Luk 3:4-14

⁴Wal Jon bin dum lagijat dumaji longtaim wan speshalwan mesinja blanga God bin raidimdan langa oltestaman wanim God bin tok. Det mesinja bin neim Aisaiya, en imbin tok, “Sambodi deya im jinginatbat langa deset kantri. Im dalimbat ola pipul blanga meigim det roud redibala blanga det Boswan, en im dalimbat olabat blanga streitinimat det wei blanga det Boswan wulijim im garra kaman langa olabat.

⁵Dei garra meigim det roud redi blanga det Boswan blanga kaman. Dei garra lebulum ola hil en bilimap ola beli, en dei garra meigim det krukidwan roud jidan streitwan en det rafwan roud jidan gudbala.

⁶En ebribodi garra luk det Boswan weya God garra jandim blanga seibum olabat.” Lagijat na Aisaiya bin tok. En det wed bin tok blanga Jon Beptis weya imbin dalimbat ola pipul blanga libum olabat nogudbalawei.

⁷Wal bigmob pipul bin kaman langa Jon blanga beptais. En imbin dalim olabat, “Yumob kaninbala! Hubin dalim yumob blanga ranawei wulijim God kaan panishim yumob garram ola najalot pipul weya im garra panishim dregli?

⁸Yumob kaan bogi langa riba en meigim miselp gudwan. Yumob garra shoum detlot gudwan ebrijing langa ola pipul wulijim dei gin sabi yumob bin tenim miselp brom det nogudbalawei. Maitbi yumob reken God kaan panishimbat yumob, dumaji yumob grengrensan blanga Eibrahem. Bat yumob rong. “Ai dalim yumob. God gin binijimap ola pipul, en im gin gajim dislot ston iya en meigim nyuwan grengrensan blanga Eibrahem!

⁹Ai sabi yumob. Yumob jis laiga nogudwan tri. Bat God garram det tomiyauk redibala blanga kadimdan ola nogudwan tri weya nomo meigim gudbala daga, en im garra rudimat detlot tri en tjakidawei olabat en barnimap olabat langa faiya.” Lagijat na Jon bin tok.

¹⁰Wal ola pipul bin askimbat Jon, “Wanim wi garra dum?”

¹¹En Jon bin tok, “If yu garram dubala shet, wal yu garra gibit wanbala langa det men weya nomo garram enijing. En if yu garram daga, wal yu garra gibit langa detlot pipul hu nomo garram enijing.”

¹²Sambala wekinmen blanga det gabman bin kaman langa Jon blanga beptais, en deibin askim im, “Titja, wanim melabat garra dum?”

¹³En Jon bin tok, “Yu gin gajimbat det teks mani weya det gabman bin dalim yu. Bat yu nomo lau meigimbat yu ron prais blanga gajimbat mani blanga yu ronselp.”

¹⁴Sambala solja bin kaman langa Jon du, en deibin bin askim im, “Wanim melabat garra dum?” En Jon bin tok, “Yu kaan fosim enibodi blanga gibit yu mani, en yu kaan dalimbat laiya blanga gedim mowa mani, en wen yu gedim yu pei brom det gabman, yu garra sedisfaid.”