1Kafnge én, teengu satu kasaligan Dwata fdanà mdà di langit. Nun bong glalan na i knengan magtuyal i klamang banwe.
2Toon falbong i taluan, manan, “Tamalmo nan. I bong banwe Babilon tamalmo, na ani tambaling gumnè i dad sasè tulus, i dad busaw, na i kdee bung sasè na magagsik anuk di bnas.
3Na takel kdee ani di dad to di kdee sahal banwe, du magin ale di libun, dunan i banwe Babilon, mimò too sasè knayè i lawehla, na i dad harì di tah tanà magin di kimoan i magagyà nimò, na dad to gal fabli di tah tanà, mbaling ale dad to nun bong knun, du mdà di kbayadan i kdee kayean.”
4Kafnge én, lingegu satu talù mdà di langit, manan, “E dad togu, lamwà gamu di banwe én, du fye là gamu gagin di kagsalà i sasè libun ani, du fye là gamu gakuf di kaflayaman kadang di fulé duh,
5du i dad salaan tatoo maslasud na tagafat di langit, na là sa glifet Dwata i too sasè nimoan.
6Na bnalas di kenen i kaflayam i galan flayam gamu, na ku tan i kalbong i flayaman i dademe, lwe dulê i kablat i kaflayam i flayam Dwata kenen. Na ku tan i kaflabè i libun ani di gamu, lêman lwe dulê fa i kablat i kaflabè Dwata kenen.
7Salngad di kafdatahan i kton na kimenan i sasè knayean, én sa kablat i kaflayam na klidù nawa i blé di kenen. Fdag kenen, manan, ‘Agu i satu gumdatah, ise agu satu libun balu, na landè klidù nawagu kel di landè sen.’
8Taman du ani manan, baling mlal kel di kenen dad kaflayam, i sasè tduk, i bong klidù nawa, na kbitil. Na snakuf kenen kadang di lifoh na mti sakuf, du Amuito Dwata i mukum na mlayam kenen, too mtulus.
9“Na i dad harì di tah tanà, i gagin di kenen di kimoan i too sasè knayè i lawehan, too ale mngel na too ale mlanu di kitela i buk ksakuf kenen.
10Na tadag ale fawag, du too ale likò, du ken gakuf ale di bong kaflayaman. Na kdeela mangman, ‘Magakdo. Tay magakdo, du di muna fa bong banwe Babilon too mdatah, bay tatoo mlal kakel i kalmom.’
11“Na dad to gal fabli mngel na mlanu, du mdà di kalmon, du talandè dad to mayad i dad fablila,
12i blawenla na dad salafìla, na dad mabtas batula, na i dad férlas, na i dad dee bung safut mabtas, mlunu na fulè, na i kdee bung kayu too mangbun, dad kandeen nimòla mdà di malbang kifan dad lmanaf éléfanti, mabtas kayu, tabaga, tek, na dad batu dnagit marmol.
13Na talandè mayad i dad bol uten, na i too fye bun gal falbuk, bulung dnagit mira, dademe fangbun i litak i kayu, dad binu, tabè, arina, trigu, dad baka, dad bilibili, dad kudà, na dad sbung kariton gal snakay i dad to, na dad to fasak na dademe dad to bnilanggù galla fabli. Kdee ani landè nan mayad dun.
14“Na man i dad to gal fabli di libun guflingen i banwe Babilon, manla, ‘I kdee dad knunam i toom nibal talandè nan gdè, mti malmo, na i dad gafye nawam talana di ge.’
15“Na i dad gamwè bong knun mdà di kafablila i dad mabtas déén, tadag ale kadang too fawag, du too ale likò ku gakuf ale di too sasè kaflayaman. Too bong klidù i nawala na mngel na mlanu di gaslok i banwe ani,
16na manla, ‘Magakdo. Tay magakdo i bong banwe ani, du tagnè gal kamlaweh i safut too mabtas, mlunu na fulè, na tagnè mkas blawen, na dad batu too mabtas, na dad férlas.
17Kabay di là mlo ani, i kdee dad knunan tatoo mlal malmo.’ “Na i kdee to mebe i dad kafal, na i dademe mimò di dad kafal, i kdee to smakay, na i kdee to meye i klidùla di tah i mahin, slame ale tadag too fawag.
18Na di kitela i buk mdà di ksakuf i banwe ani, kdeela mkit na manla, ‘Landè dademe banwe gasngad i bong banwe Babilon.’
19Na du too mlidù i nawala, bnubulla kfung i tanà ulula, na mngel na mlanu ale, na manla, ‘Magakdo. Tay, magakdo i bong banwe ani, du mdà di knunan mbaling nun bong knun i kdee dad mfun i dad kafal. Kabay di là mlo, tatoo mlal malmo i kdee dad knunan.
20Kabay gamu dad mnè di langit, too gamu flehew di kalmo i bong banwe ani, na gamu dad nfun Dwata, gamu dad to dek Dyisas Krayst, na gamu dad tugad Dwata flehew gamu, du tanukum Dwata i banwe ani na toon fanlayam, du balasan i dad sasè mgimò di gamu di muna fa.’ ”
21Kafnge én, teengu satu mtulus kasaligan Dwata na nketan i batu salngad kalbong i bong batu di gilingan, na i kagketan flesan bat ditù di lam i mahin, na manan, “Gambet ani i kagakto kalmo i bong banwe Babilon, na talà lêman teen i syudad ani.
22Na talà lêman linge di banwe ani i kakbit dad arfa, na dad to mlingag, na dad to samlali, na dad to mféw. Na balù tan kfulung i dad to, talandè to mimò déén. Na talà linge déén uni i gilingan.
23Na talà lêman teen di banwe ani kneng i salò. Na talà lêman linge klehew i dad lagi na dad libun falami sdeme. Di muna fa i dad to gal fabli too ale mgafè di tah tanà. Fagu di kafgawam i dad to di banwe ani, tamafgaw dad to mdà di kdee banwe.
24Tatoo falmo Dwata i banwe Babilon, du déén gumite i kfaloh i litè i dad tugad Dwata, na dademe dad to nfun Dwata, na balù i litè i kdee dademe dad to bnanò di tah tanà.”
