1“Iwe, esap wor eman mwän mi tatakis föün ika pöküela ewe kükün inis epwe choni nöün ewe Samol mi Lapalap we mwichen aramas.
2Esap wor eman upun rerewöl, esap pwal wor eman mwirimwirin epwe choni nöün ewe Samol mi Lapalap we mwichen aramas tori aengolun pilon.
3Iwe, esap fokun wor eman chon Amon ika chon Moap, esap pwal wor eman mwirimwirin epwe choni nöün ewe Samol mi Lapalap we mwichen aramas, inamwo are a tori aengolun pilon.
4Pun resap sounikemi fän pilawa me koluk won ewe al, lupwen oua towu seni Isip. Nge ra fen möni Palam nöün Peor we mwän seni Petor lon Mesopotamia, pwe epwe anümamauakemi.
5Nge ewe Samol mi Lapalap ämi we Kot esap rongorong ngeni Palam, pwe a fen sorei ewe anümamau ngeni feiöch fän itemi, pun a tongeekemi.
6Ousap kütta ar kinamwe ika ar pisekisek lon ränin manauemi meinisin.
7Ousap oput ekewe chon Etom, pun ir aramasemi. Ousap pwal oput ekewe chon Isip, pun oua piin wasöla lon fanüer.
8Iwe, mwirimwirir kewe mi uputiu lon aülüngatin pilon ra tongeni choni än ewe Samol mi Lapalap mwich.”
9“Iwe, lupwen oua feila maun ngeni chon oputemi, nge oua nom lon ewe lenien sounfiu, oupwe tümwünükemi seni sokun mettoch mi limengau meinisin.
10Are mi wor eman mwän leimi esap limöch pokiten chan mwän a towu seni lepwin, ätewe epwe towu seni ewe lenien sounfiu o nonom lükün,
11lupwen a tori lekuniol epwe tütü, nge lupwen akkar a tuputiu, a tongeni tösefälilong lon ewe lenien sounfiu.
12Iwe, epwe wor eu leni lükün ewe lenien sounfiu, ia oua tongeni feila o ngasala ie.
13Epwe pwal wor remi efoch söföl lükün ämi pisekin sounfiu. Pun lupwen oupwe feila lükün, oupwe tuw eu pwang o irela ämi kiten mongö.
14Pun ewe Samol mi Lapalap a fetalfeil leimi lon ämi lenien sounfiu, pwe epwe amanauakemi o akufu chon oputakemi me mwemi. Iei mine ämi lenien sounfiu epwe pin, pwe Kot esap küna och limengau me reömi o kul senikemi.”
15“Iwe are eman amanau a sü seni an samol o süla reöm, kosap aliwini ngeni an samol.
16Epwe nonom reöm lon ewe leni a filätä ika lon eu lein ekewe telinimw ia a sani ie. Kosap ariaföüü.
17Iwe, esap wor eman re Israel ika eman fin Israel epwe amömö inisin fän iten lisowu lon angangen lamalam.
18Kosap uwato liwinin eman fin lisowu ika liwinin eman mwän mi lisowu lon imwen ewe Samol mi Lapalap om we Kot pwe liwinin om pwon, pun ekei sokun aramas ra anioput me ren ewe Samol mi Lapalap om we Kot.
19Kosap mwüt ngeni pwiüm chon Israel och mettoch fän iten om kopwe angei winnan won moni ika won mongö ika won och mettoch ka mwütätä.
20Iwe, seni eman chon ekis ka tongeni angei winnen och mettoch ka mwüt ngeni, nge seni pwiüm kosap fokun angei winnen ewe mettoch ka mwüt ngeni. Are ka föri iei usun, ewe Samol mi Lapalap epwe afeiöchuk lon om angang meinisin ka föri lon ewe fanü kopwe tolong lon pwe kopwe fanüeni.
21Iwe, are ka eäni eu pwon ngeni ewe Samol mi Lapalap om we Kot, kosap tunala fansoun om kopwe apwönüetä. Pun ewe Samol mi Lapalap om we Kot epwe fokun angei senuk mine ka eäni pwon, nge en kopwe tipis, are kosap apwönüetä.
22Nge kosap tipis, are kosap eäni eu pwon.
23Kopwe tümwünüöchü le apwönüetä meinisin mine ka apasa lon om pwon, pun ka püsin föri ei pwon seni letipom ngeni ewe Samol mi Lapalap.
24Are kopwe tolong lon än chon arum tanipin wain, ka tongeni ochoch föün irän wain tori ka möt, nge kosap kinikinilong lon om chüük.
25Iwe, lupwen om kopwe tolong lon än chon arum tanipin wiich esamwo pöküpök, ka tongeni tülü umwun kewe, nge kosap pökü ngeni efoch kama.”
