Sam 132:2-18

²Mu balabala ia Zihova, sa nana vina tatara koa Goi, pu tokotokoro nia sa koasa Tamasa Patutokaena te Zekopi,

³“Lopu kaqu pule la pa qua vetu si rau, babe la eko pa qua teqe.

⁴Lopu kaqu magogoso babe la puta si rau,

⁵osolae kaqu ponia rau si keke Nana vasina pude koa se Zihova; sapu keke Nana vetu soti sa Tamasa Patutokaena te Zekopi.”

⁶Ele avoso nia gami pa Betilihema sa Bokese Vinariva Egoi Tanisa, meke ele dogoria gami si asa pa keke vasina pa Kiriati Ziarimi.

⁷“Aria mada la koasa vetu te Zihova, mada la kokotuṉu pa nenena meke vahesia.”

⁸Kei Zihova, Mu mae koa pa Mua vasina hopena koasa Mua Bokese Vinariva Egoi, sapu sa vina gilagilana sa Mua ṉiniraṉira, Mamu koa vasina ninae rane.

⁹Sari na Mua hiama si madi evaṉia ninae rane gua sapu toṉoto. Madi kera qetuqetu sari na Mua tinoni.

¹⁰Ele vekoa Goi sa Mua vina tatara koe Devita, sa Mua nabulu; ke Mu lopu kilu ia sa baṉara pu ele vizatia na va madia Goi.

¹¹Ele vekoa Goi Zihova sa Mua vina tatara hinokara koe Devita; sa vina tatara sapu lopu kaqu hobea Goi. Zama si Goi, “Keke koari na tumu koreo si kaqu va baṉaria Rau, meke kaqu koa totoli pa mudimu goi.

¹²Be kopu ni ri kasa tumu koreo goi sari na qua vinariva egoi nabuna meke kopu ni rini sari na Qua tinarae pu va tumatumae ni Rau, si kaqu koa baṉara tugo sari na tudia ninae rane,” gua.

¹³Ura ele vizatia e Zihova sa popoa Zaione, hiva nia Sa si asa pude na Nana vasina kokoana, meke zama si Asa,

¹⁴“Hie si na Qua vasina kokoana ninae rane ka rane. Tani si kaqu koa Baṉara si Rau. Ura asa tugo si hiva nia Rau.

¹⁵Kaqu poni Rau koari na tinoni pa Zaione sa kinoa valeana. Kaqu poni va deṉa ni ginani Rau saripu malaṉadi vasina.

¹⁶Kaqu mana ni Rau sari doduru dia hiama koari doduru dia tinavete, meke kaqu kera velavela pa qinetuqetu sari na tiena sa popoa Zaione.

¹⁷Vasina si kaqu va baṉaria Rau si keke ri na tutina e Devita. Vasina si ele va namanama ia Rau pude toa hola sa binaṉara tanisa qua baṉara ta vizatana.

¹⁸Kaqu koa kurekure sari nana kana, ba sa nana binaṉara si kaqu toa valeana meke koa valeana.”