Buk Song 132:2-18

²Strongpela God bilong Israel, yu mas tingim gen ol promis Devit i bin mekim long yu.

³Em i tok olsem, “Mi no ken i go long haus na mi no ken slip long bet.

⁴Mi no ken malolo na slip yet.

⁵Pastaim mi mas wokim wanpela haus bilong Bikpela, Strongpela God bilong Israel, bai em i ken i stap long en. Na bihain bai mi malolo.”

⁶Long Betlehem mipela i harim tok long Bokis Kontrak bilong Bikpela. Na mipela i lukim em i stap long graun bilong Kiriat Jearim.

⁷Na mipela i tok, “Goan, yumi go long haus bilong Bikpela. Yumi go lotu klostu long sia king bilong en.”

⁸Bikpela, yu kam wantaim Bokis Kontrak bilong yu na sindaun long ples malolo bilong yu. Dispela Bokis Kontrak em i mak bilong bikpela strong bilong yu.

⁹Yu ken helpim ol pris bilong yu, bai ol i mekim stretpela pasin oltaim. Na dispela pasin bilong ol i ken i stap olsem gutpela bilas bilong ol. Na ol manmeri bilong yu i ken amamas na singaut.

¹⁰Bikpela, yu mas tingim wokman bilong yu, Devit, na yu no ken givim baksait long king yu yet yu bin makim.

¹¹Bikpela, bipo yu bin mekim wanpela strongpela promis long Devit, na yu no inap senisim tok bilong yu. Yu bin tok olsem, “Mi bai mekim wanpela bilong ol lain pikinini bilong yu i kamap king.

¹²Sapos ol pikinini man bilong yu i bihainim kontrak bilong mi, na bihainim olgeta lo mi givim ol, orait bihain ol pikinini man bilong ol tumbuna bilong yu, ol tu bai i kamap king, i go inap olgeta taim bihain.”

¹³Bikpela i makim Saion pinis olsem taun bilong en, na em i laik i stap oltaim long en.

¹⁴Em i tok, “Bai mi stap oltaim oltaim long dispela taun. Mi makim dispela ples bilong mi ken i stap king long en.

¹⁵Bai mi givim planti samting long Saion na bai ol manmeri i no inap sot long ol samting. Na bai mi givim kaikai long ol rabisman na ol bai i pulap tru.

¹⁶Bai mi givim wok long ol pris bilong Saion, bilong autim tok long mi save kisim bek ol manmeri bilong graun. Na ol manmeri bilong Saion i ken singim song na amamas na singaut.

¹⁷Bai mi kisim wanpela man long lain bilong Devit na mekim em i kamap king long dispela ples, na lain bilong en i no inap lus long dispela wok.

¹⁸Bai mi mekim ol birua bilong en i sem nogut, tasol ol lain manmeri em i bosim bai ol i kamap gutpela na i stap strong.”