Mbouŋ to Yes Israela 132:2-18

²Muuŋ, David imbua saveeŋ ariaŋa toman Yoova, ye Maaron ariaŋa to Yakop. Ve ipariaaŋ saveeŋ tonowen le iyaryaaŋ kat.

³Ighaze: “You irau nalooŋ nala ruum tiou, ve nala inag to ghenooŋ sone.

⁴Irau ateg izi, ve nagheen sone.

⁵Le irau nandeeŋ ndug eta pa Yoova. Ŋgar tiou iyaryaaŋ kat naghaze nakaal ndug eta, leso inim Maaron ariaŋa to Yakop ina to nepooŋ, ghoro ateg izi!”

⁶Sawa to yei nineep izi taan suruvu to Eprata, yei nilooŋ Bokis to Saveeŋ Mbuaaŋ varu. Tovenen nila le nighita ineep igharau ndug Yar.

⁷Muri ghoro, tisakia ila Yerusalem. Tovenen nisaav nighaze: “Tamundig tala pa Maaron ina to nepooŋ to Yerusalem we. Tala tagharau ina to ghamuuŋ pooz, ve taput agheed pani, ve tapaiti.”

⁸O Yoova, umundig toman Bokis to Saveeŋ Mbuaaŋ, ve ula pa inam to nepooŋ, ve atem izi. Bokis tonowen to inim ghilalooŋ pa tapirim.

⁹Yei nighaze ŋgar deŋia ineep tuŋia ila to ndiran tiom to watooŋrau, inimale nonogiiŋa to moghon moghon tindud di pani. Ve yes to lolodi ineep tuŋia ilat tiom ve titaghon ataam tiom, nighaze tilool ve tipait izam toman lolodi poia.

¹⁰O Yoova, matam iŋgal mbesooŋa tiom David. Ye ndamo payei, tauto nighaze ulooŋ suŋuuŋ tiei tonene. Paghu toni to yom ughuri inim kinik payei ne, upul murim pani malep.

¹¹Muuŋ, Yoova imbua saveeŋ ariaŋa toman David, ve ipariaaŋa le iyaryaaŋ kat. Tovenen irau ireua maau. Isaav ighaze: “You pale naghur papaghu tiom eta inim kinik, leso igham inam, ve ineep ila inam to ghamuuŋ pooz.

¹²Ve ighaze papaghu tiom matadi kisin saveeŋ mbuaaŋ tiou, ve titaghon tutuuŋ tiou, nene pale naghur papaghu todi paam tinim kinik, ve tineep ila inam to ghamuuŋ pooz to aazne, ve itaghoni taghoni gha ila. Tutuuŋ tonenen, you taug pale napatooŋ ŋgara padi.”

¹³Yoova isia ndug Zion, ve ighami inim le wa. Ndug tonene, to ye lolo pani ighaze ineep ila.

¹⁴Tauto isaav ighaze: “Ndug tonene pale inim inag to nepooŋ irau sawa isob. Inag to ghamuuŋ pooz pale ineep sualen. Pasa, lolog pa ndug tonene kat.”

¹⁵You pale nagham poian tamtoghon to Zion, ve poia tiou tiina iza todi. Leso tiraua kat pa mbeb to naol. Ve nagham aniiŋ pa yes mbolaaŋa todi, ve tighan le apodi isuŋ.

¹⁶Ve yes to watooŋrau to tineep izi Zion, you pale napalot di pa uraat todi. Leso tinim ataam pa ulaaŋ tiou ila pa tamtoghon. Tovenen tamtoghon to Zion to lolodi ineep tuŋia inim tiou ve titaghon ataam tiou, pale tilool ve tipait izag toman lolodi poia kat.

¹⁷Paghu to David to naghuri inim kinik ve ineep izi ndug tonene, you pale nagham iza ve tapiri ivot inim tiina. Kinik to you taug nasia ve naghuri pa uraat, you pale napalot papaghu toni, ve tigham pooz itaghoni taghoni gha ila, tinimale lam to iyaryaar irau sawa isob.

¹⁸You pale natatan kinik koia, ve moghon moghon tinepneep toman mayadi. Eemoghon yes to tinepneep ila kinik samba, you pale napalot di, ve nagham di tineep poia kat. Leso nepooŋ todi poia tonowen ipambood kinik.