1Ni ya puoli bó nɛ n tí laa' tidɛknt yaam Uwien ya tond uba ñɛn' paaki bó ki jiinh ní, ki ŋmɔbe mituɔm ki gbien', nɛ uʼwenwenku wende' utingbɛn kɛ bo,
2nɛ u lienh ufaa bo ki teh: «U lu' ŋɔ, u lu' ŋɔ, uduciɛn Babilonn lu' ŋɔ. U ji kpɛnde' isɛnpol kɛ ya bol ya kɔnkuɔn nɛ. Inuɔn nin tiwɛnt tà yé tijɔnkt ya bont ki ŋmɔbe isensen kɛ ji kɔ wun ni nɛ.
3Kimɛ udu nnɔ nɛ taa' uʼsɔnsɔndl ki puon' inibol kɛ, ki cère' ì kɔn' Uwien ya tudɛre ni. Utingbɛn bo ya bɛrb tien' lisɔnsɔndl nin wù, nɛ ikpenkpend laa' lifaal li yɛbe uʼwiel bo.»
4Nɛ n tí cii' uniɛke uba bó paaki bó u lienh ki teh: «Nʼnibɛ, ñɛ mɛn Babilonn ni, ki la li te uʼnib ya tùonbiɛrɛ ya gbɛr ni, ŋɔ ki la ji ijɛnd yà bi li ji yɛ̀ nnɔ,
5kimɛ udu nnɔ ya nib sɔn' itùonbiɛrɛ yà nnɔ yɛbre' ki gbien' ki tì kpiɛ kutaaku nɛ, Uwien ŋa sunde' biʼtùonbiɛrɛ nnɔ bó,
6Tien bɛ mɛn bi tien' nɛ ma bo nnɔ, bi tien' nɛ ibiɛre yà nnɔ, jiin bɛ mɛn nnɔ bolm mile bo, bi là cère' ni jin' ijɛnd ma bo nnɔ, jiin bɛ mɛn nnɔ bolm mile bo.
7Bɛn bà là yíe tigbengt, ki yíe bɛ ń li te liwiel ni, nì tì kɛnde' nnɔ, cère mɛn bɛ ń ji ijɛnd mɔ kí li kaa mikuum kí tì baa nnɔ, kimɛ udu nnɔ ya nib maaleh biʼfɛ̀l ni, ki teh biʼdu gbɛre' nɛ, ka te tɛn kpopii, ka lì li kɛ̀le kuum mɔ fiebu.
8Nɛn bo, ijɛnd li taan kí lu udu nnɔ ya nib bo uwien uba nɛ. Yɛn si: mikuum nin ikumuɔ nin mikònm. Umu li wi udu nnɔ, kimɛ Yonbdaan Uwien wà bun' tibuur nnɔ ŋmɔbe mituɔm ki gbien'.»
9Utingbɛn bo ya bɛrb bà kɛ tien' lisɔnsɔndl nin udu nnɔ, bɛn nin wun jin' liwiel nnɔ, li muɔ kí kpiɛnde uʼbo, kimɛ u teknh umu, imuñii dukeh.
10Bi li juore kí li se fɔnfɔkm nɛ, kimɛ bi fɛnge bi la tì jɛ̀nde udu nnɔ ni nɛ. Bi li lienh ki teh: «Nì brike' aʼbo ŋɔ, nì brike' aʼbo ŋɔ uduciɛn Babilonn, sin wà là ŋmɔbe ufaa nnɔ, nì brike' aʼbo ŋɔ, Uwien pɔk ki bun' aʼbuur ki gben' na taande'.»
11Utingbɛn bo ya kpenkpend mɔ li muɔh ki kpìɛndeh udu nnɔ bo, kimɛ uba ŋa ji daanh biʼwɛnt.
12Tun si: miñɔ̀km nin ilike ya kur nin itɛn yà ŋmɔbe kudaaku nin ilaan nin tikpɛlcɛpenpient nin ikpɛlmɔ́nmɔ́n nin tikpɛlcɛr tà dinge suɔɔ ki windeh nin ikpɛlde kɛ ya bol yà ya daaku faa nin isiin yà ya dɔ ya daaku faa nin bi taah iluobñin ki teh tibont tà nin bi kpeh tibont tà kɛ ya bol nin kukurku kùa bi yih kù blɔnsi nin tikutɔr nin itɛn yà ya daaku faa bi yih yɛ̀ maarb
13nin lɛfina kɛ ya bol nin tisir tà nu ki ŋmɛ kɛ ya bol nin midaam kɛ nin mikpɔm nin miyom nin iji nin inɛ nin ipe nin itaan nin titɛnlolt nin iyonbe nin binib bà bi coh bɛ butɔbu ni.
14Bi li len ki ye: «Sin Babilonn, a là fɛ tibont tà nnɔ gben' ŋɔ. Aʼnacenkpebont tà mɔn ki ŋmɔbe kuñuɔrku nnɔ gben' ŋɔ, nil ŋa ji li lɛ tù fiebu.»
15Binib bà tien' ukpenkpende udu nnɔ ni, ki laa' lifaal nnɔ, li juore kí li se fɔnfɔkm nɛ ki muɔh ki kpìɛndeh, kimɛ bi fɛnge bi la tì jɛ̀nde niʼbó nɛ.
16Bi li lienh ki teh: «Nì brike' aʼbo ŋɔ, nì brike' aʼbo ŋɔ uduciɛn Babilonn, nì brike' aʼbo ŋɔ, sin wà là te tɛn upii wà guo tikpɛlcɛpenpient nin ikpɛlmɔ́nmɔ́n nin yà kɛ ya bol ya daaku faa ki fɛ̀nde' aʼba nin bi taah miñɔ̀km nin itɛn yà ya daaku faa ki teh tijɛfɛ̀nbont tà nnɔ nin ilaan nnɔ.
17Li ya faal kɛ nɛ pɔk ki gben' na taande' nɔ-ɔɔ?» Biñɛrkurb nin biʼciɛnb nin bikpentuɔnb nin bà kɛ sɔnh miñunciɛnm bo ki jinh se fɔnfɔkm nɛ,
18ki likeh udu wà teknh nnɔ ya muñii, ki wuureh ki teh: «U lɛ udu ba te ki baa' uduciɛn wuu nɔ?»
19Nɛ ki yiih titɛnt ki pukeh biʼyul bo, ki muɔh ki kpìɛndeh ki wuureh ki teh: «Nì brike' aʼbo ŋɔ, nì brike' aʼbo ŋɔ, uduciɛn Babilonn nì brike' aʼbo ŋɔ, biñɛrdɛnb kɛ ñi' a ya faal bo nɛ ki faake'. Nɛn kɛ nɛ pɔk ki lá gben' na taande' nɔ-ɔɔ?»
20Tibont tà kɛ te kutaaku bo ń li poknh, Uwien ya nib nin *Yesu ya tondb nin *Uwien ya ñɔbonsɔknbɛ niʼmɔ ń li poknh, uduciɛn nnɔ ya berm bo, kimɛ Uwien bun' udu nnɔ ya nib tibuur bi tien' nɛ mibiɛrm mà nnɔ bo ki kun' nɛ imɔ̀n.
21Nɛ Uwien ya tondtɔdaan uba yuure' litɛnl liba li yɛbe tɛn linɛ̀ciɛnl ki wiɛ' miñunciɛnm ni, nɛ ki ye: «Bi li bere uduciɛn Babilonn ufaa bó ma sɔ. Nil ŋa ji li lɛ wù fiebu.
22Ba ji li cii biɛñib nin yonyuonb nin wopieb nin natunpieb bó udu nnɔ ni. Utonsɔnl uba mɔnɔn nin utɔ ŋa ji li te uʼni. Ba ji li cii naal bó uʼni.
23Frl ŋa ji li wende uʼni, ba ji li cii ujɛ nin upii bà kuɔn' tɔb, na laan wuɔke' ya yuon bó uʼni, udu nnɔ ya kpenkpend nɛ là cɛn' binib kɛ utingbɛn bo. Uʼnib là taa' iñɔke nɛ ki lɛre' inibol kɛ.»
24Liɛbe' ki ní, *Uwien ya ñɔbonsɔknb nin uʼnib bà kɛ bi ku' bɛ utingbɛn bo nnɔ u ya du nɛ si biʼkuum.
