Luka 9:51-61

⁵¹Yesu yo Kei mi ma dokodoo ido palai beeame ee olo koola tooboome, yo Yolusalem mapoo dilame goomogaso.

⁵²Eseme yayo odoo abo Samaliya mi ee ma kulodu mi pepooko hee mapoo malalo diye diso, diayo dileso omapoo yayo tilei moso ee mopoodoo dalame.

⁵³Esino mosobia oso Yesuye Yolusalem mapoo dileigo di goo ee duloso, diayo yo gowoolone yimapoo moso tenele.

⁵⁴Eseme Yesu o hamamee dili odoo Yonee dio Yemes dio goo hagee duloso yimapoo egeesee takaso, “Lodee, douso mosobia odoo hagee piligilame, iyo Kei mi ma dokodooga dou toose dee takalai, no goomogosomo?” diso.

⁵⁵Esino Yesuye dimapoo biditoboloso tobudulone dimapoo diya takaso.

⁵⁶Osoloso diba see mi hee mapoo diadeeso.

⁵⁷Yesu o hamamee dili odoo sabolo eli maga diadaga molome, odoo hedebe oso sibileso Yesu mapoo egeesee takaso, “Nayo mi hee kamapoo dusomo, ayo no deedee sileiso,” diso.

⁵⁸Yesuye yimapoo nei egeesee takaso, “Dobu so oso debeli mi ee moloso. Osoloso sóso tieseli ou moloso. Esino Odoo Holo, ayo tieli moso mauwe,” diso.

⁵⁹Eseme Yesuye see odoo hee mapoo egeesee takaso, “Nayo a deedee sibe,” diso. Esino odoo ogoso nei egeesee takaso, “Lodee, nayo epedee amapoo beeame tenee, ayo mo ma toga midoosoolaiya,” diso.

⁶⁰Eseme Yesuye yimapoo nei egeesee takaso, “Dio maga odoo wedia oso dieso nediliyo odoo wedia ee midoosodolone dabalai tekepo. Esino no sibileso Godeeye wiligi doloso badeli goo ee odoo mapoo takomo sile,” diso.

⁶¹Eseme odoo heeso see egeesee takaso, “Lodee, a nama hamamee dadalai goomogo. Esino a epedee hamapoo mo soosoo dimapoo emegei di to takalame dia,” diso.