Lucangundru 3:4-14

⁴Worderu Jesaiani Prophetaia jaurani parai, jeruja jatanani: “Karkanietjaia ngaiala pitarani parai: Kaparaia palto nankinganimai ja tidna palto nunkani talku ngankanimai.

⁵Wipawipa pratjana palparu pantjila nganai, ja mardawonpa ja dako pratjana waka pantjila nganai; ja kuntikunti talku ja palto diladila palara pantjila nganai.

⁶Ja kana warupotujeli Godaia Kulkampirna najila nganai.”

⁷Nulu kana wolarani, tana nunkangu dunkana wonti nunkangundru multibanila manila, jatana wonti: “Wiparaia kuparu worajai! Warlenulu jurangu wondrana wonti japa mindrinanto tirini, nau wokarala nganai?

⁸Madlentjandru karitjinaia tandra talku punkibanau, ja wata wonianau jataterila: “Ngaiana Abraham ngaperi ngaianani ngamalkai;” ngangau ngani jurangu jatai, Goda ngurunguru nganai tanangupini mardandru kupa jiritjibala Abrahamangu.

⁹Kalara matja pita kaparani parai; pita pratjana, wata tandra ngumu punkibanani wokaribala nganai ja turuni worala nganai.”

¹⁰Ja kana wolarali nina jekibana wonti ja jatana wonti: “Mina ngaiani ngankananto?”

¹¹Nulu kalabana wonti ja tanangu jatana wonti: “Warle kati mandru ngamalkai, nulia nunkangu jinkiatimai, nulia wata ngamalkai; ja warle buka ngamalkai, ngankaiatimai bakana jeruja.”

¹²Ja bakana mardatandrakampanietja wokarana wonti multibanila manila, ja nunkangu jatana wonti: “Ngujangujara jinkinietjajai, mina ngaiani ngankananto?”

¹³Nau tanangu jatana wonti: “Kampanimai mina jurangu parai kampananto, wata morla!”

¹⁴Bakana kalti ja kirraetjali nina jekibana wonti ja jatana wonti: “Ja ngaiani, mina ngaiani ngankananto?” Ja nau tanangu jatana wonti: “Wata kulno jupanau, ja wata kaukau wapanau, ja murlali ngananau kalalani juranani!”