Luke 3:4-14

⁴Aeni te vaghaa na prophet Isaiah te gerea tua idania tana gegere te tabu, me ghaghua, “Na manga ni tinoni te ghaeghahe tana bona mamaha, ‘Kau gonidilaa na halautuna Lord. Kau maemanea na halautu ke liu iga.

⁵Kau va vonughighi na lei boboko, ma rana lei ghotu mana tetete kau gheli horui me ke taotano, na halautu kekeli kau maemanei, mana halautu tara kakaba, kau va paghurai me ke mabo.

⁶Mana lei vure udolu kara righia nina huioli God.’”

⁷Gaia John te bosa vanira na vure tara mai righia ge ke vulitabura me ghaghua, “?Ighau te vaghaghau na lei poli, ahei te bosatatea vanighau, ge kau samasania nina totoro sule God ke mai?

⁸Kau diki talutatea mughua tana nilabumiu na lio ni tughulio te vaghaa na ghai te nia vangagha na vavanga te uto. Kau bei bosa heghemiu gea ge kau samasania nina rutu God na pukuna tau ghaghua, ‘Abraham a kukuada, keri ke ma uto so ighita,’ na pukuna inau tu bosa vanighau, ‘God ke tangomana ge ke liliura na lei vatu raini vaa tana lei vavatana Abraham.’

⁹Itaeni God te gonidilaa ge ke detera rahei tara mua tughulio te vaghaa na mane te dutu tokani na lei ghai nia na posu. Raini tara mua loghoa na vavanga te uto, ke toka horui me ke soni haghei tana lake!”

¹⁰Na vure subo tara huatia, “?Na hava to liona kai gonia?”

¹¹Ma John te bosa tughu vanira, “Ahei tamiu ke loghoi erua na pupulu ke, me ke nia hevei sakai vania ahei te mua lologho, ma hei ghua te logho vanga ke, ke tuvalira tara vitolo.”

¹²Ma gaira na vahikolu rongo, tara mai ghua itatana ge ke vulitabura, tara huatia ghua mara ghaghua, “?Tarai, mi ghai eni na hava kai gonia?”

¹³Ge bosatughu vanira, “Kau bei lavi rongo au vulea taonia na vetena.”

¹⁴Ma gaira rana malaghai tara huatia ghua mara ghaghua, “?Na hava kai gonia ighai?” Ma gaia te ghaghua, “Kau bei lavimataghuna na tinoni ge ke heghau na rongo, ma kau bei huru taboa siki sakai, ma kau lavi togotogoa vasoo na rongo ni pelumiu.”