1Tsaypitanam cielupita poderöso llapan mandacuyninwan juc angel bäjaycamugta ricasquirgä. Tsaymi tsay angelpa alläpa chipacyayninwan cay patsapis jancat atsicyasquirgan.
2Tsaymi juc mantsacaypag jinchi vozninwan gayacurnin nirgan: “¡Ushacashganam! ¡Ushacashganam jatuncaray Babilonia marca! Cananga llapan supaycunapa wajinwan tucuyläya mana alli espïritucuna täcuyänanmi ticrashga. Tsaynöllam mana alli chucaru melanaypag pishgocunapa geshuncunamanmi ticrashga.
3Tsay llapan naciunchö runacunapis imayca vïnowan löcuyar machashganömi caycäyan. Tsaymi mana alli yarpayninwan lluta jucnin jucninwan mana allicunata rurar puriycäyan. Tsaynöllam llapan mundupita reycunapis paywan imayca mana allicunata ruracarnin puriyargan. Tsay llapan munduchö imayca ranticugcunapis alläpam rïcuyäyashga Babilonia marcapa alläpa imaycan capuptin lluta imaycata rurar perdetsinganwan” nir.
4Tsaypitanam cielupita juc voz nimugta wiyargä: “Llapayqui nogapagcag runäcuna tsay mundupita yargayämuy, llapan mana alli jutsa rurayanganpita tucuyläya mantsacaypag sufritsicuy mana alli geshyaycunawan mana sufriyänayquipag.
5Paycunapa mana alli jutsancunam, asta cieluman tincut pëlacashga. Tsaymi Dios Yayaga llapan runacuna tucuyläya mana alli rurayangancunata yarpasquirgan.
6Dios Yayaman criyicugcunata chiquirnin gaticachar entregacunganpita, ishcay cuti mas quiquin Babilonia marcata entregayay. Tsaynölla llapan mana alli ruranganpitapis, ishcay cuti mas sufritsirnin pägayay. Paytaga cay munduchö runacunata ayag vïnotanö tallurcur upyatsinganpitapis, ishcay cuti tallurcur mas pürullata upyatsiyay.
7Quiquinpa riquësanpag ayrajarnin cushishga aläbacur, munayllanwan yarpar quiquillanpag imaycatapis entregacungannölla, quiquintapis castigarnin mantsacaypag llaquicuywan sufrimientuchö catsiyay. Payga shongollanchö yarparmi nican: ‘Nogaga caychömi reyna jamaycä. Nogaga manam viudatsu cä, ni imaypis manam llaquicur sufrishagtsu’ nir.
8Tsaymi juc junagllachö mantsacaypag sufritsicuy llapan mana alli geshyaycuna payman shayamunga: wañuywan alläpa llaquicuynintin mallagäcuy. Dios Yayaga alläpa poderöso Señormi llapan imayca mana alli rurangancunapita condenananpag. Tsaymi Babilonia marcata ninawan rupatsirnin jancat ushacätsinga.”
9Llapan mundupita reycunam jucnin jucninwan lluta puricur mana allicunata rurarnin, imayca riquësancunawanpis lluta perdetsiyanganpitam rabiarnin alläpa llaquicur wagarnin sufriyangan, ninawan jancat rupar lunyarrag goshnigta ricarnin.
10Tsay llapan castïgucunawan sufriycanganta ricarmi, alläpa mantsacashga carullapita ricararnin gayaycachar niyanga: “¡Allau! ¡Allau jatuncaray shumag Babilonia llapan marcata mandagnin poderösa marca! ¡Cananga juc örallachömi llapan mantsacaypag ushacay castïguyqui chämushga!”
11Tsaynöllam llapan mundupita ranticug runacunapis rabiarnin llaquicur wagayanga, tsay jatun Babilonia marcapag. Tsaynö päsasquiptinga mananam ni pipis rantinganatsu llapan gepincuna rantipag apayämungantapis.
12Tsaymi manana rantig cayanganatsu, tsay llapan maytsica gorita, yurag gellayta, alläpa shumag chipacyag chaniyog rumicunata, perlascunata, alläpa fïno lïnopita tëlacunata y sedapitawan cuyacuypag morädo chipacyag puca tëlacunata. Tsaynöllam llapan cläsi alläpa mushcug gerucunata, marfilpita tucuyläya adornocuna rurashgata, alläpa shumag gerucunapita, broncipita, fierropitawan marmolpita rurashgacunata rantiyanganatsu.
13Tsay maytsica canelacunata, mushcug jachacunatawan goracunata, incienciuta, mirata, mushcug perfümita, vïnota, olïvospa aceitinta, alläpa fïna jarinatawan trïgutapis rantiyanganatsu. Tsaynöllam alläpa maytsica wätacunata, üshacunata, bestiacunata, cärrocunata asta servicug esclävupag cuerpuncunatawan almancunatapis ranticuyänanpagmi runamajincunatapis apayämurgan.
14“Tsaymi llapan ranticugcunaga tsay Babilonia marcapagga niyanga: ‘¡Cananga mananam capushunquinatsu tsay alläpa munangayqui allish gustashungayquicuna! ¡Cananga alläpa cushicuypag chipacyag llapan imayca riquësayquicunatawan llapan imayca capushungayquitam imayca ogragnö mana ni imay mas tarinayquipag llapanta jancat perdergoyqui!’ nirnin.”
15Tsay llapan imaycata ranticur negociuta ruragcunapis, Babilonia marcapa gellayninwanmi alläpa rïcu ticrayargan. Tsaymi llapan negocianticunapis tsay castïguwan alläpa sufrigta ricar, carucunallachö mantsacashga rabiarnin llaquicur caycäyanga.
16Tsaynam wagarnin gayaycachar niyargan: “¡Allau! ¡Allau jatuncaray shumag Babilonia marca! Unayga tucuyläya chipacyag fïno lïnopitawan morädontin puca shumag llatapashga warminömi cargayqui. Tsaynöllam shumag chipacyag llatapacunawan goriwan, gellaywan, tucuylaya cuyacuypag chaniyog rumicunawan y perlascunawan adornashga cargayqui.
17¡Tsay llapan imayca riquësayquim cananga juc örallachö jancat ushacashga!” Llapan büquicunapa capitannincunawan runacuna, lamarchö purigcunawan lamar rurinchö arugcunapis, alläpa carullachönam quëdacuyargan.
18Tsay jatuncaray Babilonia marca ruparnin goshnigta ricarmi, gayaraycachar niyargan: “¿Cay jatuncaray shumag alli marcanöga manam ni maygan marcapis masga cantsu?”
19Tsaynö nirmi llapan rabiar mantsacashga llaquicur, umancunamanpis allpacunata lagchirnin gayaycacharnin wagar niyargan: “¡Allau! ¡Allau jatuncaray shumag Babilonia marca! Llapan imaycayog rïca marca canganwanmi llapan lamarchö büquiyogcunapis alläpa rïcu ticrayargan. ¡Cananga llapanpis juc örallachömi jancat ushacar manacagman ticrasquirgon!
20¡Llapan criyicugcunawan mana jutsannagcuna y apostolcunawan profëtancuna y cieluchö caycagcunapis tsay jatuncaray Babilonia marca ushacanganta cushicuyay! Tsay marcatam quiquin Dios Yaya llapan imayca mana allicunata ruranganpita condenar juzgashga sufritsiyäshungayquipita” nirnin.
21Tsaypitanam juc poderöso mandacug angel molinupag jatuncaray rumita pallarcur, lamar rurinman caynö nir jitarpurgan: “Caynömi jatuncaray shumag Babilonia marca, gampis uraypa lamarman jitarpushga canqui manana masga ni imay tariyäshunayquipag.
22Mananam llapan cälliquicunachö ni imaypis arpatawan lautapa ni trompëtapa shumag müsican töcayangantapis wiyanquinatsu. Tsaynöllam imayca ruray yachag obrërocunapis cayanganatsu ni rumipita molinupa gayarayninpis ni imay wiyacangantsu.
23Gam Babilonia marcachöga, mananam lamparacunapa actsinpis atsicyanganatsu. Tsaynöllam ni imaypis alläpa büllata rurar casaracuy fiestacunatapis wiyayanganatsu. Tsay llapan ranticug runayniquicunaga puntata llapan munduchö alläpa poderöso runacunam cayargan. Tsaynö carmi gamga llapan naciuncunata brujeriayquiwan llullatsirnin engañargayqui.
24Tsay Babilonia marcachömi Dios Yayapa profëtancunapawan jutsannag acrashga criyicugcunapa yawarnincunata tariyashga. Tsaynöllam llapan munducunachö wañutsiyangan runacunapa yawarnintapis tariyargan” nir.
