1Chaypitaga ricapurü juc angeltam, alisca munayniyogta, jana pachapita jegarpayämugta. Jinarcurmi paypa achicyayninwan cay pachaga ricacarun alisca achicyayar.
2Chauraga lapan calpanpam cay nin: “Nämi loglarun, nämi loglarun, chay jatun Babiloniaga. Cananga chay Babilonia muyurun Asyagcunapa wayinmanmi, lapan lutan espiritucunapa machrayninmanmi, jinaman lapan manchana sima uywacuna cacunanmanmi.
3Chaynuyman chay marcaga muyurun, lapan nacionchru yachragcunata vïnunwan shincachignuysi juchäcachinganpitam. Cay pachachru reycunata juchäcachinganpitam, jinaman cay pachachru ranticugcuna, chay ima-aygas lutan rurapäcunganwan capogniyogman muyuchinganpitam” nin.
4Chaylam mayarü jucpa shimintatag jana pachapita cay nimugta: “Wayra yargapäcuy chay marcapita nogapacag runäcuna, paycuna juchäcurcayanganta mana juchäcurcänaypag, nätan paycuna imawansi cunchuchisha capäcuptin mana cunchupäcunaypag.
5Chay marcachru runacunapa juchan cayan, jana pachacama gotushanuymi, nätan Diosga yarparayanmi chay runacuna juchäcurcanganta.
6Imanuymi chay marca runacunata rurara chaynuy paytas rurapäcuy. Cutichipäcuy dobliyta chay ruranganpita, imanuymi runacunata cunchuchira chaynuy, jinaman mas masnintawan cunchuchipäcuy.
7Chay marcaga cayan alitucugmi, jinaman cawayan micucularmi, upyacularmi. Chaymannuy imanuypas tucuynaypa cunchuchipäcuy, wagayar capäcunanpag. Chay marcaga cay nigmi: ‘Nogaga mandayä juc reinanuymi. Manam juc viüdanuysi nacashagchu ni manatan imaysi cunchushagpishchu’ nigmi.
8Chaymi chaypagga juc junaglachru aywamunga tucuy cunchuycuna, wanuysi laquicuysi micanaysi, jinaman canga rupachisham. Chay juchanpita taripag Diosga alisca munayniyogmi” nimugta.
9Nätan cay pachachru mandagcunaga, imanuypanuysi micucular upyacular cawapäcunganpita, wagapäcungam, pësacurcangam, chay marcata nina rupaptin goshchriyagta ricaparärir.
10Chay rupaptin carulachrümi manchacasha shacayärin cay nircayar: “¡Ay! laquipaypagmi cayanqui gam jatun marca Babilonia, gam munayniyog marca, gamga juc üralapagtag cayänayqui cunchuchipäcushuptiquiga” nir.
11Chaynuytan cay pachachru ima-ayga ranticugcunasi wagapäcunga, jinaman pësacurcangam chay apapäcunganta mana pisi rantiptin.
12Chay apapäcunganga caycunam cara: Örum, yurag golguem, shumag välig rumicunam, perlacunam, lïnu ninganpita alisca välig tëlacunam, sëdam, tucuy cläsi pucacunam. Chaypita ima shumag asyag lapan guerucunam, marfil ninganpita tucuy rurashacunam, shumag guerucunapita ima-aygas lapan rurashacunam, cobripita, fierrupita, marmolpita ima-aygas lapan rurashacunam.
13Chaypita canëla jampim, alisca shumag asyag perfümicunam, inciensum, mirram, jinaman vïnum, aceitim, harinam, trïgum. Chaypitaga uyshacunam, caballucunam, cärrucunam, jinaman ranticurcagran runacunatas.
14Chay ranticugcuna cay nipäcungam chay marcata: “Ima-ayga munangaytas manam nä charanquichu, jinaman chay ima-aygas shumagcunata, ima-aygas väligcuna munangayta manam nä tarinquichu”.
15Chaura chay ima-aygacunatas ranticugcunaga, nätan chay marcachru capogniyogman muyushacunaga carulachrümi manchacur capäcunga wagarcayar racrarcayar.
16Jinaman cay nircayar “¡Ay! ¡Laquipaypagmi cayanqui jatuncaray marca! Gamga carayqui lïnu ningan tëlawan, tucuy pucaman teñishawan juc warmi jacucushanuymi, jinaman örucunawan, perlacunawan, shumag rumicunawan jacucushanuymi.
17Nätan chaychica ima-aygaysi ushacarun juc üralatam” nipäcungam. Chaypitaga lapanmi büquicuna manejagsi, chay büquichru aywagcunas, büquichru uryagcunas, chay jatun gochrachru lapan uryagcunas shacayärin carulachru.
18Jinarcurmi nina rupaptin goshchriyagta ricaparärirga gaparäcurcan: “Cay jatun marcanuyga manam maygansi carachu” nir.
19Chaypitam wagarcayar racrarcayar umancunaman alpata jitayacarärin cay nir gapachracurcayar: “¡Ay! ¡Laquicuypagmi cayanqui jatun marca! Gamchrütag lapansi chay büquiyogcuna alisca capogniyogman muyupäcusha, nätan juc üralatam lapan ima-aygaysi usharun” nir.
20Chaylam jana pachapita cay nimun: “¡Cushicuy jana pacha cay marcapita! Nätan ¡cushicurcay gamcunas, Jesuspa cachran ruragcuna, Diospa willacugnincuna, Diospa raquishancuna! Diosga chaynuypa cay marcata ruparachin gamcunata imatas rurapäcushungaypitam” nir.
21Jinarcurmi juc munayniyog angelga charirun rumita, juc jatun tunaynuyta. Chaypitam jatun gochraman tacayurun cay niyar: “Cay rumi tacayushanuymi gamsi canqui jatun marca Babilonia. Manam imaysi mastaga ricapapäcushunquichu.
22Manam mastaga gamchru mayacangachu arpas, ni flautas, ni trompëtas. Manam mastaga gamchru cangachu ima rurag curiosu runacunas. Manatan mastaga gamchru mayacangachu chay agacurcangansi.
23Manam mastaga gamchru achicyangachu ni ima achquiylas. Manatan mayacangachu casaracuy fiesta büllas. Gamchru ranticugcuna cay pachachrüga alisca capogniyogmi capäcura. Nätan ‘Gamga engañasha canqui lapan nacionchru runacunata, mal ruraypam’ nir.
24Nätan gam marcachrümi shumag mayacarun Diospa willacugnincunata, jinaman Diospa raquisha runancunata wanuchipäcungay. Chaynuytan maychru chaychru cay pachachru lapan wanuchipäcungaysi limpu musyacarun” niyar.
