Luka 3:4-14

⁴Kamba viyandikigwe mna ikitabu cha mtula ndagu wa Mulungu Isaya, “Munhu kokema kuluwala, ‘Itandeni nzila ya Mndewa, goloseni nzila yonda yabite!

⁵Kila konde dimemezigwe, kila kisugulu na kigongo visegezigwe, nzila hazigoloke zigolosigwe, na nzila zihile zotendigwa goya.

⁶Wanhu wose wokona Mulungu kowakombola wanhu!’ ”

⁷Lunhu lwa wanhu lumcholela Yohana yawabatize. Yohana kawalongela, “Mweye mizoka! Nani yawalongele modaha kuikimbila nhaguso yonda igaligwe na Mulungu?

⁸Musang'hane gaja gonda galaguse muzileka nzambi zenu. Sekemuilongele, ‘Abulahamu ayo muhenga wetu.’ Nowalongela, Mulungu kodaha kugasola mabwe gano na kugatenda lukolo lwa Abulahamu!

⁹Shoka ikigwa goya kukanha mibiki mna gamasina. Kila mbiki uleka kulela matunda ganogile wokanhigwa na kwasigwa muumoto.”

¹⁰Lunhu lwa wanhu lumuuza Yohana, “Avo tutende choni?”

¹¹Yohana kawedika, “Munhu yoyose yeli na viwalo vibili yamgwee kimoja miyage yeliduhu, na ija yeli na lujo yatende vivo.”

¹²Wabokela kodi nao weza kubatizigwa. Wamuuza Yohana, “Mfundiza, tweye tutende choni?”

¹³Nayo kawalongela, “Sekemubokele kodi kubanza vija vimulagizigwe.”

¹⁴Wakalizi nao wamuuza, “Na tweye tutende choni?” Nayo kawalongela, “Sekemumboke munhu yoyose sente yake hebu sekemumtaguse munhu yoyose kwa uvizi. Mutosheke na kija kimubokela.”