Text copied!
CopyCompare
Paipel - Tuteronomi

Tuteronomi 4

Help us?
Click on verse(s) to share them!
1Mürin, Moses a üreni ekewe aramas, “Ämi chon Israel, iei oupwe rongorong ngeni ekewe allük me pwüüng üpwe aiti ngenikemi, oupwe pwal aleasochisiir. Mürin oupwe manau, oupwe pwal tolong o fanüeni ewe fanü ewe Samol mi Lapalap än ämi kewe lewo we Kot epwe ngenikemi.
2Ousap apachätä och ngeni ekewe kapas üa allük ngenikemi, ousap pwal aimwü och seni. Iwe, oupwe aleasochis ngeni ekewe allük än ewe Samol mi Lapalap ämi we Kot, usun üa allük ngenikemi.
3Iwe, ämi oua püsin küna mine ewe Samol mi Lapalap a föri me lon Paal-peor. Pun ewe Samol mi Lapalap ämi we Kot a arosala seni leimi ekewe mwän meinisin mi fel ngeni Paal seni Peor.
4Nge ämi mi nüküchar won ewe Samol mi Lapalap ämi we Kot, oua chüen manau tori ikenai.
5Nengeni, üa aiti ngenikemi ekewe allük me pwüüng usun ewe Samol mi Lapalap ai we Kot a allük ngeniei, pwe oupwe apwönüretä lon ewe fanü ämi oupwe le tolong lon pwe oupwe fanüeni.
6Oupwe aleasochisiir o apwönüretä, pun ren ei epwe pwä ngeni chon ekewe mwü ämi tipachem me mirit. Iwe, lupwen repwe rongorong ekei allük meinisin, repwe apasa, ‘Ellet, chon ei mwü mi lapalap eu mwichen aramas mi tipachem o mirit.’
7Pun meni mwü mi watte a wor an kot mi kan ngeni, usun ewe Samol mi Lapalap ach we Kot a kan ngenikich iteiten fansoun sa köri pwe epwe alisikich?
8Nge meni mwü mi watte a wor an allük me pwüüng mi fokun pwüngüöch, usun ekei allük meinisin üa aiti ngenikemi ikenai?”
9“Iwe, oupwe afälikemi o tümwünükemi pwe ousap manlükala ekewe mettoch mesemi ra fen küna, ousap pwal mwüt ngeni pwe repwe ettiwu seni lon lelukemi lon ränin manauemi meinisin. Nge oupwe aiti ngeni nöümi me nöün nöümi,
10usun mine a fis lon ewe rän oua ütä fän mesen ewe Samol mi Lapalap ämi we Kot me fäsonun ewe chuk Horep, lupwen a üreniei, ‘Kopwe amwichato rei ekewe aramas pwe repwe rongorong ai kapas o kaiö usun ar repwe meninitiei lon ränin manauer meinisin won fanüfan. Iei usun repwe pwal aiti ngeni nöür.’
11Iwe, oua kanoto o ütä me fäsonun ewe chuk, lupwen ekkei a ngetengetetä seni ewe chuk tori fän läng. A pwal wor kuchuchol me rochokichin rochopwak.
12Mürin, ewe Samol mi Lapalap a kapas ngenikemi seni lukalapen ewe ekkei. Ämi oua rongorong ngingin ekewe kapas, nge ousap küna lapalapan. Mi chök wor eu möngüngü.
13Iwe, Kot a asile ngenikemi an pwon, ekewe engol allük, a allük ngenikemi pwe oupwe aleasochisiir. A pwal makeer won rüepek fau mi chöpöp.
14Lon ewe fansoun ewe Samol mi Lapalap a allük ngeniei, pwe üpwe aiti ngenikemi ekewe allük me pwüng, pwe oupwe aleasochisiir me lon ewe fanü ämi oupwe pwerelong lon pwe oupwe fanüeni.”
15Iwe, lon ewe rän ewe Samol mi Lapalap a kapas ngenikemi seni lon ewe ekkei me won ewe chuk Horep, ousap küna lapalapan. Iei mine oupwe fokun afälikemi,
16pwe ousap tipis ren ämi föri eu uluulun anümwäl fän itemi lon lapalapen sokopaten uluul, usun uluulun eman mwän ika fefin,
17uluulun sokun man mi nom won fanüfan, uluulun sokun machang mi äkkäs fän läng,
18uluulun sokun man mi tö won pwül, pwal uluulun sokun ikenen leset meinisin.

19Oupwe tümwünükemi, pwe lupwen oupwe netä läng o küna akkar me maram me fü kana pwal masouen fän läng meinisin ousap tupula o fel ngeniir ika pwal angang ngeniir. Pun ewe Samol mi Lapalap ämi we Kot a mwütätä ngeni chon ekewe mwü won fanüfan ekei mettoch pwe repwe fel ngeniir.
20Nge ewe Samol mi Lapalap a angeekemi o emwenikemiiwu seni Isip mi wewe ngeni eu lenien ketel mächä, pwe epwe nöünikemi, usun a fis ikenai.
21Iwe, ewe Samol mi Lapalap a pwal song ngeniei pokitemi o pwon fän akapel pwe üsap tongeni feila pekilan ewe chanpupu Jortan o tolong lon ewe fanü mi mürina ewe Samol mi Lapalap ämi we Kot epwe ngenikemi pwe oupwe fanüeni.
22Pun ngang üpwe mäla lon ei fanü, nge üsap feila pekilan ewe chanpupu Jortan. Nge ämi oupwe feila pekila pwe oupwe fanüeni ewe fanü mi mürina.
23Oupwe püsin äfälikemi pwe ousap manlükala ewe pwon ewe Samol mi Lapalap ämi we Kot a föri ngenikemi. Ousap föri eu uluulun anümwäl lon lapalapen mettoch meinisin i a pinei senikemi.
24Pun ewe Samol mi Lapalap ämi we Kot a usun chök eu ekkei mi kü, pwal eman Kot mi lukomong.
25Iwe, lupwen epwe wor nöümi kana me nöün nöümi, nge oua nomotam lon ewe fanü, a tongeni fis pwe oupwe tipis ren ämi föri uluulun anümwäl lon lapalapen sokopaten mettoch. Iwe, ren ämi föri mine a ngau me fän mesen ewe Samol mi Lapalap, oupwe asonga.
26Ikenai üpwe köri läng me fanüfan pwe repwe atipisikemi, pwe are ousap aleasochisiei, oupwe müttir rosola meinisin seni lon ewe fanü ämi oupwe fanüeni mürin ämi feila pekilan ewe chanpupu Jortan. Ousap manauatam won, nge oupwe fokun mäla.
27Iwe, ewe Samol mi Lapalap epwe atoropasafeilikemi lein chon ekewe mwü, nge ekoch echök me leimi repwe manau lon ekewe fanü ia ewe Samol mi Lapalap epwe asükemiila ie.
28Ikenan oupwe angang ngeni sokopaten kot mi för seni mwüch me fau resap tongeni küna ika rongorong ika mongö ika tini, pun ir förien pöün aramas.
29Nge ika oupwe kütta ewe Samol mi Lapalap ämi we Kot me ikenan, oupwe küna are oupwe kütta ren unusen lelukemi me unusen ngünümi.
30Iwe, lupwen oua nom lon riaföü, nge ekei mettoch meinisin repwe torikemi lon kan rän mwach, mürin oupwe liwiniti ewe Samol mi Lapalap ämi we Kot o aleasochis ngeni.
31Pun ewe Samol mi Lapalap ämi we Kot eman Kot mi eäni ümöümöch, esap likitikemi ika nikemi, esap pwal manlükala an pwon fän akapel ngeni ämi kewe lewo.
32Iwe, oupwe ais tichik usun ekewe fansoun ra la mwen ämi uputiu, seni ewe rän Kot a föri aramas won fanüfan. Oupwe pwal ais tichik seni epek läng tori epek, ika eu sokun mettoch mi manaman a fen fis, ika aramas ra fen rongorong usun ei sokun lapalap.
33Ifa usun, mi wor aramas ra rongorong mwelien eman kot seni lon ekkei usun ämi oua rongorong, nge ra chüen manau?
34Are ifa usun, mi wor eman kot a fen sotuni le feito o angeawu eu mwichen aramas seni eu mwü fän püsin itan ren asisil me manaman, ren maun, ren pöün mi manaman o aköüpöü, pwal ren watten föför mi eniwokus, usun ewe Samol mi Lapalap ämi we Kot a föri fän itemi lon Isip me fän mesemi?
35Ekei mettoch ra fis ngenikemi, pwe oupwe silei pwe ewe Samol mi Lapalap i wesewesen Kot, esap pwal wor eman lükün.
36A aronga ngenikemi mwelian seni läng pwe epwe emiritikemi. Nge won fanüfan a aküna ngenikemi an ekkei mi lapalap, oua pwal rongorong an kapasowu me lon ewe ekkei.

37Iwe, pokiten a echeni ämi kewe lewo o afili mwirimwirir, a emwenikemiiwu seni Isip ren an nonom ngenikemi, pwal ren an manaman mi lapalap.
38A asüela me mwemi ekewe mwü mi watte o pöchökül senikemi, pwe epwe emwenikemiilong lon fanüer o ngenikemi pwe oupwe fanüeni, usun a fis ikenai.
39Iei mine ikenai oupwe chechemeni o iseis lon lelukemi pwe ewe Samol mi Lapalap i wesewesen Kot lon läng pwal won fanüfan, esap pwal wor eman lükün.
40Iwe, oupwe aleasochisi an kewe pwüüng me an kewe allük üa ngenikemi ikenai, pwe oupwe feiöch ämi me mwirimwirimi, oupwe pwal manauatam lon ewe fanü ewe Samol mi Lapalap ämi we Kot epwe ngenikemi pwe fanüemi tori feilfeilachök.”
41Mürin, Moses a aimwüela ülüngat telinimw ötiuen ewe chanpupu Jortan,
42pwe ewe mi niela eman aramas epwe tongeni sü ngeniir. Eman mi niela chon arun fän chechengau, nge esap oput i me mwan epwe tongeni sü ngeni eu me lein ekei telinimw o amanaua manauan.
43Ikkei iten ekewe telinimw: Peser mi nom lon ewe fanüapö mi sosonöch fän iten chon ewe ainangen Rupen, Ramot mi nom lon ewe fanü Kiliat fän iten chon ewe ainangen Kat, me Kolan mi nom lon Pasan fän iten chon ewe ainangen Manasa.
44Iwe, ikkei ekewe allük Moses a ngeni ekewe aramasen Israel.
45Ikkei ekewe pwüüng me allük Moses a asile ngeni ekewe aramasen Israel, lupwen ra towu seni Isip,
46o nonom lon ewe lemol ötiuen ewe chanpupu Jortan sasape ngeni Pet-peor lon fanüen Sihon ewe kingen chon Amor mi nemenem lon Hespon. Iwe, Moses me ekewe aramasen Israel ra akufu Sihon, lupwen ra towu seni Isip.
47Ra fanüeni fanüan, pwal fanüen Ok ewe kingen Pasan. Ir ekewe ruoman kingen chon Amor mi nonom ötiuen ewe chanpupu Jortan.
48Iwe, fanüer a popuetä seni Aroer mi nom ünükün lemolun ewe chanpupu Arnon o tori ewe chuk Sirion, a pwal iteni Hermon.
49A pwal pachelong unusen ewe fanü Arapa mi nom ötiuen ewe chanpupu Jortan tori ewe Setin Mäla fätiuen ewe chuk Piska.