Lucas 3:4-14

⁴Juan-ibmar-imaknaid deyob gusad, ar igi epenne Isaías, Bab-Dummad-gaya-burba-berbeged narmaksa-gusa, deun sogsa-gusgu: Dule-wargwen nega-dule-sulidganba binnasur sunmaknonikoed, dulemarga sognonikoed: “Dule-Dummad-idu igar-mayemar, igar-swilidik mesmar.

⁵Bela nebagan swilidik guoed, yarmala, degine, neg-mullugana omatolegoed. Igar-bire-bire-mamaid inikii imaklegoed, degine, igar-muru-muru-mamaid oswirmaklebaloed.

⁶Bela dulemar Bab-Dummad-abonoged-wisgumaloed.”

⁷Dulemar-bukidar Juan-Bautistase duurmaknoni-damalad, Bab-Dummad-digi-ogleged-igar imakegar; Juan amarga sogde-daed: “¡Ar bemar naibe-bulegan-mimmiganyob gumalad! ¿Ar doa bemar-odurdaksa, Bab Dummad nue-urwe-danikoed-idu wakinned? Bab-Dummad-digi-oglegedgi bemar nuguosurmalad.

⁸Degisoggu, be-daedgine na be oyomar, bemar nue gwagsamalad, be-iskuedga na be bukib binsasmalad. Mer unnila na be sogmalo: ‘Anmar Abraham-wagan gumar. A-ulale Bab Dummad anmargi nabir binsaer-gebed.’ Suli, degisuli. Ar be Abraham-wagwa-sulile, akarsulid, ar Bab Dummad sunna we-akwamar Abraham-e-waganga imaked.

⁹“Deginbali, ar bato akan guar sapi-maligi yoid. Ar degisoggu, sapi nue sanmaksulile, a-sapi siklegoed, soogi melledoed, ogumaklegegar. Deyob Bab Dummad dulemar-imakmogoed.”

¹⁰Ar degi dulemar Juan-Bautistase egichiar dasunnad, ega sogde-damalad: —Degite, ¿ibu anmar imakmarsunnoe?

¹¹Juan, abin-imakdegu, sogded: —Dule suba-gobo nikale, dule-suba-sulidga gogwen ukmogo. Amba deyob mas-gunnedsik imakbaloed.

¹²Dulemargi-Roma-dummadga-mani-gaedgi-arbamalad Juanse nonimarmogad, Bab-Dummad-digi-ogleged-igar imakegar. Amar ega sogdemarmogad: —Odurdaked-saila, ¿anmardi ibi imakmarmogoe?

¹³Juan amarga sogded: —Bemar melle dulemargi wilub-obichaa mani gamalo, ar unnila bemarga igar-uklesadba be mani gamaloed.

¹⁴Degine, suar-ibmala ese egichiarmarmogad: —Anmardi ¿ibi imakmarmogoe? Juan, abin-sogded: —Mer emar-annik gannadba mani suo, degine, mer binsa aimar-ogakansao. Ar bemar na be-bennuklegedgi, gusbin be itoge-wilubmalad.