Luke 3:4-14

⁴Sohen pr̃ovet Isaiah mo ulia mara, ‘Na jara hasetoho leon matea mo lo ulo mara: Ha vasahi na malelen Moli God! Ha tano na malelena i tataholo.

⁵God i pa tavuni na vakoa tari, ale i pa mavalolohi na vutivuti tari la mai la tataholo i r̃uhu, ale kolekole la pa tataholo, ale malele morumoruha la pa tataholo,

⁶ale tamlohi tari la pa hite malele sei God i pa juri na tamlohi hinia.’

⁷Vao tamlohi la lo mai mata paptijo isan John, ale mo lo verea isara mara, “Kamim mata sasati! Hare mo retir̃oar̃oahai kamim vara ha rovo na talai lolokoru non God mata hehe sei mo lo mai?

⁸Ha namaha usuri na nomim posi na hehe. Ha sopo r̃omaulu vara, ‘Kamam kama juri matan tamamam Abraham!’, matan na verea tataholoi kamim hinia vara, God i er̃i vai la vatu nike la mai natun Abraham!

⁹Matan nakerihi, God mo lo ava na nona rita moiso mata wari. Matan, vipahai tari sei la sopo lavi na vuara r̃uhu, i pa tai jovjovira, ale i pa pulahira la vano na hapu.”

¹⁰Ale vao atu la usia isana lara, “Vara mo sohena, kama pa vai na sava?”

¹¹John mo r̃aramira mara, “Vara nom ruru mo rua, o sile te hatea isan haratu mo sopo te nona ruru, ale haratu hana hinau mo matuvana, i vaia sohena.”

¹²Tamlohi mata lavi na takis sohena, la mai isana mata paptijo, la verea isana lara, “Tija, kamam kama pa vai na sava?”

¹³Ale mo verea isara mara, “Ha sopo lavi na mania i jeu na sava mo tataholo vara ha lavia.”

¹⁴Moiso, tamlohi vuro hai la usia lara, “Ale kamam, kama pa vai na sava?” Ale John mo verea isara mara, “Ha sopo vai na tamlohi la matahu mata lavi te mania isara, ha sopo tuvai na tamlohi na halu mata mania, ha avulahi na volimim.”