Lukas 3:4-14

⁴Pun iei usun mine a mak lon ewe puk makkeen ewe soufos Aisea, “Eman a kökkö fän leüömong lon fanüapö: ‘Oupwe amolätä efoch al fän iten ewe Samol, oupwe awenecharala ewe al epwe fetal won.

⁵Lemolun chuk meinisin repwe irela, ekewe chuk meinisin repwe tekisonola. Ekewe al mi pwor repwe awenewen, ekewe al mi pukopuk repwe sonosonöchüla.

⁶Iwe, aramas meinisin repwe küna än Kot angangen amanau.’”

⁷Iwe, eu mwichen aramas mi chomong ra feila pwe repwe papatais ren Johannes. Nge a üreniir, “Ämi nöün serepenit. Iö a ürenikemi pwe oupwe sü seni än Kot we song epwe awarato womi?

⁸Oupwe föri sokun föför epwe pwärätä pwe oua aier seni ämi tipis, nge ousap popuetä le apasa lefilemi, ‘Äm mwirimwirin Apraham.’ Pun ngang üpwe ürenikemi, pwe Kot a tongeni angei ekei fau o föri seniir pwe repwe mwirimwirin Apraham.

⁹Ewe kouk a fen molotä pwe epwe pöküela ekewe irä seni warer. Iteiten irä esap uani ua mi öch epwe pöküpök o koturolong lon ekkei.”

¹⁰Iwe, ekewe aramas ra aisini Johannes, “Nge äm, met äm aipwe föri?”

¹¹Johannes a pölüeniir, “Iö a eäni ruu söch epwe angei echö o ngeni ewe eman esap wor an, nge eman mi wor anan mongö epwe pwal föri iei usun.”

¹²Iwe, ekoch chon ioni takises ra feito pwe repwe papatais. Ra aisini, “Sense, met äm aipwe föri?”

¹³Johannes a pölüeniir, “Oupwe chök ioni takises lon ükükün met mi afat lon allük.”

¹⁴Ekoch sounfiu ra pwal aisini, “Nge äm, met äm aipwe föri?” Johannes a pölüeniir, “Ousap achomau lon ämi angei moni seni aramas, ousap atipisimwäli eman, nge oupwe menemenöch ren liwinin ämi angang.”