Luk 3:4-14

⁴Jon wungi hurundéka hanja Godna profet déka xi Aisaia Godna nyingambu angi dé hayi: Du nak dé wa du rehafi hafwambu. Wata dé angi wa, “Néma Duna yambu huréhalékétanguni. Huréhalékéngut déka yambu jémba rendé.

⁵Atéfék yafékwa yakitéfitanguni, yambu yindéte. Atéfék némafwi némbu atéfék yikama némbu akwi jémba bwatanguni, yambu yindéte. Angwa yandé yambu hurungut yambu huritéké rendé. Yambumbu rekwa motu hérekingut yambu jémba rendé.

⁶Wungi hurungut atéfék du takwa xétandi, God du takwaré Satanéna tambambu hératendékaka.” Wungi dé Aisaia hanja hayi, Jonka.

⁷Hayindén maki séfélak du takwa Jon diré guré husandandéte yandaka dé diré angi wa, “Guni haraki hambwena nyangwal guni. God gunika dé némafwimbu mawuli wita dé hukémbu hurungun haraki sémbut hasa hwetandé. Héndé wa, guni déka mawuli wika yaange yingute?

⁸Tale guni hurungun haraki saraki sémbut yatakataka yikafre joo male hurutanguni. Hurungut du takwa xéta xékélakitandi, guni guna haraki sémbut wundé yatakangu. Guni guna mawulimbu guni wa, ‘Nani Abrahamna mandéka rembeka dé God nanika dé mawuli ye.’ Wungi wakénguni. God mawuli yata wandét ané motu du takwaré xaakwa di Abrahamna mandéka maki retandi.

⁹Misange mi mombu haxéta dé re. Atéfék yikafre sék xakéhafi yakwa miré xéle yakitaka yambu tutandé.”

¹⁰Jon wungi wandéka di déka hundi xékéta di déré wakwexéké, “Nani méta yatame?”

¹¹Wungi wandaka dé diré wa, “Guni nukwa wur yéték héra re, guni nak nukwa wur hafi du takwaka hwetanguni. Guni hénoo hura re, guni hénoo yike du takwaka hwetanguni.”

¹²Wun hundi wandéka di Romka yéwa héraakwa du nawulak di déka ya, dé diré guré husandandéte. Yae di déré wa, “Wakwekwa du, nani méta yatame?”

¹³Wungi wandaka dé diré wa, “Guni Romna gavman guniré wandan maki male yéwa hératanguni. Nawulak akwi hérakénguni.”

¹⁴Wun hundi wandéka di xi warekwa du nawulak déré wakwexéké, “Nani yingi maki dé? Nani méta yatame?” Wungi wandaka dé diré wa, “Guni du takwaka hambuk yata deka yéwa baka hérakénguni. Guni du takwaka yénataka hundi wata deka yéwa hérakénguni. Guni jémba yata héranguka yéwaka yikafre mawuli yatanguni.”