1Ou akumu kanopolie nirindumuni, pe altopo kanorundu kinie angello te mulu koleana manie orumu. Akumu yu kolea nokomba namba paa awili te mondopa, yunge tondolo pa telimuni ma koleana pa tenderimu.
2Yuni paa tondolo ru nimbelie nimbendo: “Kolea Awili Imbi Paa Olandopa Mololi Bepillono kamu keri liemu. Keri lepa pora simu. ⸤Ou yembo awisili akune moloringi nalo kinié⸥ Setenenga kendemande kurume ‘Olionga koleamo.’ ningu akune pelemele. Kuru keri kalaro mololime kinie kera kalaro mololime kinie kanopo keri kanolemolo kerama kinie akune pelemele.
3‘Kanu koleana yembo moloringimene we koleamanga pali yembo talapema wa ulu kerinele tenge ulume pelemo no-waene paa tondolomo nangi.’ nimbe karaye terimu noringimunge kamu keri lierimu. Koleamanga pali ye nomi kingimene kepe yu-kinie wa ulu kerinele teringila. Mana bisinete teringi yemane kara puku mele kerime waka lierimumunge eno yu-kinie bisinete teko kou mone awisili lsingi.” nirimu.
4Kanu kinie pe mulu koleana ungu te lupe wendo orumu pilierindu kinie nimbendo: “Nanga yemboma, aku koleamonga ulu pulu kerime lepa mulu koleana ola olemo, aku koleamone tepa kenjerimu ulume Pulu Yemone pilipe molemo kene eno aku koleamo munduku siye kolko ulsu wangi. ‘Yunge ulu pulu keri telemo akume pea tapu topo naa teamili. Ulu pulu keri telemo akumenga Pulu Yemone umbune simbema olio pea naa liemili.’ ningu wendo wangi.
6Yuni yando tepa kenjerimu akumunge enone anjo aku siku yu pundu toko siengi. Yuni yando terimu akumunge enone anjo tere leko pundu tangi. Yuni no enge nili mingi kapona tepa mimi terimumu liku tere leko no enge nili olandopa pulimu yu nopili siengi.
7Yu yuyu ou ‘molopo kondambo.’ nimbe yunge imbi lipe ola mundupe kara pupe molorumu akumunge pundu toko yu mindili siku umbunema mepili siengi. Yuni konopuni pilipelie ‘Na ambo nomi kuwini molopo kuwininge polona molio. Na ambo wayere naa molio. Na walsikele kepe kola tepo kola-ulke naa molombo.’ nimbe pilimo.
8Akumunge ena telumunge yunge umbune wendo ombáma wendo ombá. Yembo kolonge kuru awisili wendo omba, yembo awisili kola teko, kolea engele lemba. Tepene yu nomba pora simbe. Yuni ulume aku sipe tepa kenjimbemonga yu kote tendepa pilimo Pulu Ye Awilimu paa enge nili olandopa pelemo yemone yu apurupe mindili akume simbe.
9“Yu-kinie wa ulu kerinele teko, yu waka kolorumu ulume pea waka koloringi kara puku teringi ye nomi kingimene yu tepene nomba ilie wendo ombá kinie kanokolie kola teko kola-ulkena wale awisili molonge.
10Yu mindili nombá mele kanokolie paa mini-wale munduku paa sulu teko angilkulie ningendo: “Ai ya! Ai ya! Kolea imbi paa ola mololimu, kolea paa awili enge nili Bepillono! Ena mongo telumunge mindi nunge teko kenjerinumunge ulume walsikele wendo okomo.” ninge.
11“Mana bisinete tenge yema enonga bisinete teko kou mone linge melema naa lingemonga eno kola teko wale awisili kola-ulke molonge.
12Bisinete teko nosinge mele akume isipe: Kou-gollo kinie kou-sillipa kinie umbu kou kou mone awili tepa pulimoma kinie siripelu kake kou mone paa olandopa pulimoma kinie; múlu kake peangama kinie, múlu kondoli lupe lupema kinie; unjo lupe lupe mune tolime kinie, mele lupe lupe kongi ellepene ungúni teko mimi tenge melema kinie, unjo kou mone awili tepa pulimene teko mimi tenge melema kinie, kou-boronisi kinie kou-aini kinie kou mono-wape teli kinie aku koumene teko mimi tenge melema kinie, aku melema nosiku,
13kangine ‘mune topili.’ ningu kopongo-wele teko mimi teko kalemele sinamono kinie sipási kinie, paura keku kalemele kinie mune tolemoma kinie, wele lupe lupe mune tolime kinie, no-waene kinie unjo-ollipi wele kinie, rasi-witi kinie, rasi-witimuni teko mimi telemele pillawa kinie; kongi kao sipisipime kinie; kongi ote kinie otene kundulimo karoma kinie; kongono we tendenge kendemande molonge yembo, ‘konopu naa pepa kongi mele molemele.’ ningu mengo puku kou-mone bisinete tenge yemboma kinie; aku mele nosingema pali yembomane altoko koleamanga lupe liku mengo ongo makete teko kou linge aulkemo manie pumbemonga kola tenge.
14“Enone ningendo: ‘Nu mele peanga kou mone olandopa pulimo melema ‘paa liemboa!’ konopu lenoma manie pumu. Mele peanga kande kandema nu waka liemume kinie nunge anilino mele kou mone olandopa pulimo peangama kinie kamu-kumu nu mundupe siye kolopa manie pumu. Melema altopa nu-kinie naa lemba kanoni.’ ninge.
15Aku melema bisinete teko kou mone awisili liku singe yemane sulu teko angilku yu mindili awili tepa nombá mele kanokolie paa mini-wale mundunge. Kola teko kola-ulke molkolie
16ru ningulie ningendo: “Ai ya! Ai ya! Kolea imbi paa ola mololimu, ambo kamakoma pakoko molemele mele wale-pakoli kondoli pakopa, kou-gollo kinie kou kangi lupe-lupe kololi kou mone awili tepa pulimoma kinie, siripelu kake tepa kou mone awili tepa pulimoma kinie akumene yu animbe molorumu.
17Ena mongo telumunge yuni kou mone awili tepa purumu nosilimo melema paa kamu keri liemu.” ninge. “Nomu-kusana andoli sipi nokolemele yema kinie sipimenga kongono telemele yema kinie nona andoko bisinete teko kou mone limele yemboma kinie aulke sulu teko angilkulie kanonge.
18Tepe nombámonga iliemo kanokolie ningendo: “I kolea awilimu none teli te lierimuye?” ninge.
19Ma kungupu liku pakoko kola teko kola-ulke molkolie ningemone ru ningulie ningendo: “Ai ya! Ai ya! Kolea imbi paa ola mololimu, sipi mengo andoko akune kou mone awili tepa noserimu kou mone awili teko lsingi koleamo! Ena mongo telumunge aku koleamo kamu keri liemu.” ninge.
20“Mulu koleana molemele yemboma kinie, Pulu Yemonga yemboma kinie Kirasini “Nanga kongonomo tende-paa.” nimbe lipe mundorumu yema kinie Pulu Yemone ungu umbu tondorumume pilku yemboma ningu siringi yemboma kinie ikoleamone eno mindili sipe tepa kenjerimumunge Pulu Yemone apurupelie yu mindili sipe tepa kenjikimumunge yu lepa kenjilimomonga konopu awili teko siee!” nimbé.
21Kanu kinie angello paa enge nili tene kou paa awili te ola lipe nomu-kusana topa manie mundupelie nimbendo: “I tekeromo mele aku sipe ulu tondolo wendo ombá tene kolea awili imbi paa ola mololi kolea Bepillono topa kenjimbe kinie yembomane ikoleamo altoko naa kanonge.
22Gita toko, kolape-mingi langoko, biyukele ungu siku, konana ningu, aku siku ulu telemele ungume altoko kamu-kumu naa pilinge. Ulke takoko mele teko mimi telemele kongonomanga yemboma altoko kamu-kumu naa kanongela. ‘Pillawa teamili.’ ningu kou awili tene rasi-witi kali lemele kinie ungu nilimo ungumu altopa kamu-kumu naa nimbé naa pilinge.
23Nu koleamo kamu-kumu tepe-llame pa naa temba. Ye te ambo limbe molo ambo te ye pumbendo ungu nilimele mele nu koleamo altoko kamu-kumu naa pilinge. Ou nunge bisinete teringi yema koleamanga pali ye kamakoma moloringi. Nuni ma koleana yemboma pali ambo konga melema kolo toko kondi toko sirinu akumuni yembomane ulu keri awisili teringi.
24Pulu Yemone ungu umbu tondorumu ungume pilku yemboma ningu siringi yemboma kinie Pulu Yemo yunge yemboma kinie yuni topa kondorumumenga memema yunge koleana lemo; ma koleamanga pali toko kondoringi yembomanga memema kepe aku koleana lemo. Aku ulume pali wendo orumume kolea Bepillonone tepa kenjerimumunge wendo orumu.” nirimu.
