Sumi Yi Puguiag Mo 18

1

2

3

4

5

6

7

8

9

10

11

12

13

14

15

16

17

18

19

20

21

22

¹Afa ka nangogba ming of wanai el hevenim wahiagim pe bog. Ehe nalig unehlagna fegim afa ehena afwambusugug mungwali bite gam ika minefeg.

²Afa ehe hugna enaig esona og; Babilon nalig kimbig eba ati amtakwaleg ena kimbigba eba ahanaig ahanaig nimbasa amtakwalig enanai yi pugu esiagef. Afa ahanaig ahanaig hwesna twafig i afa nongug mengna twafig i ena kimbig wa go.

³Afa mungwali minginag kimbig wanai elim wanambugo minefegim ahanaig ahanaig nihe amtakwalig fiagig. Sohnaigba ofenaiba angwafig amunaim uflog bug kifutig faigim eso asise fiafag. Afa bite nai misog el ehem fapukof nafoba eso Babilon enaksag gawigna feg. Afa ena kimbig wanai ogna ahanaig ahanaig enaksag gawig wambugi afa so mungwali bisnis el ehem enaig wambwaigogim eso enaksag kig wambug.

⁴Afa ka higigba ming elni mengig heven wa pugug. Ehe enaig esog og; Kana el sohnana mo wahigim eso opuko ambugog, masa ne mungwal wahe ahanaig ahanaig nihe eseagif, masa ne mungwal ena tautig fif.

⁵Afa ehena nuhwef mo heven wa skoa hwaligog wahiyi afa God mas enam eteti mo.

⁶Afa ehe so nem esenagba so na gwenaig mungwag ehem esena. Afa so na ehem mungwag sambaga nagim esenawag. Afa ma nem mungo kinig faiba eso ne ehem kinig mungwag sambaganagim wambtigiai.

⁷Afa ehem enaksag tautig i afa kinig i faibi eba mungwalofug enaksag gawig i afa heafna unehlag fingi fukuagi hefum so fai. Ehe enaig onigig og, ‘Kaba kwin ga, kaba mang ligag hwainig mo, afa kinig mas kam pugunai.’

⁸Afa so ahanaig ahanaig kinig ikagna ehengelim pugunibi afa so ehengelim gih puguni, afa ehengel wewatoi, afa ehengel bini pigi afa so ehem suwi wa tuhluf. Enaba mungo osuna pugunif. God Ainiyag ehe kifutig feg eso ehem kwefihianagef.

⁹Afa mungwali bitenai misog el ehem fapukof nafogim afa ehena amtakwalig nihem pahlukuiag eso enag suwiegim nangugim afa so kusugu hwatigo.

¹⁰Afa ehengel embefigim enag tautigim wahigwa finigim agfohieba afa esogog og; Hoi yo, Babilon nalig kimbig nasabam, autunamba ne kifutig fena afa ikagna amtakwaleg nimbiafena moawa nem opuguna.

¹¹Afa el mas bisnis elni gawig mas piske wambugoni afa so ehengel gaba Babilon kimbigim kusugunigim wewatigo.

¹²Afa heafgelni gawig eba gol i, silva i, lahlag hun i, kopu i, ahanaig ahanaig lahlag lofug i, fini i, nemtaiwe i, afa mungwali ahanaig ahanaig gau ginofena gugwekig i, hun i, afa bras i afa kapa i enaig eseagini.

¹³Afa ming gawigba eba sinamon li lofug i, sawo i, ahanaig ahanaig lahlag fungugna sanda i, wain bug i, wel bug i, plaua i, wit i, bulmakau i, sipsip i, hos i, afa hos sime i enaig feg afa isug elim ningitigigim eso enana kig wambug.

¹⁴Afa bisnis el enaig esog og, “O Babilon, mungwali gau so na hugna membeg wambug eba enaba awaiyef. Nana unehlag i gawig i eba mas gofiba ne mas piske enam nangui.”

¹⁵Afa ena bisnis el so enanai yi gafugag feagig afa enaksag kig wambug afa so ehengel enag tautigim wahigwa finigim agfohiefiba afa so kusugugim wewatigona.

¹⁶Afa ehengel enaig esog og; Hoi yo, Babilon nalig kimbig nasabam, autunam ehe ahanaig ahanaig lahlag lofug fatina afa gol i, lahlag hun i, afa kopu i aitiagena.

¹⁷Afa ikagna ehena mungwali gawig awaiena. Afa mungwali sip yi misog el i afa sip yi ahuiaule el i, afa sip yi gafugag el i, afa sip nai bisnis el i wahigwa agfohieba.

¹⁸Afa so ena suwieg nangunim enaig esogona og, “Sonag kimbigba ehe minginagim gosinig.”

¹⁹Afa smof wambinim misog gam kokofeaginim afa wewatigona enaig esogona og; Hoi yo, Babilon nalig kimbig nasabam, afa so sip enaksag gawig ena kimbig gam wambkugba eso sipni el enaksag kig enanam wambug. Afa so enaba mungwali ikagna gweyi awaieg.

²⁰Afa ma ena mo awaieba so heven sifakale fe. Afa so Godna el i, afa kanog hwatieg el i, afa Godna mo fi sihiaule el i so na sifakali so nem ahanaig esehiag wambsiegohug eba God ehe ati mungwag tautig faig.

²¹Afa kifutig of wanai el kinigni hun nalig fagim bu gam hugna taitugim afa ehe enaig esog og; Eba Babilon nalig kimbig gwenaig esef afa el mas piske nangui.

²²Afa gitana moag i, afa fufni moag i, afa fifelona moag i, afa elni mwanifi i mas nem piske pugunai. Afa amangel so lahlag gafuga fegim anwanafig gaba mas enanai yi gofi afa el mas nasneg moagim piske higi.

²³Afa lamna afwambusug mas enanai yi gofi afa enanai yi el angwafig wambugum mas gofi. Afa ena kimbig wanai bisnis el nalig unehlagna fegim afa Babilon wanai elim agisu fihiagigim afa so mungwali mwakwale gonugig.

²⁴Afa ehe Godna mo fi sihiaule elni taf i afa Godna elni taf i enam ahagagigim afa minginag elim gaba gwenaig esegonigbi eso God Babilonim mungwag tautig faig.