Luk 3:4-14

⁴O teyara ŋuko, komo quno ye-ye uni Aisaiako sokomeko ŋande nakayáŋaró, “Enendo mira wimbímo mahero neko yerero ŋande yimiroweya, ‘Uni Parámimboro khe roŋgaruwoya eneŋomboro ore roneneŋoyi qembe.’

⁵Sono koŋó ŋu soso noko toŋo riní maŋgoreweya, ko mira purí-purí ŋu soso wendaqi umbuweya, o iri-erá ŋu soso riní roneneŋoweya, ko khe pitipotó ŋu soso roŋgaruwoyi kararaŋiwí teweya.

⁶Ko unipare sosopo Anutuko rambaruru koŋgo yoreweya ŋu qene iŋowaŋgo.”

⁷Ŋunde ŋuroko Jonko unipare qambu sono rewero quro eneno maheŋgurí ŋu ŋande yimitoyaró, “Ye sire piyimi ŋuro simó ŋu! Anutuko newonde saŋgirí tero unipare o piyimi teyoteŋgo ŋu rambaruru yerewero tete. Ye dando yimironí sore naru piyimi ŋu takawero sono reteŋgo?

⁸Ŋunde ŋuroko newonde hamó rohoréŋaŋgurí ŋuro eŋgé rika tunoqiní. Ko kina ŋande ma iŋowero, ‘Abrahamko noreŋo usinani.’ Dokoro no ŋande ye yimiroteno, Anutuko meté yiní wondo ŋu rohoréŋoro Abraham koro usi-sí tunoqewaŋgo.

⁹Itaka ka soporo te toŋowero quro te hurímo yote. Ŋunde ŋuroko te soso eŋgé meté mu kama teyoteŋgo ŋuko toŋoro kewáko raŋoweya.”

¹⁰Ŋunde yiní unipare qambu ŋundo ŋande oseseyaŋgurí, “Asa ko nore date tewato?”

¹¹Yi mande topé yaró, “Uni ka kowe punu-punuyó irisa moré ŋundo kanata re kowe punu-punuyó moré kini ŋu inoweya. Ko uni ka o newero qu parámi ŋundo o kumi siyoro uni o newero qu moré kini ŋu inoweya.”

¹²Takis re-re uni kumimbo ŋuya sono rewero mahero ŋande oseseyaŋgurí, “Rondaqe-rondaqe uni, nore date tewato?”

¹³Ŋunde yiqo, ŋande yimiraró, “Ye takis ŋuro rokóŋo hamó qu naŋge siyoyi. Oka ka ŋuya ma rewero.”

¹⁴Kuma uni kumimbo ŋuya oseseyaŋgurí, “Ko nore date tewato?” Ŋunde yi ŋande yimiraró, “Ye wimbí tero uniparetoro mone qu ma woso rewero, ko kota yero mande kho ma yunowero. Yeŋo kimoye ŋuro naŋge metéŋoyi.”