San Lucas 9:51-61

⁵¹Chiyura nuna kasha pakane, Jesúsne Jerusalén pɨpulumal ɨn min kit ɨmɨzta.

⁵²Usne mɨnpazharuza an ñancha ɨninnara. Uspane Samaria pɨpulura ɨat kit nappara, pitmukin sayana.

⁵³Sun Samaria pɨpulura uztuzne ussa yal nammɨlannarachi, us Jerusalén pɨpulumal pianashimtu akwa.

⁵⁴Paiña kammuruz, Santiagokas Juankas, sun nɨjkulpailkane, Jesústa ka kizpailta: —Chiyuras uztuza paikuiznapas, ippa ɨninnapa, usparuza kuanapa, ianapa.

⁵⁵Suasne Jesúsne puij kit paasta pilchanara, uspa sun kaizta akwa.

⁵⁶Ampu namtɨtmikane au sura atchi, awaruza piantana. Usne apain ara, awaruza watsat mɨlnana. Suasne uspane mamaz pɨpulura ɨara.

⁵⁷Miwara ɨamtuasmin, maza ampune Jesústa kaizta: —Anpat, mɨnta ɨkwara nua kanpashiras, kizta.

⁵⁸Jesúsne ussa sɨnkara: —Ɨnkal kwizane pil kulta pitmu mɨj. Chitchukas tɨra pitmu mɨj. Sunkana Ampu namtɨtmikane pitmu kwaizkulna mɨjchi.

⁵⁹Jesúsne mamazta kaizta: —Nawa kanpazha. Usne sɨnkara: —Anpat, an ñancha ap papihshta pilta kamshimtus, iraka.

⁶⁰Jesúsne ussa sɨnkara: —Diosta pianchimikane irɨttuza kamshina. Nune sunkana kinchi. Ɨt kit awaruza Dios aumɨza ɨninnashimtu kainanari.

⁶¹Mamazne ussa kaizta: —Anpat, nane nua kanpashimtus. An ñancha ap kwaltuza ɨru kiznashimtus.