SAN LUCAS 3:4-14

⁴ꞌBa kuán jotsaꞌen profeta Isaías kitsiꞌindutꞌa enre Naꞌenchana ña tsu: Jndare xuta xi ꞌñu nchja ngaꞌnde tꞌaxin: “Tꞌenda_ru ꞌba kixi chjuꞌi_ru ndiyare Naꞌenchana.

⁵Ngayéje kunga tseꞌnyu, ꞌba ngayéje nindu ꞌba xkundu kuakjansun, tuxi sjengusunni. ꞌBa ndiya tsitin sꞌe̱ kixi, ꞌba singasun ndiya xi nkꞌajun nkꞌatꞌa chun.

⁶ꞌBa ngatsiꞌi xuta skue xi Naꞌenchana tsikasen nga sikꞌangina” kitsu Isaías.

⁷ꞌBa Juan tsure xutankjiun xi inyafaꞌe nga mejénre nga satenda: —¡Jún ntjere tjiuye! ¿ꞌYá= xi ꞌba kitsunu nga kuiyu ngatꞌare kjuastire Naꞌenchana xi je tijña tiña?

⁸Tusa tiꞌon mé= xi kuakutsejen nga je kjinikꞌantjaiyo kjuafaꞌetsjennu ꞌba nga je jaꞌe ngañu ngixkun Naꞌenchana. Bi ꞌbitsaꞌen nikjaꞌetsjion ngajin inimanu: “Ña= xi ntjere Abraham.” Ngatꞌa ꞌba xinkixi_nuu̱ nga kaꞌnda kui ndiojobi Naꞌenchana ku̱anre saꞌen ntjere Abraham.

⁹Hachare Naꞌenchana je tijñandare nga kuate jamare yo. Meni ngayéje ya xi bi nda tu tsja, stisun ꞌba xanikjaꞌajin ndiꞌu.

¹⁰ꞌBa ꞌbatsaꞌen xutankjiun tsiningiyare Juan: —¿Mé= xi tjinnere nga siꞌee̱n yaꞌa?

¹¹ꞌBa Juan kitsingojore: —Xi tjinre jó chinga, jngu ngatatsjare xi nimé tjinre. ꞌBa xi tjinre xichine, ꞌba nde ngatatsjare xi tsajainre.

¹²ꞌBa nde kitsitiña yakꞌa xi kjebechjintjai tsajmi ngatꞌa tseꞌe Roma, tuxi satendani, ꞌba tsiningiyare Juan: —Maestru, ¿mé= xi siꞌee̱n ji̱n?

¹³ꞌBa Juan kitsure: —Tiꞌon xi kjuakixi. Bi ngisa tse chjubechjiu jotjin xjubechjiu.

¹⁴ꞌBa nde yakꞌa chasoldadu tsiningiyare: —ꞌBa ji̱n, ¿mé= xi siꞌee̱n? ꞌBa Juan kitsingojore: —Bi chjaꞌa_ru tonre xuta ninga bi fangiu tsajmi xi bi kitsaꞌen tsa tuxi ꞌbatsaꞌen sa̱kuninu tonre; tusa ngatjamaninu jotjin machjinu.