4 ꞌBa kuán jotsaꞌen profeta Isaías kitsiꞌindutꞌa enre Naꞌenchana ña tsu: Jndare xuta xi ꞌñu nchja ngaꞌnde tꞌaxin: “Tꞌenda_ru ꞌba kixi chjuꞌi_ru ndiyare Naꞌenchana.
5 Ngayéje kunga tseꞌnyu, ꞌba ngayéje nindu ꞌba xkundu kuakjansun, tuxi sjengusunni. ꞌBa ndiya tsitin sꞌe̱ kixi, ꞌba singasun ndiya xi nkꞌajun nkꞌatꞌa chun.
6 ꞌBa ngatsiꞌi xuta skue xi Naꞌenchana tsikasen nga sikꞌangina” kitsu Isaías.
7 ꞌBa Juan tsure xutankjiun xi inyafaꞌe nga mejénre nga satenda: —¡Jún ntjere tjiuye! ¿ꞌYá= xi ꞌba kitsunu nga kuiyu ngatꞌare kjuastire Naꞌenchana xi je tijña tiña?
8 Tusa tiꞌon mé= xi kuakutsejen nga je kjinikꞌantjaiyo kjuafaꞌetsjennu ꞌba nga je jaꞌe ngañu ngixkun Naꞌenchana. Bi ꞌbitsaꞌen nikjaꞌetsjion ngajin inimanu: “Ña= xi ntjere Abraham.” Ngatꞌa ꞌba xinkixi_nuu̱ nga kaꞌnda kui ndiojobi Naꞌenchana ku̱anre saꞌen ntjere Abraham.
9 Hachare Naꞌenchana je tijñandare nga kuate jamare yo. Meni ngayéje ya xi bi nda tu tsja, stisun ꞌba xanikjaꞌajin ndiꞌu.
10 ꞌBa ꞌbatsaꞌen xutankjiun tsiningiyare Juan: —¿Mé= xi tjinnere nga siꞌee̱n yaꞌa?
11 ꞌBa Juan kitsingojore: —Xi tjinre jó chinga, jngu ngatatsjare xi nimé tjinre. ꞌBa xi tjinre xichine, ꞌba nde ngatatsjare xi tsajainre.
12 ꞌBa nde kitsitiña yakꞌa xi kjebechjintjai tsajmi ngatꞌa tseꞌe Roma, tuxi satendani, ꞌba tsiningiyare Juan: —Maestru, ¿mé= xi siꞌee̱n ji̱n?
13 ꞌBa Juan kitsure: —Tiꞌon xi kjuakixi. Bi ngisa tse chjubechjiu jotjin xjubechjiu.
14 ꞌBa nde yakꞌa chasoldadu tsiningiyare: —ꞌBa ji̱n, ¿mé= xi siꞌee̱n? ꞌBa Juan kitsingojore: —Bi chjaꞌa_ru tonre xuta ninga bi fangiu tsajmi xi bi kitsaꞌen tsa tuxi ꞌbatsaꞌen sa̱kuninu tonre; tusa ngatjamaninu jotjin machjinu.
