SAN LUCAS 9:51-61

⁵¹Bra wa tiya ti tsan chaꞌ tyaa Jesús nde niꞌ kwan, bra kanꞌ ngusñi yu tuwiin chaꞌ tyaa yu nde Jerusalén.

⁵²Ngulo yu tñan ꞌin neꞌ nu ngiꞌni xaꞌan chaꞌ ꞌin yu chaꞌ tsaa neꞌ nde loo la ꞌin yu, chaꞌ tsaa chkwiꞌ neꞌ loꞌo neꞌ kichen xuwe ti seꞌen nu tyijin yu loꞌo neꞌ. Bra kanꞌ ndyaa neꞌ kanꞌ ska kichen xuwe ti nu ndukwa kwiꞌ seꞌen ti kichen Samaria; mdaꞌan naan neꞌ seꞌen tyiꞌin neꞌ tla kanꞌ.

⁵³Bra kanꞌ ja mslyaa neꞌ kichen xuwe kanꞌ ta seꞌen kanun neꞌ tla, chaꞌ jlyo tiꞌ neꞌ kichen kanꞌ, chaꞌ wa tsaa ti neꞌ nde kichen Jerusalén.

⁵⁴Bra wa ynan Santiago loꞌo Xuwa taꞌa ndaꞌan Jesús chaꞌ kanꞌ, bra ti ykwiꞌ neꞌ kanꞌ loꞌo Jesús: ―Yu kula ―ndukwin neꞌ kanꞌ―, ¿ta ja nchka tiiꞌ chaꞌ jñan ba kiiꞌ nu tyoꞌo nde niꞌ kwan chaꞌ kaluu lyuu seꞌen ndiꞌin neꞌ kwa a? Kuꞌni tyii ran ꞌin neꞌ siyaꞌ ti, skin neꞌ bra kanꞌ. Ngwañaꞌan yꞌni ayman Elías sꞌni ―ndukwin neꞌ ꞌin Jesús.

⁵⁵Bra kanꞌ naꞌan ꞌa Jesús ꞌin neꞌ kanꞌ, ykwiꞌ yu loꞌo neꞌ bra kanꞌ: ―Ja ndiꞌya wan kwenta siyaꞌ ti sa ñaꞌan ndyoꞌo chaꞌ nu nchkwiꞌ wan ―ndukwin Jesús―. Siꞌi Tyiꞌi Ndiose lka nu ngwaꞌu ꞌwan chaꞌ chkwiꞌ wan chaꞌ kuxi ngwañaꞌan; kuneꞌ xaꞌan lka nu ngwaꞌu ꞌwan chaꞌ chkwiꞌ wan ngwañaꞌan.

⁵⁶Ja msuꞌwa Ndiose Stiǐn ꞌñaǎn ndijyaǎn chaꞌ kaǎn nten, chaꞌ kuꞌniǐn tyiǐn ꞌin nten chalyuu; chaꞌ ka kulaa Ndiose ꞌin nten chalyuu ꞌin nchga chaꞌ kuxi, kanꞌ tñan ndijyaǎn chaꞌ kuꞌniǐn ―ndukwin Jesús. Bra kanꞌ mdoꞌo neꞌ yaa neꞌ xka kichen xuwe ti.

⁵⁷Tuꞌwa tuwiin seꞌen ndyaa neꞌ naꞌan neꞌ ꞌin ska yu kiꞌyu. ―Yu kula ―ndukwin yu―, loꞌoǔn nchka tiǎnꞌ tsaꞌaǎn loꞌoo; la seꞌen tsaa, tsaꞌaǎn loꞌoo.

⁵⁸Bra kanꞌ mxkwen Jesús ꞌin yu kiꞌyu kanꞌ: ―Nu lka kutaꞌ ni, ndiya tukee ꞌin iꞌ seꞌen ndyuꞌwi iꞌ kajaꞌ iꞌ; loꞌo kiñi xuwe ti, nskwa seꞌen ndyuꞌwi iꞌ lo yka; loꞌoǔn ni, wa mdiyaǎn lo chalyuu chaꞌ kaǎn nten, loꞌo kanꞌ ja nsuꞌwi seꞌen xkwaǎn kajaǎnꞌ, ja ndiya seꞌen tyukwaǎn xitñaǎnꞌ.

⁵⁹Bra kanꞌ ykwiꞌ Jesús loꞌo xka yu kiꞌyu: ―Kaan ñaꞌan lyaa ꞌñaǎn ―ndukwin. ―Yu kula ―ndukwin yu ꞌin Jesús bra kanꞌ―, kataa chinꞌ ꞌñaǎn chaꞌ ti kanuǔn la chinꞌ loꞌo stiǐn sa ñaꞌan yaꞌ nu kaja stiǐn, chaꞌ ñaꞌaǎn katsiꞌ yu.

⁶⁰Bra kanꞌ ykwiꞌ Jesús loꞌo yu: ―Ti ndiya la chinꞌ xka ta nten ꞌwan nu ka kutsiꞌ ꞌin nten nu wa ngujwi; nuꞌwin ni, ndiꞌin chaꞌ tsaa loꞌoǔn chaꞌ chkwiiꞌ chaꞌ suꞌwe ꞌin Ndiose loꞌo nten.

⁶¹Bra kanꞌ ykwiꞌ xka yu kiꞌyu loꞌo Jesús: ―Yu kula, loꞌoǔn nchka tiǎnꞌ tsaꞌaǎn loꞌoo ―ndukwin yu―, kataa chinꞌ ꞌñaǎn chaꞌ tyaꞌaǎn slaǎnꞌ loꞌo neꞌ taꞌaǎn nde naꞌan tyiǐn.