wiyayanqanatsu arpata, flautata ni trompetacuna waqaqta. Mananam ofisiuyoq nunacunapis cayanqatsu. Y mananam wiyayanqanatsu rumi mulinu waqaqtapis.
23Mananam tse marcacho actsipis chipapanqanatsu. Mananam casaqui fiestacho bullaquicunatapis wiyayanqanatsu; porqui tse marcacho negosianticunam jinantin munducho negosianticunapitapis mas millonariu cayashqa, y jinantin marcacho nunacunatam brujeriancunawanpis engañashqa” nir.
24Profetacunata, Diosman creyicoqcunata y jinantin munducho nunacunata wanutsiyashqanpa culpantam tsecho tariyashqa.
