Luk 3:4-14

⁴Larning di ka tumus tari ana buk anuna propet Aisaia mang, “A elngena mainla i arkabah ting na hanua bel mang, ‘Mulor sang a ngas anuna Leklek, mulor atostos anuna ngasla.

⁵A palisla rop dir por la pa a pukaleklekla rop pa a mangirla dir kel tostos la. A ngasla rop ning la ngokngok dir atostos la, pa a puknala ning la tungtung, dir por tostos la.

⁶Pa a taraila rop lar oroi a titol ane God ning i alaun a tarai ono.’”

⁷A kunum a tarai la hanot tetek e Jon sur ir baptais la. Pa i atai la mang, “Ai, mulo na natnat a soila! Esining i atumarang mulo sur mulor liu kumna kusun a warkurai na arkeles ane God ning ir hanot?

⁸Mulor tol a ututnala ning ir apuasa i mang mulo ka lingir a nuknukimulo. Pa gong mulo nuki mang e God bel ir warkurai mulo anasa mulo a mangis a tarai ane Abaram. A atai mulo, e God i tolsot pasi sur ir tol otnan a mangis a tarai ane Abaram tagun a hatatla ne.

⁹Di ka suah tar a hek ting na kama rakaila, pa rakaila rop ning bel la suah al wakak a wanala, dir ting sen la, pa dir minggen la uting na iah.”

¹⁰A kunum a tarai la dekeni mang, “Asa ning milar toli?”

¹¹I keles la mang, “Esining anuna ir naur a kaen a mermer, ir saran tik tana tik ning bel anuna ta kaen a mermer, mang otleng larning ana utna na hangan.”

¹²Pa dingla na tena los totokom la hanot sur ir baptais la. Pa la dekeni mange, “Tena asaer, asaning milar toli?”

¹³Pa i keles la mange, “Gong mulo kibas totokom i itna tana potopoto ning di ka suah tari.”

¹⁴Pa dingla na tena harum la dekeni mang, “Pa mila, asaning milar toli?” Pa i keles la mang, “Gong mulo angongos pas a mani kusun a tarai, pa gong mulo artitiu asasongo, mulor gasgas ka ana numulo na arlou.”