1Gée na càùru ê pâ pwi bèepwiri, â go côo mwara pwi jè *angela, na é boome gée napwéretòotù. Â naa têe pàtàmee na maina. Â dau maina pai muugère kêe, na é pwéelaa pàpari ê gòropuu.
2Â é tomara tôo pâ: «Ée jèe tûu *Babulona, téura napô-bà! Ticè âboro wê! Jèe wâ kà tèpa u, pwârawâ kâra duée, bawâ kâra aràu, aucârü kâra akàna autâa kàra diri, pâ macii na miiri.
3Tojii tô ilàri-bà. É naa dipâa kêe. Rà ipwirié pâ Ba. Rà pâ nau pwacèwiié. Rà pwa tûâ na miiri. Rà ipuu imudi ma wàé, pâ ukai gòropuu. Wâro gée gooé tèpa pi-icu. Wâru mwani kàra, gée goo pâ tûâ èpà kêe. Nabwé!»
4Go têre ê jè pwâratùra me gée napwéretòotù, na é ina pâ: «Tèpa naîô wée! Uru jii Babulona. Còobé jii tôobà. Uru jii pâ èpà kêe. Naaco pâ tûâ kêe. Ba guwà péa tòpi ê wârimuru kêe! Dau maina aré na go o mwa naa têe.
5Dau wâru èpà kêe. Dau pòri too, tèepaa naanidò napwéretòotù! Go côo wakè kêe, â câgo caa pwanauri.
6Go o mwa papòé. Naa wârimuru têe wiâra pâ èpà kêe. Naa têe na dau maina jii ê pwina é pwa. Pwaai wârado kêe. Ba é naa dipâa kêe târa tubaèpà târa pâ Ba. Pwaai mwara goro dipâa na gòo, ba na é wâdo côwâ. Â ée dau maagé goo.
7Dau maina nümee. Wâru mwani kêe. Maina ipwàdée kêe. Êkaa na wàrapwiri: O maina aré kêe. Piêdò maagé kêe. É pi-ina kêe pâ: “Go nye tô ukai. Câgo caa tô dàpwà. O câgo caa côo pikîri.”
8Êkaa na wàrapwiri, na ji caapwi tòotù, ée pâ nau tô dàpwà. Ée mwa côo pikîri. Ée mwa copwa. O cîriê naa na ânye. Ba maina pàtàmoo, wâgo Pwiduée ma go pitèié. Nabwé!»
9Wà tèpa ukai kâra gòropuu, âna rà o côo ê muru ânye, wiàna tòo Babulona, â rà o dau pi-i ma pijinünü gooé. Ba rà tèpa bée, na rà pwa pâ muru na dau èpà ma wàé. Â jèe dau pwa neemururà gée gooé.
10Â rà o coo na wâiti wê, goro ê pai wâgotàra goo ê pai maagé kêe. Â rà o pwùkùru. Â rà o mwa ina pâ: «Wârico Babulona! Wârico napô maina! Téura ma tubatiàué, na ji caapwi tòotù!»
11Rà imuruê ma pijinünü wà tèpa pi-icu wâni gòropuu, ba jèe ticè âboro cèna ée wâri cè neemururà.
12Ba wàé, na ia é mu wâri diri pâ na jèpapara muru na dau maina wâri wèe, na rà mu icuri: Pâ mwani mii, ma mwani pwaa; Pâ atü na dau maina wâri wèe; Pâ na jèpapara imwaano na dau wâdé; Pâ upwâra na ûrea; Pâ muru na pwa goro béokée kâra lélépâ; Pâ muru na pwa goro upwâra; Pâ paò ma paò mii; Pâ atü pwaa na dau wâdé;
13Pâ na jèpapara jawé ûrea, ma wâi na ûrea; Pâ dàuru upwâra na ûrea na jè cîri; Pâ dipâa, ma géree, ma dàuru poloa, ma blé; Pâ paaci ma mutô, ma pâ òoci ma wàtio; Pâ ênawéna na piirà, na dau pwaée kàra.
14Wà tèpa pi-icu, na dau pwa mwani kàra, gée goo i ville Babulona, âna rà o dau pi-i, ma pijinünü gooé. Â rà o ina têe pâ: «Ticè neemurugà: Muru na jajau, muru na pwényuâa, muru na wâdé tâgà. Cau tubatiàurà. Â o câgà caa pâmarirà.» Â rà o coo na wâiti wê, goro ê pai wâgotàra goro pai maagé côo kêe. Â rà o pwùkùru.
16Â rà ina mwara pâ: «Wârico Babulona! Wàé na é coona imwaano mii ma bwùucùru na kîri ê aaé. Â maina wâri wèe. Wàé na é picûâaê goro mwani mii, ma pâ atü na pwâra.
17Jèe ticè têe diri na ji caapwi tòotù!» Rà picoo iti jiié mwara wà diri tàpé na rà pâra gòro wànga—wà tèpa apooro wànga, ma wà tèpa pitûâ naa gòro wànga, ma wà tèpa taa ârawéà, ma diri tèpa matélo.
18Â rà o côo i muê na tòé, â rà o i, ma pi-ina tàra pâ: «Wâpà cè napô cèna wàra ê ville bèeni? Au! Nye ticè!»
19Â rà o i, ma pijinünü, ma tü dàuru puu naa na pûrurà, goro pai tòina kàra. Â rà o wiikau burà ina pâ: «Wârico Babulona! Wârico napô maina! Dau pwa mwani kâjè, gée goo ville bèeni. Téura ma tubatiàué na ji caapwi tòotù!»
20Êco na wàéni ê popai ba kà tèpa âboro kà Pwiduée: Câbu, co napwéretòotù! Guwà ipwàdée, âboro kà Pwiduée— wâguwà tèpa *apostolo, wâguwà tèpa *péroféta! Ba é jèe téuraé, é tojiié wà Pwiduée. É pwa wârimuru têe, ba é tubaèpà tàwà.
21Nabwé, â go côo wà pwi jè angela na dau pwa nii kêe. Â é popa ê diopwaa kâra atü, â é tü naa nawià, â é ina pâ: «O ciura wàrapwiri wà Babulona, ville maina, â o tüê wàrapwiri, â o câjè mwa caa côoê côwâ.
22Â o câjè mwa caa têre côwâ cè airi gitar, ma cè pwâra uu kâra kuruò, ma cè pwâra uu tutu. O tiàu cè pwi jè a wakè goro upwâra ma paò. Â o câjè mwa caa têre côwâ cè airi atü bécaagai blé.
23Â o câ mwa caa pwéelaa côwâ cè ânye wê. Â o câjè mwa caa têre côwâ cè pwâratùra kà du a tapoo piéa. «O popa jiigà, co Babulona, êdiri pâ pwi bèepwiri, majoroé ê tûâ'gà na èpà. Ba gà pwacèwii tô a pwa dooki. Ba wà tèpa pi-icu'gà, na rà dau imaina naa na gòropuu diri, âna rà pa-imwüru ê pâ Ba diri.
24«Üu, o maina wârimuru'gà ba gà nye pwi majoroé, ba gà pòtàmwara tèpa péroféta, ma pàra tèpa âboro kà Pwiduée. Üu, dau wâru tàpé na pòtàmwararà gée googà, pitiri gòropuu; â o pitèigà goo.»
