San Lucas 3:4-14

⁴Caní guca ca na' gunná Isaías, benne' bchálaje̱' waláz chee̱ Dios, gunné̱': Nen tu chi'i bénnea' dxenné̱' zizraj le̱'e̱ xixre' lawe' lataj. Dxenné̱': Le gucueza neza naga te Xránadxu. Le xulí chawe' neza lase chee̱'.

⁵Ca naca zrítudu ca' le xuzrá na. Ca naca xi'a ca', ne xí'adu ca' xelexaca na tu li. Neza xúca'du ca' xelexelí na. Neza da quebe nalí xelexaca na tu li.

⁶Ca naca bénneache xelelé'ene̱' Benne' Weselá sel-la Dios.

⁷Gate benne' ca' belezrine̱' lau Juan chee̱ xeledxúe̱' nisa, na' le̱' dxe̱'e̱ benne' ca': ―Xrtia be̱la snia. ¿Ble'e nu benne' le'e chee̱ cuásale ca naca xel-la dxezrá'a chee̱ Dios da ba za?

⁸Le gun da gulé'e na ba bebí'i lázrele, ne quebe nnale lu lázrdaule: Nácantu' xrtia ljwezre Abraham. Neda' dxapa' le'e, Dios wazéquene̱' xexune̱' xiaj caní xrtia Abraham.

⁹Xa waga ba de̱ cuásate̱ na chee̱ chugue̱' xaga ca', na' xúgute̱ xaga da quebe dxelebía na da zixre chawe' welechugue na, na' xuluzré̱'e̱ na lu xi'.

¹⁰Nadxa benne' ca' buluche̱be̱' le̱': ―¿Bi dxal-la' guntu'?

¹¹Juan beche̱be̱': ―Benne' de̱ chupa zre̱' dxal-la' gunézruje̱' tu na benne' quebe de̱ chee̱', na' benne' de̱ da dxawe̱' dxal-la' gunézruje̱' da gagu bénnea' quebe bi de̱ chee̱'.

¹²Cá'anqueze belelá' benne' wechizruj ca' chee̱ xeledxúe̱' nisa, na' buluche̱be̱' Juan: ―Benne' wese̱de, ¿bi da dxal-la' guntu' netu'?

¹³Juan guzre̱' le̱': ―Quebe guchízrujle da zrendxa ca da nadxixruj bea na.

¹⁴Cá'anqueze bal-la benne' dxjaque̱' wedil-la buluche̱be̱' le̱': ―¿Gazra netu'? ¿Bi da dxal-la' guntu'? Juan beche̱be̱': ―Quebe guchébele benne', ne quebe gágule le̱' zria lu da we̱n lazre' chee̱ cuale dumí chee̱', na' le be nen cadite názrujle.