Lucas 9:51-61

⁵¹Pues conda warix acꞌotoy e día conda aquetpa tuaꞌ atꞌabꞌay axin e Jesús tut e qꞌuin, cay uyare uyajcanuarobꞌ y che: —Nen ucꞌani ixto tuaꞌ inxin esto tama e chinam Jerusalem, che e Jesús.

⁵²Entonces e Jesús uyebꞌta ixin bꞌajxan cora winicobꞌ esto tama inteꞌ aldea tama e departamento Samaria tuaꞌ usajcobꞌ tiaꞌ tuaꞌ awayanobꞌ y tiaꞌ tuaꞌ awesenobꞌ.

⁵³Pero conda e gente xeꞌ turobꞌ tama e aldea era cꞌotoy unatobꞌ que war axiobꞌ esto tama e chinam Jerusalem, qꞌuijnobꞌ y machi acꞌajnobꞌ.

⁵⁴Pero conda natanwa tunor era umen uyajcanuarobꞌ e Jesús xeꞌ jax e Santiago y e Juan, cay uyareobꞌ e Jesús y chenobꞌ: —Cawinquiraret, ¿Acꞌani ca tuaꞌ caware eꞌcmay watar e cꞌajc tichan tut e qꞌuin tuaꞌ acꞌaxi tama ujorobꞌ tuaꞌ acꞌapesnobꞌ umen e cꞌajc era bꞌan cocha cay uche e profeta Elías tama e onian tiempo? che e Santiago y e Juan.

⁵⁵Pero sutpa irna utobꞌ umen e Jesús xeꞌ cay ucꞌaye y che: —Nox machi war inata tucꞌa mein xeꞌ war ubꞌijres ijor.

⁵⁶Porque nen xeꞌ Uyunenen e winic machi ebꞌetna tarien tuaꞌ insati e winicobꞌ axin, sino que tuaꞌ incorpesobꞌ, che e Jesús. Entonces locꞌoy ixiobꞌ esto tama otronteꞌ aldea.

⁵⁷Entonces conda war axanobꞌ tama inteꞌ bꞌir, cꞌotoy inteꞌ winic tut e Jesús y che: —Niwinquiraret, cꞌani inxin tacaret tic taca tiaꞌ iꞌxin, che e winic.

⁵⁸Y e Jesús uyare e winic y che: —E chꞌajch ayan uchꞌen tiaꞌ tuaꞌ awayan, y e mut ayan usijc tiaꞌ tuaꞌ apacwan awayan, pero nen xeꞌ Uyunenen e winic ma tiaꞌ tuaꞌ inchꞌabꞌu nijor tuaꞌ inwayan, che e Jesús.

⁵⁹Y e Jesús uyare otronteꞌ winic y che: —Lar tacaren, che e Jesús. Pero e winic che: —Niwinquiret, actanento tuaꞌ inxin incojco nitata este que axin achamay, y de allí waten tacaret, che e winic.

⁶⁰Pero e Jesús uyare e winic otronyajr y che: —Actan tin e chamen turu tama uyalma tuaꞌ axin umuqui tin e war achamay, pero net, quiqui chectes tut e gente tic taca cocha tuaꞌ oꞌchoyobꞌ tama uchinam e Dios, che e Jesús.

⁶¹Y cꞌotoy otronteꞌ winic xeꞌ upejca e Jesús y che: —Niwinquiret, cꞌani inxin tacaret pero actanento tuaꞌ inxin tama niotot tuaꞌ inware nitata y nituꞌ y tunor nipiarobꞌ tucꞌa war inche era tuaꞌ machi ubꞌijnuobꞌ que ¿tiaꞌ ixien? che e winic.