Lucas 3:4-14

⁴Ukit ka‑ay't id puungan ni Juan, notuman iddos id sulat ni propeta Isaias no, “Duwon monokkaan bawos diyot noka‑awoy‑awoy'n lugaa no mid ungketen to, ‘Ponaya row kos pusung dow atag tod Longaggon, woy tulidda row kos od ukitan din.

⁵Iddos ipat sobbong no lugaa, od bunbunan, woy dos ipat lovuntud woy buvungan, od potaddon. Dos bengkog no daan, od tuliddon woy dos botuwon, od upiyannan.

⁶Na, od kokita to langun no minuvu iddos po‑ukit to Monama to kodtobbus kandan.’ ”

⁷Mo‑uraan minuvu kos mid undiyon to ki Juan amoy'd poboutismu. Kahi rin kandan to, “Sikiyu, iling kow to mgo uwod nod laas! Kunan dow ayu kod pokolegguang kowd taddot od ingumon kodsilut to Monama otid koboutismuwan kowd!

⁸Otik bonnaa en no id sondit woy id tanan kowd to mgo saa row, posivonnali row ini ukit to koniyun pinuungan. Yo kow'd pososalig no dii kow od silutan to Monama pomon to koubbaran kow ni Abraham. Od ikohiyan ku sikiyu, no ahad inis mgo batu, od kovovallan to Monama no koubbaran ni Abraham.

⁹Pomotawi row! Dos kodsilut to Monama koniyu, noko‑iling to porokuu no nopanoy ron nid tampod to kayu. Woy dos ipat kayu no diid bovunga to moppiya, od tompoddon woy'd lumbag diyot apuy.”

¹⁰Na mid intud ki Juan iddos mo‑uraan minuvu, kahi ran to, “Ko ungketen, ondan man kos od puungan doy?”

¹¹Mid tavak si Juan to, “Iddos duwon oruwon umpak, ko‑ilangan no id boggoy rin kos sokkad diyot waa umpak. Idda mandad so duwon koka‑an, ko‑ilangan nod boggoy riyot waa koka‑an.”

¹²Duwon mandad mgo tohodsukut to buhis no id porani ki Juan amoy'd poboutismu. Kahi ran to, “Tohodnonaw, ondan kos od puungan doy?”

¹³Mid tavak si Juan to, “Yo kow'd ponukut to buhis no lampas taddot id posukut koniyu to guberno.”

¹⁴Duwon mandad mgo sundau nid intud kandin, kahi ran to, “Na sikami, ondan mandad kos od puungan doy?” Mid tavak si Juan to, “Yo kow'd pongimallak woy yo kow'd ampoo to mgo minuvu amoy'd ponoopi. Kahaa kowd taddot bayad koniyu.”